Ակադեմիական քաղաքը մեր ապագան է, շատ երկար ենք մտածել, աշխատել ենք լսել բոլոր քննադատությունները. վարչապետ

ՀՀ կրթության, գիտության, մշակույթի և սպորտի նախարար Ժաննա Անդրեասյանն այսօր Կառավարության նիստի ժամանակ առանձնացրեց կարևոր նախաձեռնությունների շարք, որը գերատեսչությունը պետության աջակցությամբ իրականացնելու է հայ կինոյի 100-ամյակի կապակցությամբ։ 

Ըստ նրա՝ հայ կինոյի հիմնադրումը եղել է խոշորագույն մշակութային իրադարձություն, որով Հայաստանը ներգրավվել է համաշխարհային գեղարվեստական գործընթացներում։ Այս համատեքստում նախարարը կարևորեց հայ կինոյի հիմնադիր Համո Բեկնազարյանի 130-ամյակի շրջանակներում այս տարի առաջին անգամ ԿԳՄՍ նախաձեռնությամբ հրապարակված և ռեժիսորին նվիրված եռալեզու պատկերագիրքը, որի շնորհանդեսն արդեն եղել է։

«2022 թվականին հայ կինոյի 100-ամյակն ընդգրկվել է ՅՈՒՆԵՍԿՕ-ի հռչակավոր մարդկանց և հիշարժան տարեթվերի օրացույցում, որից հետո վարչապետի որոշմամբ ձևավորվել է հոբելյանական հանձնաժողով, և այն իրականացրել է միջոցառումների ծրագրերի կազմման աշխատանքները։ Ընդ որում՝ ուզում եմ ընդգծել, որ հայտերի ներկայացման գործընթացը եղել է բաց, նախարարության կայքում եղել է տեղադրված հայտարարություն»,- ասաց ԿԳՄՍ նախարարը։

Արդյունքում ամփոփված ծրագիրը, ըստ Անդրեասյանի, բազմաբաղադրիչ է․ կան թե՛ հրատարակչությանը, թե՛ միջազգայնացմանը նպաստող ծրագրեր, որոնցից հայ կինոյի մասին իրազեկման բարձրացման տեղական ծրագրերն են, որոնք ուղղված են թե՛ մարզերում, թե՛ Երևանում կատարելուն:

«Մասնավորապես, իրականացնելու ենք հայկական կինոդար ծրագիրը, որը սկսվելու է ապրիլի 16-ից, տևելու է մեկ տարի։ Դրա շրջանակներում 100 դասական և ժամանակակից ֆիլմեր ցուցադրվելու են մարզերում և Երևանում, դրանք ուղեկցվելու են քննարկումներով, բոլոր հետաքրքրվածները կարող են մասնակցել։ Ունենալու ենք կինոդպրոց Դեբեդում, որտեղ երեխաները անցնելու են կինոյի պատմություն, ստանալու են մասնագիտական կողմնորոշում։ Անիմացիոն ֆիլմերի շաբաթ է լինելու։ Կարևոր է նաև, որ ունենք հրատարակչական ծրագրեր, որոնք թույլ են տալու հետազոտական կոմպոնենտը ապահովել»,- ընդգծեց նա:

Կրթության ոլորտի ղեկավարի խոսքով՝ կլինի առանձին հրատարակություն համր կինոյի մասով, Կանի միջազգային փառատոնին կներկայացվի առանձին տաղավարով, կցուցադրվեն հայկական ֆիլմերը Փարիզի Սենեմատեքում, կկայանա Համո Բեկնազարյանի ֆիլմերի ցուցադրությունը․ «Այս ամբողջ տարվա ընթացքում հնարավորություն կունենանք հայկական կինոն նորովի ներկայացնել։ Մենք նախատեսում ենք վերաբաշխում իրականացնել և հավելյալ 240 միլիոն 542 հազար դրամ ուղղել այս միջոցառումների իրականացմանը»։

Վարչապետն էլ, անդրադառնալով հայ կինոյի զարգացմանը նպաստող նոր նախաձեռնություններին, նկատեց՝ նշելով հայ կինոյի 100-ամյակը՝ պետք է խոսենք նաև կինոյի ապագայի և ՀՀ-ի տեսլականի մասին կրթության ոլորտում։

Երկրի ղեկավարի խոսքով՝ այս իմաստով պետք է հանրային փաստերին ուշադրություն դարձնել:

«Կինո նշանակում է շարք, գրականություն, առանց սցենարի չի կարող լինել կինոմատոգրաֆիա, կինո նշանակում է երաժշտություն, չկա ֆիլմ, որտեղ չլինի երաժշտություն, կինոն կերպարվեստն է։ Այն նաև տեխնոլոգիաներն են, ժամանակակից աշխարհում քիչ են ֆիլմերը, որոնք հենված չեն տեխնոլոգիայի հիման վրա։ Քննարկվում է «Հայ ֆիլմ» կինոստուդիայի ճակատագիրը, և դրա տարածքում կունենանք արվեստների ավագ դպրոց, համալսարան, և դրանից բխող բոլոր արդյունքները։ Այնտեղ կլինեն նկարահանման հրապարակներ, ստուդիաներ, ժամանակակից չափանիշներին համապատասխանող կինոդահլիճ, թատրոն, կինոթատրոն և այլ»,- մանրամասնեց վարչապետը։ 

Ըստ նրա՝ այս ծրագիրը կզարգանա և կհասնի Աշտարակի ֆիզիկական ինստիտուտի տարածք, որը Կառավարությունն անվանում է ակադեմիական քաղաք։

«Շատ երկար ենք մտածել ու դանդաղ, աշխատել ենք լսել բոլոր քննադատությունները, հայհոյանքների մեջ փորձել տեսնել, թե ինչ ռացիոնալ բան կա, և որոշել ենք, որ ակադեմիական քաղաքը մեր ապագան է որոշելու։ Այս առումով մեր քաղաքական կամքը ամրացել է, և սա մենք մանրամասն քննարկել ենք, չենք ցանկացել որևէ վերնագրի գերի դառնանալ, այլ թեման ընկալել»,- վստահեցրեց Կառավարության ղեկավարը:

Երկրի ղեկավարը շեշտեց՝ հայ կինոյի 100-ամյակը կարևոր իրադարձություն է, և այն պետք է ընկալվի անկյունաքար հետագա ռազմավարական ծրագրերը իրականացնելու ճանապարհին։