Շփման գծում լարված է

Ապրիլի 24-ի նախաշեմին  հայ-ադրբեջանական սահմանը կրկին լարված է: Հակառակորդը շարունակում է խախտել հրադադարի ռեժիմը՝ կրակոցներ արձակելով  ոչ միայն դիրքապահների, այլ նաեւ գյուղերի ուղղությամբ:

Երեկ ԼՂՀ պաշտպանության նախարարության մամուլի ծառայությունը հաղորդագրություն տարածեց՝ նշելով, որ Պաշտպանության բանակի օպերատիվ տվյալների համաձայն, ապրիլի 22-ի լույս 23-ի գիշերը ղարաբաղա-ադրբեջանական հակամարտ զորքերի շփման գծի ողջ երկայնքով հակառակորդի կողմից հրադադարի պահպանման ռեժիմը խախտվել է շուրջ 150 անգամ, որի ընթացքում, տարբեր տրամաչափի հրաձգային զինատեսակներից, հայ դիրքապահների ուղղությամբ արձակվել է ավելի քան 1800 կրակոց: «Հատկապես ինտենսիվ խախտումներ են արձանագրվել շփման գծի հարավարեւելյան եւ արեւելյան ուղղություններով, որոնց ընթացքում հակառակորդը կիրառել է տարբեր տիպի նռնականետեր եւ 60 մմ ականանետեր: ՊԲ առաջապահ ուժերի պատասխան գործողությունների արդյունքում՝ հակառակորդի դրսեւորած ակտիվությունը կասեցվել է»,- նշվում է հաղորդագրությունում:

Մեզ հետ զրույցում երեկ ԼՂՀ նախագահի մամուլի խոսնակ Դավիթ Բաբայանը, անդրադառնալով սահմանում տիրող լարվածությանը, ասաց. «Մենք արդեն հինգ-վեց տարի է, ինչ հայտարարում ենք, որ Ադրբեջանը ահաբեկչական պետություն է դառնում՝ նացիստական, ֆաշիստական: Սկզբում դա, երեւի, ոմանք դիտարկում էին որպես հռետորաբանություն, բայց հիմա տեսնում են, որ իրավացի ենք: Հիմա նրանք կատարում են այսպիսի քայլեր: Հակառակորդը իրենց խախտումների որակը փոխել է:  Եթե նախկինում սահմանի երկայնքով ինչ-որ դիպուկահարներ էին կրակում, հիմա նրանք անցել են ահաբեկչության: Այսինքն՝ մտնում են, փորձում են ինչ-որ բաներ անել, իհարկե՝ ետ են շպրտվում, կորուստներ տալիս: Բայց ահաբեկիչները պարզ ձեւով շարունակելու են իրենց քաղաքականությունը: Երբ հայության կյանքում լինում են կարեւոր իրադարձություններ, նրանք անպայման փորձում են ինչ-որ վատություն անել: Հիմա համայն հայությունը եւ քաղաքակիրթ մարդկությունը ոգեկոչելու է Ցեղասպանության 100-րդ տարելիցը,  բնական է, որ այս ժամանակահատվածում իրենք պետք է «յուրովի մասնակցեն» այդ գործընթացին՝ շարունակելով իրենց ցեղասպան, ահաբեկչական քաղաքականությունը»: Բաբայանի խոսքով, միջազգային հանրությունը իր դիրքորոշումը պետք է  ավելի կոշտ հայտնի. «Դժբախտաբար՝ միջազգային հանրության համեմատաբար պասիվ կեցվածքի շնորհիվ է նրանց կերպարանափոխությունը դեպի նացիզմ: 2015 թվականին նրանք տասնյակ զոհեր են տվել, եթե ոչ հարյուրավոր, բայց շարունակում են, որովհետեւ իշխող կլանի համար այդ մարդկանց զոհերը որեւէ նշանակություն չունեն, կարեւորը՝ դիվիդենտեր շահեն, հաճույք ստանան իրենց վատություններից»,- նշեց Բաբայանը:

Մեր հարցին ի պատասխան՝ ԼՂՀ նախագահի մամուլի խոսնակն ասաց, որ սպասում են, որ այսօր ավելի լարված կլինի սահմանին, միեւնույն ժամանակ փաստելով, որ որեւէ խուճապ չկա, ընդհակառակը՝ այս օրերին, ըստ նրա, ցանկացած խախտում պատժվելու է: «Սպասում ենք, որ վաղը լարված կլինի, բայց կարծում ենք, որ կվախենան այս օրերին ինչ-որ բան անել՝ հասկանալով, թե ինչպիսի պատասխան կստանան: Մենք ամեն ձեւով պատժելու ենք ցանկացած ցեղասպան գործունեություն»,- եզրափակեց Դավիթ Բաբայանը:

Ռազմագետ Սերգեյ Մինասյան էլ ասաց, որ կանխատեսելի էր, որ հակառակորդը փորձելու է ապրիլի 24-ին ակտիվություն ցուցաբերել շփման գծում: «Այս երկու օրվա ընթացքում այդքան էլ չհաջողվեց նրանց ինչ-որ բան անել, թեպետ վնասել էին զինվորական մեքենա, բայց հայկական կողմը կորուստներ չի ունեցել: Դժվար է պատկերացնել, թե այդ գործողություններով ինչի կարող է հասնել, բացի նրանից, որ պահպանում է արհեստական լարվածություն շփման գծում: Այս պահին ՀՀ եւ ԼՂՀ սահմանում մարտական իրավիճակ է, եւ բնականաբար՝ ադրբեջանցիք փորձելու են ինչ-որ քայլերի դիմել»,-ասաց Մինասյանը:

ՀՀ սահմանին նույնպես իրավիճակը լարված է. հակառակորդը կրակում է թե՛ դիրքերի եւ թե՛  գյուղերի ուղղությամբ: Այս մասին մեզ հետ զրույցում ասաց ՀՀ պաշտպանության նախարարի մամուլի խոսնակ Արծրուն Հովհաննիսյանը: «Ճիշտ է՝ լարվածություն կա, բայց շատ չի, երեկ գիշերը (նախօրեին) հակառակորդը կրակել է դիրքերի, գյուղերի ուղղությամբ, բայց զոհեր, տուժածներ չկան, հետեւանքներ չունենք»,- ասաց խոսնակը:

Նախօրեին ադրբեջանական կողմը կրակոցներ է արձակել Տավուշի մարզի սահմանամերձ Մովսես գյուղի ուղղությամբ: Մեզ հետ զրույցում գյուղապետ Արարատ Ավալյանն ասաց, որ նախօրեին հակառակորդը կրակոցներ է արձակել ժամը 17:40-ին, դրանք տեւել են մոտ տասը րոպե, դրանից հետո կրակել են նաեւ գիշերը, սակայն՝ ոչ ինտենսիվ: «Այսօր (երեկ) արդեն կրակոցներ չկան, խաղաղ է, եղանակային պայմաններն էլ վատն են: Լարվածություն կա, բայց կրակոցներ այս պահի դրությամբ՝ ոչ»,- ասաց Ավալյանը:

Տավուշի մարզի սահամանամերձ Չինարիի գյուղապետ Սամվել Սողոյանն էլ ասաց, որ եղանակային պայմանները վատ են, դրա համար էլ հակառակորդը լուռ է. «Բայց նախորդ օրերին կրակում էին, ոչ ինտենսիվ: Մեր բանակը կանգնած է, ուժեղացված ծառայություն է, ոչ մի բան էլ չի լինի»,- եզրափակեց գյուղապետը: