Թրամփի վարչակազմը բացահայտել է՝ ինչ շահ ունի ԱՄՆ-ն ուկրաինական հակամարտության լուծմամբ. ինչ է առաջարկվել Կիևին

Թրամփի վարչակազմն առաջարկել է Միացյալ Նահանգներին տրամադրել Ուկրաինայի հազվագյուտ հողային մետաղների 50 տոկոսը, հայտնում է NBC News-ը։ Փոխարենը՝ պաշտպանության համար ԱՄՆ-ը պատրաստ է Ուկրաինայում զորքեր տեղակայել հակամարտության ավարտից հետո։ Զելենսկին հրաժարվել է այս համաձայնագրից։

Թրամփի վարչակազմը նշել է, որ ամերիկյան զորքերը կարող են տեղակայվել հանքարդյունաբերության աշխատանքներն անվտանգ ապահովելու համար, եթե Ռուսաստանի հետ խաղաղության համաձայնագիր ձեռք բերվի, NBC-ին հայտնել են աղբյուրները:

ԱՄՆ չորս պաշտոնյա հաստատել է Թրամփի վարչակազմի առաջարկն ու պլանը։ Նշվել է, որ պատրաստ են ամերիկյան զորքեր տեղակայել դրանք պաշտպանելու համար, եթե Ռուսաստանի հետ հակամարտության դադարեցման մասին համաձայնություն ձեռք բերվի:

Գույքի փոխանցման պայմանագիրը Ուկրաինայի համար միջոց կլինի ԱՄՆ-ին փոխհատուցելու միլիարդավոր դոլարների զենքի և օգնության համար, որը երկիրը տրամադրել է Կիևին 2022 թվականի փետրվարից՝ հակամարտության սկսվելուց ի վեր, ասել են վարչակազմի պաշտոնյաները:

Առաջարկն ու փաստաթուղթը Կիև է հասցրել ԱՄՆ-ի ֆինանսների նախարարը

ԱՄՆ ֆինանսների նախարար Սքոթ Բեսենթը համաձայնագրի նախագիծ է ներկայացրել նախագահ Վլադիմիր Զելենսկիին չորեքշաբթի օրը Կիևում տեղի ունեցած հանդիպման ժամանակ։ Այն պարունակել է առաջարկ՝ փոխանցել ԱՄՆ-ին Ուկրաինայի հազվագյուտ հողային մետաղների ուղիղ կեսի նկատմամբ սեփականության իրավունք։

Հանդիպումից հետո Բեսենթն ասել է, որ հազվագյուտ հողային մետաղների մասին ԱՄՆ-ի և Ուկրաինայի համաձայնագրի նախագիծը համահունչ է նախագահի նպատակին, սակայն նա չի ներկայացրել վարչակազմի առաջարկի մանրամասները:

Զելենսկին հրաժարվել է ստորագրել Բեսենթի առաջարկած փաստաթուղթը, ըստ հանդիպման մասին տեղեկացված ամերիկացի ութ պաշտոնյաների հավաստման։ Նա նշել է, որ անհրաժեշտ է ուսումնասիրել այն և ստանալ անհրաժեշտ խորհրդատվություն։

Ուրբաթ օրը՝ փետրվարի 14-ին, Վաշինգտոնում Ուկրաինայի դեսպանատունը և ԱՄՆ Ազգային անվտանգության խորհրդի խոսնակը թեմայի առնչությամբ մեկնաբանություններ տալու հարցումներեն ստացել լրատվամիջոցներից և բոլոր հարցումները թողել անպատասխան:

Զելենսկին նույն օրը  անվտանգության համաժողովի ժամանակ իր ելույթում ասել է, որ իր փաստաբանները կվերանայեն Բեսենթի բերած փաստաթուղթը և առաջարկություններ ու որոշ փոփոխություններ կանեն։ Նա առաջարկն անվանել է հուշագիր ԱՄՆ-ի և Ուկրաինայի միջև, այլ ոչ թե անվտանգության համաձայնագիր:

«Որտեղ է թաքնված շան գլուխը» կամ ինչու էր Թրամփը խիստ շահագրգռված հակամարտության լուծման հարցում

Միացյալ Նահանգների նախագահ Դոնալդ Թրամփը վերջին ամիսներին շահագրգռվածություն է հայտնել Ուկրաինայի հետ գործարք կնքելու հարցում։ Դա Միացյալ Նահանգներին հնարավորություն կտա զգալի հասանելիություն ունենալ հազվագյուտ հողային մետաղների նկատմամբ, որոնք օգտագործվում են բարձր տեխնոլոգիական արտադրության մեջ:

Fox News-ին տված վերջին հարցազրույցում Թրամփը բացահայտ ասել է՝ ցանկանում է, որ ԱՄՆ-ը ստանա 500 միլիարդ դոլարի ուկրաինական հազվագյուտ հողային մետաղներ: Նա հասկացրել է իր խոսքում, որ Կիևը «հիմնականում համաձայնել է դրան»:

այս ամիս ավելի վաղ Թրամփը Օվալաձև աշխատասենյակում լրագրողներին ասել է, որ հանքանյութերի հասանելիությունը դիտարկում է որպես «անվտանգության» ձև:

«Ես ուզում եմ ապահովել հազվագյուտ հողային տարրերի անվտանգությունը։ Մենք հարյուր միլիարդավոր դոլարներ ենք ներդնում դրանում։ Նրանք ունեն շատ հազվագյուտ երկրային մետաղներ, և ես ուզում եմ համոզվել, որ հազվագյուտ հողային տարրերն անվտանգ են ու պաշտպանված»,- ասել է Թրամփը։

Ինչ տարբերակ ունի Զելենսկին՝ գործելու առանց ամերիկյան օգնության

Ուկրաինայի հանքային հարստության մի մասը այժմգտնվում է այն տարածքներում, որոնք վերահսկվում են ռուսական ուժերի կողմից, ասել են ամերիկացի 3 պաշտոնյա: Ուկրաինացի պաշտոնյաներն էլ հավաստիացնում են, որ Զելենսկին երկար ժամանակ պաշտպանել է ԱՄՆ-ի հետագա օգնության համար «կարևոր ռեսուրսների» առևտրի գաղափարը: Նա այդ գաղափարը անվանել է «հաղթանակի պլանի» մի մաս, որը նա ներկայացրել էր Թրամփին անցյալ աշնանը կայացած հանդիպման ժամանակ:

Ուրբաթ օրը Մյունխենի անվտանգության համաժողովին տված բացառիկ հարցազրույցում Զելենսկին NBC News-ին ասել է, որ Ուկրաինայի համար «շատ, շատ դժվար» կլինի գոյատևել առանց ԱՄՆ ռազմական աջակցության:

«Ցանկացած բարդ իրավիճակից դուրս գալու հնարավորություն միշտ կա: Բայց մենք քիչ հնարավորություններ կունենանք, առանց ամերիկյան օգնության գոյատևելու քիչ հնարավորություն կա: Կարծում եմ, որ դա շատ կարևոր է, չափազանց կարևոր»,- ասել է Զելենսկին:

ԱՄՆ-ի պաշտպանության նախարար Փիթ Հեգսեթը այս շաբաթ ասել է, որ անվտանգության որևէ երաշխիքով ոչ մի դեպքում ամերիկյան զորքեր չեն տեղակայվի Ուկրաինայում։

Միացյալ Նահանգների փոխնախագահ Ջեյ Դի Վենսն էլ The Wall Street Journal-ին ասել է, որ ամերիկյան զորքեր ուղարկելը Ուկրաինա կքննարկվի այն դեպքում, եթե Ռուսաստանը չկարողանա բարեխղճորեն բանակցել խաղաղության համաձայնագրի շուրջ:

Թրամփը վաղուց վրդովված է Ուկրաինային ամերիկյան օգնության ծավալից: Հիշեցնենք՝ ընտրություններից առաջ վերջին նախընտրական միջոցառման ժամանակ Զելենսկիին Թրամփն անվանել էր «բոլոր ժամանակների մեծագույն առևտրականը»:

«Ամեն անգամ, երբ Զելենսկին գալիս է Միացյալ Նահանգներ, նա հեռանում է 100 միլիարդ դոլարով: Կարծում եմ՝ նա աշխարհի մեծագույն առևտրականն է։ Բայց եթե ես չդառնամ նախագահ, ապա մենք խրված կլինենք այս հակամարտության մեջ»,- հայտարարել էր Թրամփը: