Էլ չարիք չի. ԲՀԿ-ական պատգամավորը չի բացառում Գագիկ Ծառուկյանի վերադարձը քաղաքականություն

Վերջին շրջանում ԲՀԿ վերնախավը սկսել է բացահայտ կերպով խոսել Գագիկ Ծառուկյանի քաղաքականություն վերադարձի հնարավորության մասին: Շուրջ 2 շաբաթ առաջ ԲՀԿ խմբակցության պատգամավոր Միքայել Մելքումյանը ԱԺ-ում լրագրողների հետ զրույցում «հիշեցրեց», որ Ծառուկյանը ժամանակավորապես է հեռացել քաղաքականությունից:

Դրան հաջորդեց հոկտեմբերի 2-ի ընտրությունների քարոզարշավը. համացանցում տարածված տեսանյութում երեւում էր, թե ինչպես է քարոզարշավի շրջանակներում Գյումրիում անցկացվող երթի ընթացքում ԲՀԿ ղեկավար կազմի կողքով քայլող մի երիտասարդ բարձրախոսով հայտարարում Ծառուկյանի վերադարձի անհրաժեշտության մասին, որին վանկարկումներով միանում էր ԲՀԿ ղեկավարությունը:

ԲՀԿ խմբակցության քարտուղար Վահե Էնֆիաջյանն, օրինակ, այդ տեսանյութը իր էջում տեղադրելով այն վերնագրել էր այսպես. «Մեր այցերը Հայաստանի խոշորագույն համայնքներ ցույց տվեցին, որ ամենուր ժողովուրդը պահանջում է Գագիկ Ծառուկյանի վերադարձը...»:

չեն բացառում 

Ծառուկյանի խայտառակ հեռացումից 1.5 տարի անց Գյումրիի փողոցներում նրա վերադարձի «պահանջ» ներկայացնելը գուցեեւ նախընտրական տրյուկ էր՝ հոկտեմբերի 2-ի ՏԻՄ ընտրություններում ձայներ հավաքելու համար: Իսկ սա արդյո՞ք նշանակում է, որ ԲՀԿ-ականների ցանկությունը իրականություն կդառնա 2017 թվականի խորհրդարանական ընտրություններից առաջ:

Մեր հարցին՝ Գագիկ Ծառուկյանի հետ քննարկվե՞լ է նրա վերադարձի հարցը, ի՞նչ կարծիք ունի նա այդ կապակցությամբ, Վահե Էնֆիաջյանը պատասխանեց. «ԲՀԿ ղեկավար կազմը շարունակում է գործել իր աշխատանքային օրակարգով, առջևում ՏԻՄ ընտրություններն են, որոնց ԲՀԿ-ն լրջագույնս է պատրաստվել և վստահ եմ ՝ լուրջ հաջողություններ է արձանագրելու: Վերջին երկու տարիներին բազմիցս անդրադարձել եմ նմանօրինակ հարցերին և կկրկնվեմ` պրն. Գագիկ Ծառուկյանն ինքն է մշտապես որոշում տեղեկատվություն տարածել իր իսկ անձնական քայլերի և որոշումների մասին: Ուստի, ինչ կարծիք ունի պրն. Ծառուկյանն իր վերադարձի կապակցությամբ, փորձեք ճշտել անձամբ իրենից կամ իր խոսնակ Իվետա Տոնոյանից: Կարող եմ ասել, թե ինչ կարծիք ունի ժողովուրդն ու անձամբ ես. համացանցում առկա տեսագրությունն ակնհայտ բնորոշում է, թե որքանով է ժողովուրդը ցանկանում վերջինիս վերադարձը, իմ անձնական կարծիքը միշտ եմ բարձրաձայնել, որ Գագիկ Ծառուկյանի վերադարձն ունի հասարակական մեծ պահանջարկ և այն արդարացված է: Այո՛, Ծառուկյանի վերադարձը ժողովրդի կողմից սպասված է»:

Նրա վերադարձի դեպքում ինչո՞վ է զբաղվելու Նաիրա Զոհրաբյանը՝ հարցին Էնֆիաջյանը պատասխանեց, որ եթե նման իրավիճակ լինի՝իրենք միասնական կգտնեն իրավիճակի լավագույն լուծումը:

Էնֆիաջյանից հետաքրքրվեցինք նաեւ թե ե՞րբ է հրավիրվելու ԲՀԿ-ի համագումարը: Ի պատասխան նա նշեց, որ հստակ օր դեռևս հայտնի չէ, որոշակի հստակեցումներ լինելուց հետո կտեղեկացնեն:

«Քաղաքականությունում երբեք և ոչինչ չի կարելի բացառել»,- Էնֆիաջյանն այսպես պատասխանեց «հնարավո՞ր է համագումարին հայտարարվի Ծառուկյանի վերադարձի մասին» մեր հարցին:

Ծառուկյանի մամուլի խոսնակ Իվետա Տոնոյանից հետաաքրքրվեցինք՝ Ծառուկյանը քննարկո՞ւմ է ԲՀԿ-ն առաջիկայում ղեկավարելու եւ 2017-ի խորհրդարանական ընտրություններին իր մասնակցության հնարավորությունը.

«Քանի որ սա այն հարցն է, որը խիստ կարեւոր է, կարծում եմ, երբ որ Գագիկ Ծառուկյանը ունենա ասելիք՝ անպայման ինքը կխոսի անձամբ եւ ոչ թե միջնորդավորված՝ իմ միջոցով... Այս պահի դրությամբ որեւէ նոր հայտարարություն քաղաքականություն վերադառնալու մասին չկա»: 

Հիշեցնենք, Գագիկ Ծառուկյանը քաղաքականությունից այն բանից հետո, երբ 2015 թվականի փետրվարին Սերժ Սարգսյանը նրան «չարիք» անվանեց՝ հորդորելով վարչապետին ստուգումներ անցկացնել «գողացված միլիարդները» բարեգործության անվան տակ քողարկելու լուրերի առնչությամբ։

Ի վերջո Գագիկ Ծառուկյանը հայտարարեց, թե հեռանում է քաղաքականությունից՝ հրաժարվելով նաև ԲՀԿ-ի ղեկավարի պաշտոնից: