Կիսատ-պռատ շարադրություն

Երեւանի նախկին քաղաքապետ, Հայ ազգային կոնգրեսի անդամ Վահագն Խաչատրյանը մեզ հետ զրույցում ասաց, որ կառավարության ծրագիրը կիսատ-պռատ խոստումների եւ դեկլարատիվ հայտարարությունների ամբողջություն է: «Կառավարության ծրագրի հետ ծանոթանալուց հետո այն տրամադրությունը չի առաջանում, որ Հայաստանն առաջիկա հինգ տարիներին կդառնա մի երեւելի երկիր, որտեղ ցանկալի կլինի ներդրումներ կատարել ու զբաղվել բիզնեսի զարգացմամբ»,- ասաց Խաչատրյանը: Վերջինիս գնահատմամբ, այս ծրագրով կառավարությունը ոչ մի լուրջ խնդրի լուծում չի առաջարկում: Ավելին, ՀՀ իշխանությունները փաստում են, որ մտադիր չեն փոխել վերջին տարիներին իրենց վարած քաղաքականությունը: «Նույն քաղաքականությունը, որը վարում էին նախորդ տարիներին, շարունակվում է նաեւ այս ծրագրում»,- ասում է Վահագն Խաչատրյանը: Իսկ ծրագրի այն հատվածը, որտեղ ներկայացված են ռիսկերը, ըստ Երեւանի նախկին քաղաքապետի, կառավարությունը հատուկ է ընդգրկել, որպեսզի հետագայում արդարանալու հնարավորություն ունենա եւ կարողանա ասել, թե, իբր, խոստումների չիրականացման մեղավորը ոչ թե գործադիրն է, այլ աշխարհում տեղի ունեցող գործընթացները: «Նախորդ` 2008-2012 թվականների ծրագիրը կազմելիս, երբ 2008 թվականին Սերժ Սարգսյանն իշխանությունը զավթեց, միջազգային տնտեսական ճգնաժամի նշույլներն արդեն կային, բայց դրա մասին Հայաստանի իշխանությունները չէին խոսում: Այն ժամանակ հեքիաթային մի ծրագիր ներկայացրեցին, որով խոստանում էին աշխատավարձերի եւ կենսաթոշակների բարձրացում, աղքատության կրճատում եւ այլն: Բայց այդ ծրագիրն այդպես էլ իրականություն չդարձավ: Հիմա փորձում են իրենց ապահովագրել միջազգային ռիսկերով: Նույնիսկ կիսատ-պռատ, ոչ ամբողջական գրած խոստումները ռիսկային են»,- նկատեց Վահագն Խաչատրյանը: Վերջինս, որպես կառավարության լավ ծրագրի օրինակ մատնանշեց Հայ ազգային կոնգրեսի նախընտրական ծրագիրը: «Կառավարության ծրագիրը մի կարեւոր խնդիր պետք է լուծի, եւ մեր ծրագրի իմաստը հենց դա էր. Հայաստանի Հանրապետության քաղաքացու, բիզնեսմենի մեջ անհրաժեշտ է վստահություն առաջացնել, որ Հայաստանում եւ անձնական կյանքում օրենքի գերակայությունը դառնում է առաջնային: Այսինքն, տնտեսավարող սուբյեկտները, քաղաքացիները պետք է համոզվեն, որ իրենց հարաբերություններում կարեւորվելու են օրենքները եւ դրանց հավասար կիրառումը»,- պարզաբանեց Երեւանի նախկին քաղաքապետը: Վերջինիս կարծիքով, կառավարության ծրագրի հիմքում պետք է լինի ազատ մարդը, ինչը կառավարության այս ծրագրում չկա: Իսկ եթե ազատ մարդ չկա, ապա ազատ տնտեսություն եւս չի կարող լինել: Ըստ Խաչատրյանի, այն, որ այս ծրագրում ազատ մարդու հետքն անգամ չի երեւում, ամենեւին էլ պատահական չէ, քանի որ ներկայիս իշխանական համակարգի հիմքը կոռուպցիան է: «Նույնիսկ, եթե ինչ-որ բան են առաջարկում, դա անում են մի տեսակ վախվորած եւ կիսատ-պռատ վիճակով: Ծրագիրը կարող էր երկու-երեք էջից բաղկացած լինել, բայց ավելի հագեցած բովանդակություն ունենար, քան` ներկայացված 48 էջը»,- ասաց Վահագն Խաչատրյանը:

«Ժողովրդի իշխանություն» քաղաքական նախաձեռնության անդամ, տնտեսագետ Մովսես Արիստակեսյանն էլ կառավարության ծրագիրը համեմատեց բարի ցանկությունների մասին շարադրության հետ: Սակայն, ըստ նրա, «շարադրությունում» նշված չեն եւ բացակայում են այն մեխանիզմները, որոնց շնորհիվ հնարավոր կլիներ այդ բարի ցանկությունները կյանքի կոչել եւ իրականացնել: Արիստակեսյանի կարծիքով, ներկայացված ծրագիրը զիջում է անգամ նույն կառավարության նախորդ ծրագրին, որը ներկայացվել էր 2008-ին: Նախորդ ծրագրով կառավարությունը խոստացել էր 8-10 տոկոս տնտեսական աճ, այժմ խոստանում է` 5-7 տոկոս: Չնայած խոստումների մակարդակը իջեցվել է, բայց միեւնույն է` Մովսես Արիստակեսյանը չի հավատում, որ ներկա իշխանություններն ի վիճակի են իրենց ներկայացրած խոստումներն իրագործել: