Թերհավաքագրում, աշխատավարձի բարձրացում, չեղած ավտոկայանատեղիները դարձան վճարովի. հաստատվեց Գյումրու բյուջեն

Գյումրու ավագանին տարին փակում է 2025-ի հաստատված բյուջեով, քաղաքում կուտակված բազմաթիվ խնդիրներով, հիմնահարցերից ոչ մեկը չլուծած, անքաղաքապետ ու իրար հետ պարզ հաղորդակցության եզրեր չգտնող խմբակցությունների՝ միմյանց ուղղված ակնարկ-խրատ-պատգամներով:

Լավով-վատով քաղաքական և իրավական խառը իրադարձություններով մեկնարկած տարին ավարտվում է:

Նախքան օրակարգին անցնելը՝ Գյումրու քաղաքապետի պարտականությունները կատարող Վարդան Ղուկասյանի փոխքաղաքապետ փեսան՝ Ավետիս Առաքելյանը, հրատապության կարգով ավագանուն առաջարկեց քննարկել ու քվեարկել «Մեր քաղաքը» խմբակցության առաջարկը և համայնքի բյուջեի տնտեսված միջոցներից շուրջ 15 մլն դրամն ուղղել համայնքային ենթակայության 5 մանկապարտեզի՝ հրատապ լուծում պահանջող խնդիրների լուծմանը:

Խմբակցության ղեկավարն ասաց՝ մանկապարտեզները կշարունակեն մնալ իրենց ուշադրության կենտրոնում:

15 մլն դրամի շրջանակներում «Անի» մսուր-մանկապարտեզում ջրագիծը կնորոգվի, «Կարմիր գլխարկ»-ը նորոգված տանիքի ու ներքին հարդարում կունենա, «Արձագանք»-ը՝ սանհանգույց, «Էյլիթիա»-ն կցանկապատվի, որպեսզի երեխաներն ու թափառող շները միմյանցից հնարավորինս տարանջատվեն, մանկապարտեզի բակը դառնա անվտանգ, նորոգված տանիք կունենա նաև «Հենզել Գրետել» մսուր-մանկապարտեզը:

Միաձայն քվեարկությանը հաջորդեց ավագանու «Քաղաքացիական պայմանագիր» խմբակցության՝ 2026 թվականին համայնքային ենթակայության բոլոր մանկապարտեզներն անվճար դարձնելու առաջարկը:

Այս առաջարկի պահին դահլիճից հնչած ռեպլիկը թեժացրեց նիստի ընթացքը:

«Քաղաքացիական պայմանագիր» խմբակցության քարտուղար Քնարիկ Հարությունյանը նկատեց՝ ովքեր ՏԻմ օրենքներից անտեղյակ են, բայց դահլիճում են որպես ավագանու անդամ, ճիշտ կանեն՝ ուսումնասիրեն օրենքները, տիրապետեն դրանց և տեղից անհարկի չմիջամտեն այսուհետև:

«Ի վերջո, կրթվելը նորաձև է»,- ասաց Հարությունյանը՝ մանրամասնելով. «Կառավարությունը հաջորդ տարի 437 մլն դրամ ավել դոտացիա կտրամադրի Գյումրուն, ինչը թույլ կտա լիարժեք իրականացնել առաջարկը: Ներկա պահին մանկապարտեզ հաճախող 2500 երեխայից գանձվող վարձավճարի ընդհանուր չափը տարեկան 120 մլն դրամ է: Արդյունքում կունենանք մանկապարտեզ հաճախող շատ երեխաներ, հատկապես խոցելի խմբերի ընտանիքների երեխաներին այս կարևոր օղակում ընդգրկվելու, նախադպրոցական կրթությունը հասանելի դարձնելու հնարավորություն կստեղծվի»:

Ավետիս Առաքելյանն ասաց՝ հարցը կքննարկեն հետագայում:

Նույն լարված ընթացքը պահպանվեց նաև հաջորդ Գյումրու վարչական տարածքում տեղական տուրքերի և վճարների 2026 թվականի տեսակները և դրույքաչափերը հաստատելու մասին հարցի քննարկման ժամանակ: Այս երկար անվանմամբ նախագիծն իրականում ասում է Գյումրիում ավտոկայանատեղիները դարձնել վճարովի, մեկ մեքենայի կայանման համար սահմանել 200 դրամ վճար:

Հարությունյանը հիշեցրեց՝ վատ նախադեպ կա, երբ հատկացվել է ավտոկայանատեղի կազմակերպելու համար տարածք, այն տնօրինողն ուղիղ իմաստով է դա հասկացել, մետաղական և այլ տարրերով փողոցի այդ հատվածը առանձնացրել է՝ խոչընդոտելով երթևեկությունը:

ՔՊ խմբակցության անդամ Վահագն Մկրտչյանն այլ ընդգծում արեց․ այս հարցի դրական ելքի դեպքում գյումրեցու ուսերին նոր ֆինանսական բեռ է դնում նախագծի հեղինակը:

Դիմելով Ավետիս Առաքելյանին՝ Մկրտչյանը փաստեց. «Բազմիցս ձեր քաղաքական ուժը տարբեր հարթակներում ասում է՝ Գյումրին անապահով քաղաք է, հիմա ինչքանո՞վ եք ճիշտ համարում Գյումրու ավտոկայանատեղինը դարձնել վճարովի, այն էլ այն պարագայում, որ միայն քաղաքի փոքր միջուկն է Կառավարության միջոցներով ասֆալտապատ, Գյումրու մյուս փողոցներում անգամ հին ասֆալտածածկ չկա: Չե՞ք համարում, որ ժամանակին չեք բերել այս նախագիծը, սրա մասին կարելի էր խոսել մի քանի տարի հետո»:

Ավետիս Առաքելյանն ասաց՝ նախագիծը ընդունելուց հետո այն չեն կիրառելու, այսինքն՝ հունվարից գյումրեցիները պարտավոր չեն հենց մեքենան կանգնի, 200 դրամը վճարել: Սա հետոյի համար է, որ փողոցաշինական աշխատանքներում նկատի ունենան, դրանք նախագծվեն՝ հաշվի առնելով ավտոկայանատեղիի առկայությունը նաև:

Մկրտչյանը հակադարձեց՝ եթե չեն կիրառելու, ինչո՞ւ ենք քննարկում, ընդունում: Հատկապես այն պարագայում, երբ դեռ հայտնի էլ չէ, թե քաղաքի որ հատվածներում և ինչպես են այդ ավտոկայանատեղիները կազմակերպվելու, ովքեր ու ինչ տարբերակով են գանձումներն իրականացնելու, և ամենակարևորը, ով է իրականացնելու գործընթացի վերահսկողությունն ու բացառելու կոռուպցիոն ռիսկերը:

«Դուք, այս նախագիծը բերելով, հնարավորություն եք տալիս, որ վաղը մի բիզնեսմեն գա ու, օրինակ, Վարդանանց հրապարակում ասի՝ էս տարածքը ես կվերցնեմ: Բոլորս գիտենք՝ այնտեղ կայանելը ինչքան բարդ է, տեղ չկա կանգնելու, էդտեղ շահութաբերության խնդիր չկա, ցանկացած բիզնեսմեն, վստահ եմ, առաջինը կգա և կենտրոնական հատվածը կվերցնի, բայց դուք արդյոք վստա՞հ եք, որ գյումրեցին պատրաստ է վճարովի այդ ծառայությանը․ հարցը գյումրեցիներին հավելյալ բեռի տակ չգցելն է»,- ասաց Մկրտչյանը:

Օրակարգից հանվեց ավտոկայանատեղիների կազմակերպման հարցը, սակայն այդ չեղած ավտոկայանատեղիների համար գանձվող գումարի չափի վերաբերյալ նախագիծը դրվեց քվեարկության: ՔՊ-ն դեմ քվեարկեց:

Նույն մթնոլորտում ընթացավ նաև բյուջեի քննարկումը: 2026-ի Գյումրու բյուջեի եկամտային մասը 7 մլրդ 582 մլն դրամ է, նույնքան էլ՝ ծախսայինը: Ի թիվս այլ անելիքների՝ զեկուցվեց, որ կառույցում մինչև 20 տոկոսի աշխատավարձերի բարձրացում է սպասվում:

Ի՞նչ միջոցներով է դա արվելու, եթե բյուջեն այս պահի դրությամբ թերակատարված է մոտ 400 մլն դրամով և այդ ֆոնին 452 մլն դրամով ավելի կանխատեսվում է արվել հաջորդ տարվա համար: Ասվեց, որ դեռ աշխատանքային 8 օր կա, կհասցնեն հարկերի 90 տոկոսից ավելին հավաքագրել:

«Քաղաքացիական պայմանագիր» խմբակցությունը հարցին դեմ քվեարկեց, Գյումրու բյուջեն 18 կողմ ձայնով ընդունվեց: