Տուրիստական սեզոնին ընդառաջ՝ բացահայտենք Աջարիան. զբոսաշրջային ուղղություն՝ բոլոր եղանակների և նախասիրությունների համար

Հայաստանը տարիներ շարունակ առաջատար տեղ է զբաղեցնում Աջարիա այցելող զբոսաշրջիկների թվով առաջին հնգյակում:

Աջարիան Հայաստանի բնակիչների համար առաջին հերթին ծովն է և ծովային հանգիստը՝ մարդաշատ լողափերը, ջրային զվարճանքները, համեղ վրացական ուտեստներն ու տեղի բնակիչների հյուրընկալ ընդունելությունը:

Ամբողջ Աջարիան և վարչական շրջանի մայրաքաղաք Բաթումին հայերի ամենահասանելի ուղղություններից է, որտեղ ամեն ամառ շտապում են հայրեը մեքենայով, գնացքով կամ ինքնաթիռով:

Հայաստանում Վրաստանի դեսպանության և Վրաստանում Աջարիայի Ինքնավար Հանրապետության զբոսաշրջության դեպարտամենտի կազմակերպած մեդիաշրջագայության ընթացքում հայ լրագրողների խումբն այցելել է Վրաստանի ամենագեղեցիկ ու ամենապահանջված անկյուններից մեկը՝ Աջարիա, որի վարչական կենտրոնը Բաթումին է:

Ծովը, ճարտարապետությունը, հին ու նոր քաղաքը

Աջարիան գեղեցիկ է տարվա բոլոր եղանակներին, ամեն շոգ ամռանն այնտեղ պարբերաբար տեղացող առատ անձրևն անգամ ծովին ու քաղաքների փողոցներին աննկարագրելի գեղեցկություն է հաղորդում: Այդ փողոցներով կարելի է զբոսնել ժամեր շարունակ՝ բացարձակապես չզգալով որևէ հոգնածություն, հիանալ երկնաքերերով, պատմական ու ժամանակակից կառույցներով:

Սև ծովի ափին տեղակայված ժամանակակից Վրաստանի գլխավոր զբոսաշրջային, ինչպես նաև տնտեսական և մշակութային կենտրոններից մեկը՝ Բաթումին, հարուստ պատմություն ունի, այնտեղ է գտնվում Վրաստանում Հայաստանի գլխավոր հյուպատոսությունը:

Աջարիան ու Բաթումին, սակայն, միայն ծովափնյա հանգիստը չեն: Վրաստանի այս հատվածում կան բազմաթիվ գողտրիկ անկյուններ, արժեքավոր տեսարժան վայրեր, որոնք հաճախ վրիպում են լողափնյա հանգստով տարված այցելուների ուշադրությունից։

Այստեղ պահպանվում են 19-րդ դարի գեղեցիկ առանձնատները, որտեղ ապրել են քաղաքի նշանավոր դեմքերը։  Հիացնում են հրապարակը, քաղաքային թատրոնը և Մեդեայի արձանը՝ ոսկե գեղմով: Միաժամանակ զուգահեռված են ճարտարապետական նորագույն լուծումներով երկնաքերերը, հին բուլվարի կողքին կառուցված ժամանցի ժամանակակից կենտրոնները։

Քաղաքի սրտում գտնվող Բաթումիի ամենամարդաշատ ու կանչող վայրերից մեկը՝ «Պիացա» հրապարակը, անհնրա է չնկատել յուրահատուկ և հետաքրքիր ճարտարապետության շնորհիվ: Այնտեղ գրեթե ամեն օր վրացական պարային բեմադրություններ են, երժշտական խմբեր: Հետաքրքիր ճարտարապետությամբ և հարուստ պատմությամբ շինությունները Բաթումիի միայն կենտրոնում չէ, որ հանդիպում են:  Քաղաքում զբոսնելիս անհնար է չհրապուրվել ցիտրուսային ծառերի մանդարինների ու լիմոնների բույրով, ծովի թարմ շնչով ու հնագույն շինությունների ոգով:

Աջարիան արևմուտքից եզերում է Սև ծովը, իսկ մյուս երեք կողմերից՝ Փոքր Կովկասի լեռնաշղթան՝ երկրամասը բաժանելով հարթավայրային և լեռնային հատվածների։ Բնության այսպիսի բազմազանությունը՝ զուգորդված հին պատմության և մշակույթի հետ, բարենպաստ պայմաններ է ստեղծել զարգացնելու զբոսաշրջության գրեթե բոլոր հայտնի տեսակները՝ ծովային, լեռնադահուկային, մշակութային, էկո, գինու և գաստրո տուրիզմ, գյուղական տուրիզմ և այլն։

Կրոնն ու հայկական հետքը

Բաթումին բազմադավան քաղաք է. այստեղ ուղղափառ եկեղեցիների կողքին մզկիթ է, սինագոգ, ու նաև Հայ Առաքելական եկեղեցին, որը հին քաղաքի հենց կենտրոնում է։

Սուրբ Փրկիչ Հայ Առաքելական եկեղեցու նախնական փայտյա շենքը Բաթումիում կառուցվել է 1874 թվականին, սակայն հետագայում փայտյա կառույցն ապամոնտաժվել է, և նույն տեղում 1887-1898 թվականներին քաղաքի հայ համայնքի և հայտնի նավթարդյունաբերող  Մանթաշովի ջանքերով կառուցվել է  քարե շենքը: Խորհրդային կարգերի հաստատումից հետո եկեղեցին փակվել է,  1992 թվականին՝ վերադարձվել հայ համայնքին: Այն սկսել է գործել 1995 թվականից:

Հայ զբոսաշրջիկներից քչերին է հայտնի Բաթումիի Խարիթոն Ախվլեդիանիի  թանգարանը, որտեղ պահվում են նաև հին հայկական եզակի մատյաններ, իսկ արվեստի գործերի շարքում՝ Այվազովսկու հայտնի կտավներից մեկը: 

Բաթումիի բուլվարը, ճոպանուղին, համեղագույն խոհանոցն ու «Ալին և Նինոն»

Մոտ 2,5 կմ երկարությամբ ճոպանուղին հասցնում է սարի գագաթ, որտեղից բացվում է Սև ծովի խենթացնող տեսարանը՝ ծովն ամբողջ հեքիաթային հմայքով, որտեղ առկա են ծովը տեսնելու բոլոր միջոցները՝ զբոսանավեր, մոտորանավակներ և  ճախրող պարաշյուտներ։

Երեկոյան զբոսանքը Բաթումիի հայտնի բուլվարով՝ լի բազմաթիվ սրճարաններով ու ռեստորաններով, զվարճանքի ու ժամանցի տարատեսակ հնարավորություններ ունի:

Հին և նոր Բաթումները ծովափի երկայնքով միացնում է աշխարհի ամենաերկար ծովափնյա զբոսայգիներից մեկը՝ Բաթումի բուլվարը, որն ունի 8կմ երկարություն։

«Տղամարդը և կինը» կամ «Ալին և Նինոն» արձանախումբը, որը դարձել է ժամանակակից Բաթումի խորհրդանիշը, երեկոյան լուսավորության ներքո պատմում է տարբեր կրոններ դավանող երկու պատանիների ողբերգական սիրո պատմությունը։  Բուլվարի շրջակայքում են գտնվում Բաթումի գրեթե բոլոր ժամանցային վայրերը, այդ թվում՝ դելֆինարիումը, հրաշքների այգին, երգող շատրվանները և այլն։

Ծովը զբոսաշրջիկներին գրավող Աջարիայի միակ հարստությունը չէ, տեղի զբոսաշրջության դեպարտամենտը ներկայացնում է զբոսաշրջային ուղղությունները և Աջարիան ցույց տալիս որպես ակտիվ հանգստի վայր՝ տարվա բոլոր չորս եղանակների համար:

Ձմռանը այստեղ հնարավոր է դահուկներ քշել, գարնանն ու աշնանը՝ օգտվել զիփլայնից, լեռնային տուրիզմից: 

Աջարիայի բոլոր սննդի կետերում՝ փոքրիկ կրպակներից մինչև շքեղ ռեստորաններ, մատուցվում է համեղագույն սնունդ՝ տիպիկ վրացական խոհանոցի բոլոր ուտեստներով՝ զուգորդված վրացական համեղագույն գինիներով:

Բուսաբանական այգին

Առանձին ուշադրության է արժանի Բաթումիի բուսաբանական այգին, որտեղ  արտասովոր ծառեր են վեր հառնում, որոնց սաղարթները ճեղքում են արևն ու ծովը։ Այստեղ աճող 2037 բուսատեսակների գերակշիռ մասը բերվել է Արևելյան Ասիայից, Նոր Զելանդիայից, Հարավային Ամերիկայից, Հիմալայներից, Ավստրալիայից և միջերկրածովյան երկրներից։

Պատահական չէ, որ Աջարիան արժանացել է զբոսաշրջության Օսկար համարվող՝ Worldtravelawards-ին՝ որպես եվրոպական տուրիստական ուղղություն՝ բոլոր սեզոնների համար։

Առանձին մրցանակ է ստացել նաև Բաթումի բուսաբանական այգին, որը հաղթող է ճանաչվել «Եվրոպայի առաջատար բուսաբանական այգի» անվանակարգում։ Աջարիայում այս հաջողության վրա կանգնել չեն պատրաստվում։ Մտադիր են զբոսաշրջիկների թիվը 2025 թվականին հասցնել 6 միլիոնի։

Էքստրիմի սիրահարները կարող են ուղևորվել Մթիրալա ազգային պարկ, որտեղ ոտք դնելով՝ կթվա, թե հայտնվել եք ջունգլիներումկամ ինչ-որ էքստրեմալ ֆիլմի կադրում:

Բաթումիի ծովամթերքի շուկան

Աջարիայում գործող տասնյակ սննդի օբյեկտներում, ռեստորաններում ու սրճարաններում մատուցվող սնունդն այնքան համեզ ու բազմազան է, որ քչերն են տեղյակ Բաթումիի ծովամթերքի շուկայի մասին:

Իսկ այնտեղ այցելել, հավատացեք, պետք է: Ի դեպ, կարող եք ձեր նախընտրած ծովամթերքը գնել և շուկային կից «Ֆիշլանդիա» ռեստորանում  այն կպատրաստեն ձեր նախընտրած ձևով: 

Ի վերջո, ինչու հենց Աջարիա

Աջարիան հայաստանցիների համար ամենահասանելի, մատչելի, նախընտրելի ուղղություններից է:

Միաժամանակ Աջարիան պահանջված ուղղություն է եվրոպացիների համար, եվրոպական երկրներից գործում են ուղիղ չվերթներ դեպի Բաթումիի միջազգային օդանավակայան. Աջարիայի իշխանություններն աշխատում են բոլոր եվրոպական երկրների հետ:

Լեռնային Աջարիայում զբոսաշրջիկներին ընդունում են տարվա բոլոր եղանակներին։ Հատկապես ծովափին մոտ շրջաններում գրեթե երբեք չի դիտվում բացասական ջերմաստիճան, առկա են մշտական տեղումներ, ինչի շնորհիվ բարձրուղեշ լեռները մշտապես պատված են առատ բուսականությամբ՝ ապահովելով մաքուր օդ և գեղեցիկ տեսարաններ, այնտեղ կան նաև բազմաթիվ ջրվեժներ, գետեր:

Ի վերջո, Աջարիան չափազանց հարմար է հանգստի համար, քանի որ Հայաստանի և Վրաստանի միջև գործում է առանց վիզայի ռեժիմ, Վրաստանը համարվում է աշխարհի ամենաապահով 10 երկրներից մեկը  և բացի այդ՝ երկրամասում գրեթե ամեն տեղ կարելի է վճարել անկանխիկ, բոլոր լողափերը հանրային են և բաց հանգստացողների համար, սննդի կազմակերպումը՝ հասանելի և մատչելի, մարդիկ՝ հյուրընկալ:

Հյուրասեր և հյուրընյակալ վրացիները

Վրացական հյուրընկալությունն ու հյուրասիրությունը անմիջապես տեսանելի է սեղանի շուրջ: Լրագրողական խմբին հյուրընկալողները ջերմ միջավայրում մեզ հյուրասիրեցին վրացական գինի, ազգային ու տարատեսակ համեղագույն ուտեստներ՝ ուղեկցված ազգային երգ ու պարով: 

Այս ամենի տպավորությունները բարդ է փոխանցել, ավելի լավ է հայտնի ասացվածքի համաձայն՝ մեկ անգամ տեսնել, քան մի քանի անգամ լսել: Հավատացեք, մեկանգամյա ուղևորությունը կդառնա ամենամյա նախընտրելի ուղղություն: