Վանաձորի քաղաքապետ ընտրվեց Մամիկոն Ասլանյանը

15.51. Մամիկոն Ասլանյանի օգտին քվեարկեց 19 ավագանի, Քրիստ Մարուքյանի օգտին՝ 14: Վանաձորի քաղաքապետ ընտրվեց Մամիկոն Ասլանյանը:

14.55 Քվեարկությունը վերսկսվել է, ավագանու անդամները մոտենում են քվեախցիկին եւ կատարում իրենց ընտրությունը:

14:50 Այս պահին քվեասենյակ ժամանեց ՀՀԿ խմբակցության ղեկավար, վանաձորցի պատգամավոր Վահրամ Բաղդասարյանը՝ փորձելով հաշտեցնել վիճաբանողներին:

14.41 «Բա դռոններ էիք քաղաքով մեկ բերում, ասում էիք համատարած փող ա բաժանվել, էդ դռոնները տանեիք սահման»,- գոռգոռալով ասաց Մամիկոն Ասլանյանը՝ դիմելով ԼՀ անդամներին, ապա շարունակեց.

«Մենք մեր Վանաձորի ժողովրդի առաջ գոնե շիտակ ու ազնիվ ենք»:

«Էդ ո՞նց եք ազնիվ»,- հարցրեց Էդմոն Մարուքյանը:

«Մեր ստացած քվեներով»,- պատասխանեց Մամիկոն Ասլանյանը:

Ապա Քրիստ Մարուքյանը, դիմելով Մամիկոն Ասլանյանին ասաց.

«Էրեկ դո՞ւ չէիր ԲՀԿ-ի շտաբի դիմաց սպառնալիքներ տարածում»

«Դե, երդվի»,- պատասխանեց Ասլանյանը:

14.25 «Օրենքից բարձր որեւէ որոշում կայացնելու իրավունք չունեք, չեք կարա փակ գաղտնի քվեարկութունը վերածեք կրկեսի»,- դիմելով Էդմոն Մարուքյանին ասաց Մամիկոն Ասլանյանը եւ շարունակեց.

«Պարոն Մարուքյան, կրկեսով եք զբաղված, ձեզ կեղծում եք, անազնիվ քայլ եք կատարում բոլորի նկատմամբ, սա կապիկություն է, քվեարկությունը փակ է, ինչո՞ւ եք բաց քվեարկում»,- հարցրեց նա:

«Լավ ենք անում»,- արձագանքեց Էդմոն Մարուքյանը:

14.11 Քիչ առաջ, երբ քվեախցիկից դուրս եկավ ԼՀ ավագանիներից մեկը, ում քվեաթերթը նախատեսված կարգով փակված չէր, աղմուկ առաջացրեց, բոլորը սկսեցին գոռգոռալ, որ վերջինս ուզում էր իր քվեաթերթիկը ցույց տալ:

Անգամ հնչեցին հայտարարություններ, որ քվեարկությունը պետք  է դադարեցվի:

Մամիկոն Ասլանյանը եկավ քվեախցիկի մոտ եւ ասաց, որ պետք է պահպանվի օրենքի պահանջը՝ քվեարկությունը փակ-գաղտնի ընթացակարգով է ընթանալու:

Երբ վերահսկիչ հանձնաժողովի քարտուղարը փորձեց ընդհատել Ասլանյանին, վերջիս վրդովվեց.

«Լսի է տղա ջան»,- ասաց նա:

Փոխադարձ գոռգոռոցները շարունակվում են:

Էդմոն Մարուքյանը հայտարարեց, որ ԼՀ-ն բաց է քվեարկում, ինչից հետո իր կուսակիցները սկսեցին ծափահարել:

Ապա, Մամիկոն Ասլանյանը սկսեց գոռգոռալ, որ քվեարկությունը չի կարող բաց լինել, այն օրենսդրության խախտում է:

Քվեարկության սենյակ են ժամանել ոստիկանության աշխատակիցներ:

13.53 Երկար բանավեճերից հետո հանձնաժողովն ի վերջո ներկայացրեց քվեարկության կարգը, ըստ որի, վավեր են համարվելու միայն կապույտ գույնի գրիչով արված քվեարկությունները: Գրիչը տեղադրված է քվեախցում: Ապա քվեարկությունը սկսվեց: Առաջինն ըստ ցանկության քվեախցին մոտեցավ ՀՀԿ խմբակցության անդամ Արթուր Օհանյանը:

13.28 Վանաձորի ավագանու նիստում քվեարկությունը դեռ չմեկնարկած բանավեճ սկսեց ավագանու  անդամների միջեւ. նախ սկսեցին վիճել քվեարկության սենյակում գտնվելու իրավունքի համար: Ի սկզբանե որոշում էր կայացվել, որ կարող են ներկա լինել ոչ միայն ավագանու անդամները, այլ նաեւ յուրաքանչյուր կուսակցությունից երեքական անդամ: Սակայն սենյակում տիրող աղմուկից հետո որոշեցին, որ միայն ավագանիներն ու լրագրողներն իրավունք ունեն սենյակում գտնվել, ինչն առաջացրեց ավագանու անդամների մի մասի դժգոհությունը:

Այնուհետեւ, վիճաբանությունը շարունակեց Հեղինե Բիշարյանը՝ կրկին բողոքելով այն որոշման դեմ, որ բջջային հեռախոս չի թույլատրվում քվեախցիկ տանել:

Բիշարյանին հակադարձեցին, որ նա հանձնաժողովի նախագահի որոշումներին չի ենթարկվում.

«Տիկին Բիշարյան, խանգարում եք»,- ասաց ավագանու անդամներից մեկը:

Ապա խոսեց նաեւ Մամիկոն Ասլանյանը.

«Էսօր ավագանու նիստ է, ԱԺ-ի նիստ չի, մենք ԱԺ-ի նիստերին չենք միջամտում»,-ասաց նա:

Այժմ ավագանու անդամները քննարկում են հարցը՝ հետաձգում են, արդյո՞ք, ավագանու նիստը, թե՞ ոչ:

13.14 Քաղաքապետի ՀՀԿ-ի թեկնածու Մամիկոն Ասլանյանին հիշեցրինք, որ օրեր առաջ մեզ հետ զրույցում ասաց, որ Քրիստ Մարուքյանի ընտրվելու դեպքում պատրաստ է սեղմել ձեռքը եւ շնորհավորել: Հարցին՝ բոլորի ներկայությամբ պատրա՞ստ է պահել խոստումն ու շնորհավորել, Ասլանյանն ասաց.

«Բնականաբար, կսեղմեմ»:

Հետաքրքրվեցինք՝ ընտրությունների արդյունքից հետո կրկին պատրաստվո՞ւմ է ֆեյսբուք սոցիալական ցանցում երգ տարածել, Ասլանյանը պատասխանեց.

«Գաղտնիք է, ես տրամադրության երաժշտություն եմ սիրում, այնպես որ տրամադրությունս ինչ կանխորոշի, այն էլ կտարածեմ, միգուցե չտարածեմ»,-ժպտալով ասաց նա:

Մեր դիտարկմանը, որ ԼՀ-ից բարձրաձայնում էին կոալիցիոն համաձայնագրին միացած անդամներին սպառնալու, ճնշումների մասին, Ասլանյանը հարցով պատասխանեց.

«Դուք որեւէ մեկին էստեղ ճնշված տեսա՞ք, 33 ավագանի կար էստեղ, չեմ կարծում, որ մեկը ընկճված լինի ու չբարձրաձայնի այդ մասին»,- ասաց նա:

Քրիստ Մարուքյանից եւս հետաքրքրվեցինք՝ պարտության դեպքում պատրա՞ստ է շնորհավորել Մամիկոն Ասլանյանին.

«Իհարկե, պատրաստ եմ, եթե ձայների հաշվարկի արդյունքում պարզվի չունենք ձայների անհրաժեշտ քանակը, բնականաբար, պետք է արդյունքների հետ հաշվի նստենք»,- ասաց Մարուքյանը:

12.20 Ժամանակավոր հաշվիչ հանձնաժողովի նորընտիր նախագահ Հայկազ Սիմիկյանը ներկայացրեց ընտրության վայրի վերաբերյալ որոշումը:«Որոշվեց, որ քվեարկությունը կլինի այս դահլիճում՝ բեմում, որպեսզի ընթացքում դահլիճում հանդարտ լինի, կարող են դահլիճում ներկա լինել նաեւ բոլոր  ավագանիները, ամեն կուսակցությունից երեք հոգի, նաեւ լրագրողներ»,- ասաց հանձնաժողովի նախագահը:

Վերջինիս խոսքով՝ տեղում կլինի փակ-գաղտնի քվեարկություն, ապա  հանձնաժողովը կամփոփի արդյունքները:

Նիստը վարող Գայանե Քալաթարյանը հիշեցրեց, որ փակ-գաղտնի քվեարկության ժամանակ արգելվում է հեռախոս ունենալ, ինչն առաջացրեց ՕԵԿ խմբակցության ղեկավար Հեղինե Բիշարյանի վրդովմունքը: Նա պահանջեց օրենքին հղում անել.

«Էդ ո՞ր օրենքի հոդվածով»,- տեղից գոռում էր նա:

Նախագահողը հղում կատարեց համապատասխան հոդվածին:

Ապա, հանձնաժողովն ընդմիջում հայտարարեց՝ պատրաստվելու քվեարկությանը:

Քվեարկությունը կլինի 13.00-ին:

Վանաձորի քաղաքապետարանում մեկնարկում է նորընտիր ավագանու առաջին նիստը, որի ժամանակ փակ  գաղտնի քվեարկությամբ քաղաքապետ կընտրվի:

 Հիշեցնենք, որ Վանաձորի ավագանու ընտրություններում Հայաստանի Հանրապետական կուսակցությունը ստացել էր 13, «Լուսավոր Հայաստանը»՝10, «Հայկական Վերածնունդը»՝ 5, «Բարգավաճ Հայաստանը»՝ 3, ՀՅԴ-ն՝ 2 մանդատ:

«Լուսավոր Հայաստան», ԲՀԿ եւ «Հայկական վերածնունդ» կուսակցությունները հուշագիր են ստորագրել եւ պաշտպանելու են «Լուսավոր Հայաստանի» ցուցակը գլխավորող Քրիստ Մարուքյանին:

ՀՀԿ թեկնածուն Մամիկոն Ասլանյանն է: 

Տեղեկացնենք, որ նիստի սկզբում քաղաքապետի պաշտոնի համար առաջադրվեցին երկու թեկնածու՝ Մամիկոն Ասլանյանը եւ Քրիստ Մարուքյանը: Ավագանու նիստում որոշում կայացվեց ձեւավորել հաշվիչ հանձնաժողով, որն էլ կհաշվարկի ավագանու անդամների քվեարկությունը: