Որդու մահվանից հետո Վարդեւան Գրիգորյանը դուրս չի գա ընտրապայքարից

Հոկտեմբերի 2-ին կայանալիք ընտրություններում Գյումրու քաղաքապետի ԲՀԿ-ական թեկնածու Վարդեւան Գրիգորյանի որդու՝ Արշակ Գրիգորյանի առեղծվածային մահվանից հետո խոսակցություններ են շրջանառվում, որ հնարավոր է Գրիգորյանը դուրս գա ընտրապայքարից:

Այսօր, երբ armtimes.com-ը ԱԺ ԲՀԿ խմբակցության քարտուղար Վահե Էնֆիաջյանից հետաքրքրվեց՝ հնարավո ՞ր է Գրիգորյանը ինքնաբացարկ հայտնի՝ նա պատասխանեց.

«Քիչ առաջ մենք «Բարգավաճ Հայաստան» կուսակցության Գյումրու տարածքային կազմակերպության ներկայացուցիչների հետ արտահերթ խորհրդակցություն անցկացրեցինք, որի ընթացքում քննարկվեց սեպտեմբերի 20-ին տեղի ունեցած միջադեպից հետո ԲՀԿ-ի՝ Գյումրու ավագանու ընտրություններին մասնակցության հարցը: Միաձայն որոշում կայացվեց մասնակցել հոկտեմբերի 2-ին սպասվող Գյումրու ավագանու եւ քաղաքապետի ընտրություններին եւ պայքարը շարունակել»:

Վերջինիս մի քանի հարց ուղղեցինք.

- Պարոն Էնֆիաջյան, դա արդյո՞ք նշանակում է, որ Գյումրու քաղաքապետի ԲՀԿ թեկնածուն կմնա  Վարդեւան Գրիգորյանը:  

- Այո:

- Արշակ Գրիգորյանի մահվանից հետո դուք հայտարարել էիք, որ աջլիկ մարդը ձախ ձեռքով ինքն իրեն չէր կարող կրակել: Ձեր այդ հայտարարությունը մնո ՞ւմ է ուժի մեջ: Դա արդյո ՞ք նշանակում է, որ դուք կասկածներ ունեք, թե տեղի ունեցածն ինքնասպանություն է, ինչպես ներկայացնում են իրավապահ մարմինները:

- Պարզ է, որ հրազենային վնասվածքը ստացել է ձախ կողմից, իսկ նա աջլիկ է: Ես մի շարք հանգամանքներ եմ բարձրաձայնել բացի ձախլիկ եւ աջլիկ լինելուց: Ես ասել եմ, որ որեւիցե գրություն չկա ինքնասպանության ցանկության, դրդապատճառների մասին: Մարդն առողջ, սոցիալական, կենսական, կենցաղի հետ կապված որեւիցե խնդիր չի ունեցել, անձնական փոխհարաբերություններում որեւիցե խնդիր չի ունեցել, հայրը վաղը, մյուս օրը քաղաքապետ դառնալու բոլոր շանսերն ունի, ընտանիքում բոլորը ողջ-առողջ են, ներդաշնակ մթնոլորտ է, ինչո ՞ւ պետք  է նման քայլի գնար:

- Իսկ այդ դեպքում ի ՞նչ տարբերակ է քննարկվում. արդյո ՞ք նկատի ունեք, որ քաղաքական է դրդապատճառը:

- Ես ժամանակավրեպ եմ համարում դեպքից 24 ժամ դեռ չանցած նման հայտարարություն անելը: Նման հայտարարությունը պետք է հիմնված լինի համապատասխան փաստերի կամ փորձագիտական տեղեկանքների վրա, որպեսզի թե՛ մեր, թե՛ հարազատ-բարեկամների համար հասկանալի լինի՝ ոնց է նման գնահատական տրվում:

- Զառերով հայտնի պաստառը որեւէ կապ ունե ՞ր տեղի ունեցածի հետ, ձեզ ինչ-որ բան հայտնի՞ է:

- Չէ, բայց, որ իր հարազատների մոտ դա վրդովմունք է առաջացրել եւ խնդրի հետ կապված խոսակցություն է տեղի ունեցել, դա փաստ է:

- Պաստառի հետ կապվա ՞ծ:

- Պաստառի ու որդեգրած քաղաքականության հետ կապված:

- Այսինքն, այդ պաստառում իրո՞ք Գրիգորյանին ուղղված նախազգուշացում է եղել կամ որեւէ ակնարկ, որից վրդովվել են նրա հարազատները:

- Քարոզչական ժամանակահատված է, քարոզչական ժամանակահատվածում կան գործիչներ, որոնք իրենց անելիքների մասին են խոսում, իսկ որոշներն էլ փորձում են ուրիշների վրա ստվեր գցել: Մեր համար անընդունելի է երկրորդ տարբերակը եւ ընդունելի է այն ճանապարհը, որ քաղաքական գործիչները, տվյալ դեպքում ավագանու անդամի թեկնածուները, քաղաքապետի թեկնածուները ներկայացնում են իրենց ծրագրերը, իրենց մոտեցումները հետագա աշխատանքները կատարելու առումով: Սա է ճիշտ ճանապարհը, բարոյական ճանապարհը, քաղաքակիրթ ճանապարհը:

- Իմ հարցն այն մասին էր, թե արդյքո ՞ք այդ պաստառով ինչ-որ բան ուզեցել են հասկացնել Գրիգորյանին եւ դա որքանո ՞վ կարող է կապ ունենալ նրա որդու մահվան հետ:

- Ես նման մանրամասների չեմ տիրապետում՝ ում ինչ են ուզեցել հասկացնել…Ստեղծված իրավիճակը, մամուլի հրապարակումները ինձ հիմք տվեցին այդ ամենի մասին խոսել:

Հիշեցնենք, որ Գյումրու քաղաքապետի ԲՀԿ-ական թեկնածու Վարդեւան Գրիգորյանի որդին՝ Արշակ Գրիգորյանը սեպտեմբերի 20-ին գլխի շրջանում ստացած հրազենային վնասվածքով տեղափոխվել էր հիվանդանոց, սակայն նրա ստացած վնասվածքը անհամատեղելի էր եղել կյանքի հետ: Ոստիկանությունից հայտնել էին, որ Գրիգորյանը հայտնաբերվել է իրենց տան նկուղում։ Նկուղից հայտնաբերվել էր նաեւ ատրճանակ: Քննչական կոմիտեում քրգործ էր հարուցվել «ինքնասպանության հասցնելը» հոդվածի հատկանիշներով:

Ավելի ուշ, տեղեկություններ տարածվեցին, որ Գյումրու կենտրոնական փողոցներից մեկից հեռացնում են մի գովազդային պաստառ, որի վրա զառեր են պատկերված: Խոսակցություններ տարածվեցին, որ այդ պաստառով Վարդեւան Գրիգորյանին փորձել են հիշեցնել մոլախաղերի հանդեպ նրա երբեմնի հակվածության մասին: Երեկ ՀՀԿ-ական պատգամավոր Սուքիաս Ավետիսյանը մեզ հետ զրույցում հայտնեց, որ պաստառը տեղադրել էր Գյումրիում կայանալիք առաջիկա ընտրություններում քաղաքապետի ՀՀԿ-ի թեկնածու Բալասանյանի շտաբը: 

Ի դեպ, ՀՀ քննչական կոմիտեն այսօր նոր մանրամասներ է հայտնել Արշակ Գրիգորյանի մահվան հանգամանքների մասին:

Տարածված հաղորդագրությունում նշվում է, նախնական քննության տվյալներով՝ 1990թ. ծնված Արշակ Գրիգորյանը 2016թ. սեպտեմբերի 20-ին՝ ժամը 12:30-ից 13:00-ն ընկած ժամանակահատվածում, իրենց տան նկուղում  ինքնասպանություն  է գործել ապօրինի կերպով ձեռք բերված «Մակարով» տեսակի «ԼԱ 1948 Ր» գործարանային համարի ատրճանակից: Դեպքի վայրի զննությամբ հայտնաբերվել է «Մակարով» տեսակի ատրճանակը՝ լիցքավորված փամփուշտներով, 1 պարկուճ և 1 գնդակ։

«Որոշում է կայացվել Արշակ Գրիգորյանին տուժող ճանաչելու մասին: Կատարվել է դիակի զննություն, ըստ որի՝ դիակի աջ և ձախ քունքային շրջանում հայտնաբերվել են վերքեր, որոնցից աջ քունքային վնասվածքը, ըստ մասնագետների, մուտքային է, իսկ ձախ քունքային շրջանի վերքը` ելքային: Առգրավվել են տուժածի, ինչպես նաև՝ նրա դիակը հայտնաբերած հարազատի հագուստները, վերցվել են անհրաժեշտ փորձանմուշներ:

Քրեական գործով էական նշանակություն ունեցող հանգամանքները պարզելու համար նշանակվել են մի շարք փորձաքննություններ, որոնց թվում՝ դատաբժշկական, դատամատնադրոշմային, դատակենսաբանական:

Հարցաքննվել են մի շարք անձինք, որոնց թվում՝ տուժածի մերձավոր ազգականները, հարազատները, ընկերները։ Օպերատիվ-որոնողական միջոցառումներ իրականացնելու վերաբերյալ հանձնարարություն է տրվել ոստիկանության համապատասխան ստորաբաժանումներին։

Նախաքննության ընթացքում պարզվել է, որ տարածքում առկա են տեսանկարահանող սարքեր, որոնց տեսագրություններն առգրավվել են, և նշանակվել է տեսաձայնագրային փորձաքննություն։

Ա.Գրիգորյանի ինքնասպանության դեպքի առթիվ ՀՀ քրեական օրենսգրքի 110-րդ հոդվածի 1-ին և 235-րդ հոդվածի 1-ին մասերով հարուցված քրեական գործի նախաքննությունը շարունակվում է»,- տեղեկացնում  են քննչական կոմիտեից։