Կեղտի մեջ անհասկանալի սեղան է դրված, վրան կռիս էլ չես հերձի. Ջաջուռի անասնագոմը՝ Գյումրու շների ստերջացման լաբորատորիա

Գյումրու փողոցներից ստերջացման և ստերլիզացիայի նպատակով հավաքված շները տարվում են Ջաջուռ, պահվում անասնագոմերից մեկում՝ հակասանիտարական պայմաններում: Այս աշխատանքն իրականացնում է «Կումնի» ՍՊԸ-ն:

Շները քնում են հենց անասնագոմի գետնին՝ կեղտի մեջ, կամ անասունների համար ժամանակին որպես կերակրաման ծառայած քարե տաշտակներում:

Այս մասին տեսանյութերի միջոցով ահազանգել է Կենսաբազմազանության պահպանության հիմնադրամի կենդաանիների հանդեպ դաժան վերաբերմունքի մասով մասնագետ Գոհար Տեր-Անտոնյանը: Նա անձամբ գնացել է Ջաջուռ, նկարել առկա պայմանները, հյուծված ու սոված կենդանիներին, դիմել դատախազություն:

«Հայկական ժամանակ»-ի հետ զրույցում Գոհարը պատմում է, որ ազգությամբ ռուս քաղաքացիներ են եղել, որոնք նաև կենդանասերներ են, իմացել են, որ Ջաջուռում շներ են պահվում, որոշել են այցելել, կերակրել:

«Գնացել են, որ նկարեն շներին, էդ խայտառակությունն են տեսել, դա են նկարել, զանգել են մեզ»,- ասում է Գոհարը՝ նշելով, որ ռուսների ահազանգից անմիջապես հետո եղել է Ջաջուռում, և մեկ շուն, որը սատկելու շեմին է եղել, 911-ի աջակցությամբ տեղափոխել է Գյումրու կլինիկա: Նրա այցի պահին գոմում մոտ 10 շուն է եղել:

Ովքեր են ստեղծված իրավիճակի պատասխանատուները, և ում անասնագոմն է «Կումնի»-ն ծառայեցնում որպես ստերջացման և ստերլիզացիայի լաբորատորիա:

Մեզ հետ զրույցում Ջաջուռի վարչական ղեկավար Հրաչ Ռաֆայելյանն ասում է՝ գիտի, որ Գյումրիից շներ են բերվում, բայց անասնաֆերման, որտեղ պահվում են կենդանիները, գյուղից դուրս է գտնվում: Սեփականատեր ունի, ումից վարձակալվել է տարածքը, բայց թե ով է սեփականատերը, չի ճանաչում: Նրա խոսքով՝ իրենց գյուղի տղա չէ:

Երբ է հիմնադրվել «Կումնի» ՍՊԸ-ն

Պետռեգիստրի տվյալների համաձայն՝ «Կումնի» ՍՊԸ-ն Հարություն Վիրաբյանը հիմնադրել է 2023 թվականի նոյեմբերի 7-ին: Ըստ Գոհար Տեր-Անտոնյանի՝ 9 օր անց այս ընկերությունը մասնակցել է Գյումրու քաղաքապետարանի հայտարարած մրցույթին և հաղթող ճանաչվել: «Շահել է աբսուրդ գներով տենդեր, ինչը բացառված բան է»,- շեշտում է Տեր-Անտոնյանը:

Համայնքապետարանը 500 շան ստերլիզացիայի և ամլացման համար նախահաշվարկային գին է առաջարկել 13 մլն դրամ, կազմակերպությունը հաղթել է մրցույթը և համայնքապետարանից ստացել 8 մլն 917 հազար դրամ՝ յուրաքանչյուր շան համար նախատեսելով 17 հազար 834 դրամ:

«Երևանում էլ կենտրոն կա, հարցրեք պարոն Առաքելյանին, տեսեք՝ հնարավոր է էդ գումարով նման գործողություններ կատարել, անհնար բան է: Քաղաքապետարանը փող է լվացել, ո՛չ ստերջացրել են, ո՛չ կաստրացրել, եթե արելել են, ապա՝ խայտառակ հակահիգիենիկ պայմաններում:
Քննիչի հետ տեղի զննություն ենք անցկացրել, խայտառակություններ ենք հայտնաբերել, կեղտի մեջ ինչ-որ սեղան է դրված անհասկանալի: Էդ սեղանի վրա շուն չէ, կռիս էլ չես կարա հերձես, կռիսին էլ կխղճաս՝ էդ սեղանին դնես, ինչ-ոչ վիրահատություն անես: Ոչ միայն կենդանիների նկատմամբ դաժան վերաբերմունքի, այլ նաև հենց փողերի լվացման մասով էլ ենք դիմել դատախազություն»,- ասում է Գոհարը:

Ինչ հոդվածով է նախաձեռնվել քրեական վարույթը

ՀՀ քննչական կոմիտեի մամուլի խոսնակ Գոռ Աբրահամյանը մեզ հետ զրույցում մանրամասնել է՝ ստացվել է այդ ընկերության կողմից ստանձնած գործառույթները որոշակի էական խախտումներով իրականացնելու և այլ հանգամանքների մասին հաղորդում։

ՀՀ քննչական կոմիտեի Շիրակի մարզային քննչական վարչության Ախուրյանի քննչական բաժնում ՀՀ քրեական օրենսգրքի 307-րդ հոդվածի 1-ին մասի հատկանիշներով նախաձեռնվել է քրեական վարույթ (Կենդանիների նկատմամբ դաժան վերաբերմունքը):

«Կատարվել է կենդանիների հետ տարվող աշխատանքների համար նախատեսված վայրի զննություն, ընկերության գործունեության վերաբերյալ անհրաժեշտ փաստաթղթեր են պահանջվել իրավասու մարմիններից, ինչպես նաև կատարվում են վարութային և քննչական այլ գործողություններ՝ հաղորդման մեջ նշված հանգամանքները համակողմանի ստուգելու, համապատասխան անձանց գործողություններին իրավական գնահատական տալու ուղղությամբ։ Այլ տվյալներ այս պահին հրապարակման ենթակա չեն»,- պարզաբել է Աբրահամյանը։

Ինչ գիտի այս մասին Գյումրու քաղաքապետարանը

Պարզաբանում ստանալու նպատակով դիմեցինք Գյումրու փոխքաղաքապետ Լուսինե Սանոյանին, որը «Ֆեյսբուք»-ի իր էջում պարբերաբար շներ որդեգրելու կոչեր է անում և լուսանկարներ հրապարակում, նաև Գյումրիում թափառող շներին առնչվող հարցերի շրջանակներում ավագանու խմբակցությունների ներկայացուցիչներից ձևավորված աշխատանքային խմբի անդամ է:

Մեր հարցին՝ թե քաղաքապետարանում ո՞վ է այս հարցի պատասխանատուն, փոխքաղաքապետ Սանոյանն ասում է. «Ես չգիտեմ, երկուշաբթի զանգեք ընդունարան, իմացեք»:

Նկատենք, սակայն, որ շների հարցերով զբաղվող հիշյալ աշխատանքային խումբը փոխքաղաքապետ Սանոյանի մասնակցությամբ փետրվարի 28-ին հանդիպում էր անցկացրել, անգամ հայտարարություն տարածել՝ բոլոր շահագրգիռ անձանց ու կազմակերպություններին առաջարկելով ներկայացնել ծրագրեր՝ թափառող շների ստերջացման գործընթացին զուգահեռ շների մեկուսացման, պահպանման, նոր ռազմավարության մշակման աշխատանքների վերաբերյալ:

Այս դեպքում փոխքաղաքապետի անտեղյակությունն առնվազն տարօրինակ է: Ենթադրելի է, որ թափառող շների հարցերով իրականացվող բոլոր ծրագրերը, որոնք ֆինանսավորվում են համայնքային բյուջեից, պետք է որ փաստաթղթային տեսք ունենան և ինչ-որ կերպ գոնե պատասխանատուների համար տեսանելի լինեն: Կամ գոնե քաղաքապետարանում այդ հարցի պատասխանատուն հայտնի լինի, որին նաև նույն հարցով զբաղվող աշխատանքային խմբի անդամները կճանաչեն:

Ի վերջո, ինչ է կատարվում Ջաջուռի անասնագոմում

«Հայկական ժամանակ»-ի հետ զրույցում ընկերության աշխատակից ներկայացած Սեդրակն ասում է՝ բոլոր հարցերով իրենց փաստաբանին դիմենք՝ չհերքելով, որ իրենց աշխատանքային տարածքն ու շների պահման վայրը Ջաջուռի անասնաֆերման է:

Փաստաբան Հովհաննես Ղարաքեշիշյանը ևս շատ ասելիք չուներ: Գործի մանրամասներին դեռ ծանոթ չէ: Նրա խոսքով՝ առաջիկա օրերին կծանոթանա, հարցերին կպատասխանի:

Մանրամասները՝ Գոհար Տեր-Անտոնյանի տրամադրած տեսանյութում: