Նամակ համայնքապետին՝ 4 մլն դրամի խնդրանքով, կտրամադրվի՝ 1,5 մլն. Գյումրիում կանցկացվի միջազգային մշակութային փառատոն

Հարուստ խաղացանկ ու բացառիկ հնարավորություններ հայ և Գյումրիում գտնվող արտերկրի հանդիսատեսի համար: Ապրիլի 24-ից մայիսի 10-ը մշակույթի մայրաքաղաքում մեկ տանիքի տակ կմեկտեղվեն երկու տասնյակից ավելի թատրոններ ու թատերախմբեր ՀՀ տարբեր մարզերից, Երևանից, Վրաստանից, Ռուսաստանից և Եվրոպայից. կմեկնարկի Գյումրու միջազգային թատերական փառատոնը:

Նախագիծն իրականացվում է ՀՀ ԿԳՄՍ նախարարության, Երևանի քաղաքապետարանի, Շիրակի մարզպետարանի և Գյումրու համայնքապետարանի աջակցությամբ:

Փառատոնի պատշաճ կազմակերպման և անցկացման համար «Բարեկամ» ՀԿ-ի նախագահ Սերգեյ Հայրապետյանը նամակ է ուղղել Գյումրու համայնքապետարանին՝ ակնկալելով 4 միլիոն դրամի չափով ֆինանսական աջակցություն:

Գումարը, ըստ նամակի, ծախսվելու է Գյումրի ժամանող միջազգային թատերախմբերի ավիատոմսերի, կեցության, հոնորարների, օրապահիկների և այլ անհրաժեշտ կարիքները հոգալու համար։

Գյումրու ավագանին երեկ 4 մլն դրամի փոխարեն, սակայն, «Բարեկամ» ՀԿ-ին, որպես նվիրատվություն, 1 մլն 500 հազար դրամ հատկացրեց: Համայնքի ղեկավարի խորհրդական Լենա Ջիլավյանը նախագիծը զեկուցելիս ընդգծեց. «Մեր էրեխեքն են, մեր ուսանողներն են, մեր քաղաքն է, մեր քաղաքի պատիվն է»:

«Զարթոնք» խմբակցության ավագանու անդամ Վարդևան Հակոբյանի՝ ծանո՞թ եք կազմակերպությանը հարցին՝ Ջիլավյանն ասաց. «Ծանոթ չեմ, բայց վստահություն ներշնչող է»:

Սերգեյ Հայրապետյանի՝ Գյումրու համայնքապետին ուղղած նամակում կարևոր մեկ շեշտադրում կա, համաձայն որի՝ փառատոնի շրջանակներում կայացած ներկայացումների տոմսերի վաճառքից գոյացած հասույթից վճարվելու են Երևանի թատրոնի և  կինոյի պետական ինստիտուտի Գյումրու մասնաճյուղի ուսանողների ուսման վարձերը:

^{Լուսանկարում՝ ԵԹԿՊ ԳՄ ուսանողները «Ամբոխները խելագարված» ներկայացումում}

Թե քանի՞ ուսանողի մասին է խոսքը, նամակում չի ասվում, տեղյակ չէ նաև Երևանի թատրոնի և կինոյի պետական ինստիտուտի Գյումրու մասնաճյուղի տնօրեն Հակոբ Զիլֆիմյանը:

«Հայկական ժամանակ»-ի հետ զրույցում ասում է՝ զարմացած է մեր հարցադրումից: Իրեն ոչ մեկը չի դիմել, ո՛չ ուսանողի թիվ են ուզել, ո՛չ էլ տեղեկություն այն մասին, թե քանի ուսանող վարձավճարի խնդիր ունի:

«Մեզ հետ դա համաձայնեցված չէ, առաջին անգամ եմ նման բան լսում: Ուսանողները քիչ են, բայց թատերականի դիմորդների 90 տոկոսը սոցիալապես անապահով ընտանիքներից են: Բայց ո՛չ ուսանողների կողմից է դիմում եղել, որ չեն կարող վճարել, ո՛չ էլ ասել են՝ մեզ ցանկ տվեք, դժվարություն ունենք՝ վճարենք: Գուցե հենց ուսանողների հետ են խոսել, չգիտեմ այս պահին»,- նկատում է Զիլֆիմյանը:

Նշենք, որ ԵԹԿՊ-ի Գյումրու մասնաճյուղում ուսանելու 1 տարվա վարձավճարի չափը 350 հազար դրամ է:

Փառատոնի պրոդյուսեր Տիգրան Վիրաբյանը ևս հստակ չի կարողանում ասել, թե քանի՞ ուսանողի ուսման վարձ են վճարելու:

«Տոմսերի վաճառքի վերջնական ամփոփումից հետո թատերականի Գյումրու մասնաճյուղից կխնդրենք այն ուսանողների տվյալները, որոնք ունեն վարձավճարի օժանդակության կարիք և կփորձենք օգտակար լինել մեր փառատոնի արտաբյուջեի միջոցներից»,- մեր զրույցում ասում է Վիրաբյանը:

Փառատոնի մասնակից թատրոնների ու թատերախմբերի ներկայացումների տոմսերը հիմնականում 2000, միջազգային թատերախմբերի ներկայացումները՝ 2000-5000 դրամ կլինեն:

Փառատոնի պատասխանատուն ասում է՝ 30 տոկոս տոմսի վաճառք են նախատեսում, 70 տոկոս՝ հրավիրատոմսով հանդիսական:

Հարցին՝ ինչպե՞ս են հրավիրատոմսերը հասնելու մարդկանց, Վիրաբյանն ասում է՝ հնարավոր բոլոր ոլորտների մարդկանց՝ կրթություն, մշակույթ, սպորտ, առողջապահություն, մասնագիտական ուղղությունների ուսանողներ, հրավիրատոմսեր փոխանցելու տարբերակներ կգտնեն:

Ծավալային առումով աննախադեպ այս փառատոնը Գյումրի կբերի շուրջ 500 արտիստի և թատերական ոլորտի ներկայացուցչի, հանդիսատեսի թիվը կգերազանցի տասը հազարը:

Գյումրիում անցկացվելիք միջազգային փառատոնին դրամատիկականը ներկայացմամբ չի մասնակցի, սակայն մեծ սիրով կհյուրընկալի բոլոր թատերախմբերին:

Փառատոնի լոգոտիպը ստեղծվել է Գյումրու առաջին թատրոնի շենքի գծապատկերով, որտեղ 1912 թվականին ներկայացվել է հայկական առաջին օպերան՝ Արմեն Տիգրանյանի «Անուշը»։ 20-րդ դարի 30-ականներին շենքում տեղակայվել է Մռավյանի անվան դրամատիկական թատրոնը։

Փառատոնային ներկայացումներից հետո տեղի են ունենալու նաև «Գյումրին՝ միջազգային թատերական խաչմերուկ» խորագիրը կրող հեռուստաքննարկումներ ռեժիսորների, դերասանների, թատերական գործիչների, արվեստաբանների, թատերասերների մասնակցությամբ։