Պարո՛ն Հակոբյան, երևի ժամանակի զգացողությունը կորցրել եք․ վեճ և Կառավարությանը հղված ուղերձ՝ Գյումրու ավագանու նիստում

Գյումրու ավագանու նիստն այսօր ընթացավ քաղաքապետ Վարդգես Սամսոնյանի բացակայությամբ։ Այն վարեց փոխքաղաքապետ Լուսինե Սանոյանը։

Ինչպես ավելի վաղ գրել էինք, տևական ժամանակ է, ինչ Գյումրու քաղաքապետ Վարդգես Սամսոնյանն աշխատանքի չի ներկայանում։ Շրջանառվող խոսակցությունների համաձայն՝ չի էլ վերադառնալու, մտադիր է աշխատանքից ազատման դիմում գրել։ Պաշտոնական ձևակերպմամբ, Սամսոնյանը ջրծաղիկ է, ունի բյուլետեն, որի ժամկետը լրանում է մայիսի 19-ին։

Օրակարգային բոլոր հարցերի քննարկումն անցավ հիմնականում բարիդրացիական մթնոլորտում։

Նվիրատվություններ հատկացվեցին համայնքային ՀՈԱԿ-ներին, ավագանին կողմ եղավ, որ 4 մլն դրամ հատկացվի և նախադպրոցական ուսումնական հաստատությունների ավարտական խմբերի և սոցիալապես անապահով ընտանիքի մինչև 1000 երեխա դպրոցը շեմի պայուսակով, գրենական պիտույքներով։

Սոցիալապես անապահով 135 անձ էլ գումար կստանա։

Օրակարգային չէր, սակայն ավագանու «Քաղաքացիական պայմանագիր» խմբակցության անդամ Լիլիթ Մուրադյանը բարձրաձայնեց, թե շշուկներ կան, որ համայնքապատկան երաժշտական և արվեստի դպրոցների շնորհալի սաներն ու ուսուցիչները դեռևս չեն ստացել իրենց պարգևատրումներն այն պարագայում, երբ այն հաստատվել է ավագանու դեռևս փետրվարին տեղի ունեցած նիստի ժամանակ։

Քաղաքապետի խորհրդական Լենա Ջիլավյանն ասաց՝ նման բան չկա, գումարը փոխանցված է։

«Ինչ ասես կարող են շշնջալ։ Փոխանցումները կատարված են, շատ հնարավոր է, որ ծնողը ստացել է, երեխային դեռևս տեղյակ չի պահել»,- վստահեցրեց Ջիլավյանը։

Կառույցի Ֆինանսատնտեսագիտական բաժնի պետի ժամանակավոր պաշտոնակատար Լևոն Բարսեղյանն ի հակադրումն խորհրդականի, տեղեկացրեց, որ գումարները փոխանցված չեն։

«Երեխաներն անչափահաս են, գումարը ծնողին է փոխանցվում։ Լինում է, որ հաշվեհամարը մայրիկի անունով է, անձնագիրը՝ հոր։ Դրանք ենք ճշտում, որ կարողանանք փոխանցել գումարը»,- ասաց Բարսեղյանը։

Նկատենք, որ երեխաներից բացի երաժշտական դպրոցների ուսուցիչները ևս գումարները չեն ստացել։ Նրանք բոլորը չափահաս են, վերջիններիս հաշվեհամարները ոչ թե ծնողների, այլ հենց իրենց անուններով են։

Օրակարգային հարցերից մեկը, որը վերաբերում էր Ամենափրկիչ եկեղեցու հարակից պուրակի 51 ծառերը նորերով փոխարինելուն, լարված մթնոլորտում քննարկվեց։ Այս խնդիրն ի հայտ է եկել տարածքում իրականացվող շինաշխատանքներով պայմանավորված։ Շինարարը դիմել է 22 ծառի հեռացման խնդրով, սակայն 51 ծառի մասին նախագիծ է առկա։

«Կոնկրետ շինարարը դիմել է Աբովյան փողոցի աջ հատվածի մասով, էս պահին այդ հատվածում բոլոր կումունիկացիաներն անցկացված են, բորդյուրները շարված են։ Կա՞ն հակառակ կողմում անցնող կոմունիկացիաներ։ Հիմնավորումը ներկայացվում է շինաշխատանքին խանգարել, խնդրում եմ հիմնավորեք»,- ասաց Մալխասյան։

«Քաղաքացիական պայմանագիր» խմբակցության ղեկավար Քնարիկ Հարությունյանն էլ նկատեց՝ դեմ չեն, որ ծառերը նորերով փոխարինվեն, սակայն պետք է հստակ մասնագիտական եզրակացություն ունենալ, որը կփաստի, որ այդ ծառերն իսկապես կորցրել են իրենց կենսունակությունը։

Գյումրու ավագանու անդամ Վարդևան Հակոբյանն էլ գործընկերներին ուղղված իր ելույթում նկատեց՝  ավագանու նիստում բարձրացվող հարցերը չէին առաջանա, եթե խմբակցությունների ներկայացուցիչները մասնակցեին օրեր առաջ տեղի ունեցած հանրային քննարկմանը։

«Հանրային քննարկմանը ներկա ենք գտնվել ես, պարոն Մալխասյանը և «Քաղաքացիական պայմանագիր» խմբակցության նախկին անդամ Արման Բաղդասարյանը, բուռն քննարկում է եղել»,- հայտարարեց Հակոբյանը։

Քնարիկ Հարությունյանն էլ արձագանքեց․

«Պարոն Հակոբյան, դուք երևի ժամանակի զգացողությունը կորցրել եք։ Ես ուզում եմ հիշեցնել, որ մենք ապրում ենք լուսավոր 21-րդ դարում, և հանրային լսմանը կարելի է հետևել ՀՀ, կամ առհասարակ աշխարհի ցանկացած կետից։ Հանրային լսմանն ավելի շատ պետք է մասնակցեն քաղաքացիները, մասնագետները, իսկ ավագանու անդամները ոչ միայն հանրային լսմանը, այլև նիստերի ժամանակ հնարավորություն ունեն և իրավասու են իրենց կարծիքը հնչեցնելու։  Այնպես որ, ձեր գնահատականներն այդ առումով, խնդրում եմ զսպել»։

Ավագանին ծառերի փոխարինմանը կողմ քվեարկեց։

Օրակարգային էր նաև ՀՀ կառավարությանն ուղղված ուղերձը։ Այն համահեղինակել են ավագանու անդամ Վարդևան Հակոբյանն ու «Ապրելու երկիր» խմբակցության ղեկավար Կարեն Մալխասյանը։

Այդ ուղերձով ավագանու անդամներն ակնկալում են ՀՀ կառավարության ֆինանսական աջակցությունը համայնքի եւ ՀՀ համար կարեւորագույն նշանակություն ունեցող Անանիա Շիրակացի և Մովսես Խորենացի փողոցների հիմնանորորգման հարցում։ Դրանք հանդիսանում են Մ-1 միջպետական ավտոմոբիլային ճանապարհի տարանցիկ հատված և ծանրաբեռնված են մշտապես։

Դեռեւս 2022 թվականի նոյեմբերին՝ Գյումրու ավագանու որոշմամբ, պայմանավորված փողոցների հիմնանորոգման հրատապությամբ, համայնքի բյուջեից հատկացվել է 15 մլն ՀՀ դրամ այդ փողոցների 2,4 կմ հատվածի հիմնանորոգման նախագծանախահաշվային փաստաթղթերի ձեռքբերման համար։ Ըստ ստացված փաստաթղթերի վերոնշյալ հատվածը հիմնանորոգելու համար անհրաժեշտ է 1 մլրդ 146 մլն 333 հազար 800 դրամ։ Հաշվարկը կատարվել է 2022 թվականին և ենթադրվում է, որ 2024 թվականին այս գումարն ավելին կլինի՝ հիմք ընդունելով գնային փոփոխությունները։

Նախագծի համահեղինակ Վարդեւսն Հակոբյան ընդգծեց, որ ուղերձը քաղաքական բնույթ չունի, քաղաքի համար կարևոր հարց է բարձրաձայնվել դրանով։

Ուղերձի նախագծին ավագանու անդամները կողմ քվեարկեցին։