Ղարաբաղը քնում է հանգիստ

Հանրապետական կուսակցության խոսնակ Էդուարդ Շարմազանովը մեզ հետ զրույցում ասաց, որ հայտարարության մասին կխոսի միայն այսօր: «Վաղը մամուլի ասուլիս կտամ եւ ձեր բոլոր հարցերին կպատասխանեմ»,- ասաց Շարմազանովը: Մինչ այդ Հայ ազգային կոնգրեսի արտաքին կապերի պատասխանատու Վլադիմիր Կարապետյանն ասաց, թե Սարգսյան-Ալիեւ համատեղ հայտարարությունը նշանակում է, որ Մադրիդյան այն սկզբունքները, որոնք հրապարակվել են «ՀԺ»-ում, եւ որոնց շուրջ ՀՀ արտգործնախարար Էդիկ Նալբանդյանը բազմիցս հայտնել է, թե դրանք հիմք են բանակցությունների համար, փաստորեն, ընդունվել է որպես հիմք: «Հիմա շատ կարեւոր է, որ Ղարաբաղը, Ղարաբաղի հասարակությունը, Ղարաբաղի ժողովուրդը եւ իշխանությունները հայտնեն իրենց մոտեցումը, այն կապակցությամբ, որ Մադրիդյան սկզբունքներին Սերժ Սարգսյանը հավանություն է տվել առանց Ղարաբաղի մասնակցության: Կարծում եմ, Կազանի հայտարարությամբ ճանապարհ է բացվել կարգավորման փաստաթղթի անխուսափելի ընդունման համար: Բայց ինձ համար ամենակարեւորը ԼՂ ժողովրդի արձագանքն է Կազանի հայտարարությանը, այն պարագայում, երբ նրանք գիտեն, թե Մադրիդյան սկզբունքները ինչ են իրենցից ներկայացնում»,- ասաց Կոնգրեսի ներկայացուցիչը: Երեկ փորձեցինք ճշտել, թե ինչպես են Ղարաբաղում վերաբերվում Կազանում ընդունված համատեղ հայտարարությանը: ԼՂՀ նախագահ Բակո Սահակյանի մամուլի խոսնակ Դավիթ Բաբայանը մեզ ասաց, թե անհանգստանալու ոչինչ չկա: Նա հիշեցրեց, որ դեռ մեկ շաբաթ առաջ մեզ ասել էր, որ, իր կարծիքով, Կազանում մաքսիմում մի հայտարարություն կարող է ընդունվել: «Փաստորեն, նման մոտեցումով եւս մեկ անգամ նշվել է, որ գործընթացը բարդ է, եւ այն պետք է շարունակվի: Այսինքն, այստեղ որեւէ անհանգստանալու բան չկա: Դուք ասում եք, որ հայտարարությունը խուճուճ է, բայց նորմալ է, միշտ այդպես է լինում, երբ նշաձողը շատ բարձր է լինում, բոլորը խոսում են, իրատեսության մակարդակը կորչում է, գտնում են, որ կարող է բան են ստորագրելու, բայց իրականության մեջ այդպիսի բան չկա: Ստացվել է այնպիսի մի փաստաթուղթ, որ կողմերը շնորհակալություն են հայտնում եւ ասում են, որ աշխատանքը պետք է շարունակվի. այդքան բան»,- ասում էր Դավիթ Բաբայանը: Բայց ի՞նչ է նշանակում հետեւյալ ձեւակերպումը` «Պետությունների ղեկավարները արձանագրեցին մի շարք հարցերի շուրջ փոխըմբռնման ձեռքբերումը...»` մեր այս հարցին ԼՂՀ նախագահի խոսնակը պատասխանեց. «Ադրբեջանաղարաբաղյան հակամարտության կարգավորումը ունի երկու կարեւորագույն հարց` Արցախի կարգավիճակը, այն է` մեր հանրապետության ժողովրդի ինքնորոշման փաստի ճանաչումը, այսինքն, մեր անկախության ճանաչումը եւ Արցախի ու Ադրբեջանի միջեւ սահմանների ճանաչումը: Այս 2 հարցն է, մնացած հարցերում, իհարկե, փոխըմբռնում պիտի լինի` խաղաղ կարգավորում, բանակցությունների շարունակություն եւ այլն»: Երբ նշեցինք, որ վերոնշյալ նախադասությունը շարունակվում է հետեւյալ կերպ «..., որոնց լուծումը կնպաստի Հիմնական սկզբունքներին հավանություն տալու համար պայմանների ստեղծմանը», Դավիթ Բաբայանն արձագանքեց. «Այո, իհարկե, պիտի նպաստի, եթե խաղաղ են կարգավորում, եթե զերծ են մնում հակահայկական քարոզչությունից եւ չեն տարածում պատերազմական գործողությունների անհրաժեշտությունը, սա ինչ-որ ձեւով նպաստում է: Չէ, այստեղ անհանգստանալու որեւէ բան չկա: Նորմալ է հայտարարությունը,- ասաց Դավիթ Բաբայանը եւ եզրափակեց:- Ինչքան մենք համախմբված լինենք, ինչքան ուժեղ լինի մեր պետությունը, ամեն ինչ նորմալ է լինելու: Ուրիշ ճար չկա»: Երեկ փորձեցինք ճշտել նաեւ Հայ հեղափոխական դաշնակցության կարծիքը Ալիեւի ու Սարգսյանի հայտարարության վերաբերյալ: ԱԺ ՀՅԴ խմբակցության պատգամավոր Արմեն Ռուստամյանի կարծիքով, հայտարարությունը նշանակում է, որ կողմերը ոչ մի բանի էլ չեն հասել: «Միակ բանը, որ կարող էր առաջ մղել գործընթացը, Լեռնային Ղարաբաղի կարգավիճակի հետ կապված համաձայնության հասնելն էր: Բայց պարզ է, որ Ադրբեջանը մազաչափ անգամ զիջման չի գնացել եւ պատրաստ չէ դրան: Քանի որ նա պատրաստակամություն չի հայտնում այդպիսի զիջման գնալու, գործընթացը նույն ավարտն է ունենալու միշտ էլ: Միանշանակ դա է: Այդ աստիճանի լղոզելը միայն դա է նշանակում»,- ասաց Արմեն Ռուստամյանը: Ամբողջ խնդիրն այստեղ այն է, սակայն, որ Հայաստանը կարող է զիջման գնալ: Երբ դեռ առավոտյան, մինչ Կազանի հանդիպումը Արմեն Ռուստամյանին հարցրինք, թե ինչ է անելու ՀՅԴ-ն, եթե Սերժ Սարգսյանն ի վերջո ստորագրի սեղանին դրված փաստաթուղթը, արդյոք իրենք կպահանջե՞ն Սերժ Սարգսյանի հրաժարականը, նա պատասխանեց. «Մենք հայտարարել ենք, որ դեմ ենք Մադրիդյան սկզբունքներին: Եթե Սերժ Սարգսյանը համաձայնվի, մենք կպահանջենք նաեւ նրա հրաժարականը, բոլորի հրաժարականը կպահանջենք: Այդ դեպքում պետք է գնալ իշխանափոխության, պաշտոնանկության գործընթաց է պետք սկսել: Այս պարագայում, եթե այդպես լինի եւ հստակ գործընթացը մտնի այդ հունի մեջ, այդ սկզբունքներով, բնականաբար, արդեն ազգային, համազգային մեծ խնդիր է առաջանում եւ ֆորսմաժոռային իրավիճակ: Այդ դեպքում լայն ճակատ ձեւավորելու խնդիր է առաջանալու»: Հարցին, թե անգամ Հայ ազգային կոնգրեսի հե՞տ ճակատ կձեւավորեք, Ռուստամյանը պատասխանեց. «Բոլոր քաղաքական ուժերի հետ համագործակցելու դաշտ պիտի ապահովենք, որովհետեւ բոլոր նրանք, ովքեր մտածում են այդ ձեւով, այսինքն, որ չի կարելի զիջել մեր սերունդների հաշվին, բոլոր այդ ուժերի հետ մենք պատրաստ ենք լայն ճակատ ձեւավորել»: