34 տարվա սպասումից հետո 36 ընտանիք Գյումրիում բնակարանամուտ տոնեց․ Համահայկական հիմնադրամը 2 շենք հանձնեց շահագործման

34 տարվա սպասումից հետո գյումրեցի 36 սոցիալապես անապահով տնակաբնակ ընտանիք արդեն հիմնական նոր հասցե ունի՝ «Մուշ-2» թաղամաս, Հալաբյան փողոց, շենք 1 և շենք 1/1։ Շենքից բացի՝ նաև մանկապարտեզ է կառուցվել։

Բնակապահովման այս ծրագիրն իրականացրել է «Հայաստան» համահայկական հիմնադրամի կազմակերպած մեծ դրամահավաքի արդյունքում՝ «Մեր Գյումրի» ծրագրի շրջանակներում: Բարերարների թվում են ՀՀ 4-րդ նախագահ Արմեն Սարգսյանը, որն իր մեկ տարվա աշխատավարձն է փոխանցել, ԱՄՆ-ում բնակվող 104-ամյա Կլարա Մարկոսյանը, որը ևս հսկայական գումար է նվիրաբերել։ Ֆրանսիայի տեղական մարմնի նվիրատվությամբ էլ մանկապարտեզն է կառուցվել։ 

Բոլոր բարերարներին, կազմակերպիչներին, նախագծողներին ու շինարարներին, ընդհանուր առմամբ այս գործում իրենց մասնակցությունն ունեցած բոլոր մարդկանց շնորհակալություն հայտնելուց հետո կտրվեցին կարմիր ժապավենները, ու գյումրեցի ընտանիքները Ամանորի նախաշեմին բնակարանամուտը տոնեցին։

«Վերջապես եկավ այն օրը, երբ 30-ից ավելի ընտանիք բնակարանամուտ է նշում։ Որպես բնիկ գյումրեցի, մարդ, որը վերապրել է երկրաշարժը, գիտի՝ ինչ ասել է երեք տասնամյակ ապրել տնակներում, շատ լավ եմ հասկանում բոլորիդ, իրապես կիսում եմ ձեր ուրախությունը։ Վստահ եմ, որ այսօրվան շատ եք սպասել, ձեր հետ միասին սպասել ենք նաև մենք, և լիահույս եմ, որ այսօրվանից ձեզ մոտ ինչ-որ բան է փոխվելու, ձեր լուսավոր ու տաք բնակարաններում կյանքի նոր փուլ եք սկսելու»,- ասաց Շիրակի մարզպետ Նազելի Բաղդասարյանը։

Շահառուները, ըստ «Համահայկական հիմնադրամ»-ի գործադիր տնօրեն Հայկակ Արշամյանի, ընտրվել են՝ ըստ հստակ մշակված չափորոշիչների, հաշվի է առնվել երկրաշարժից տուժած լինելու հանգամանքը, երբևէ ԲԳՎ կամ տուն ստացած չլինելը, անչափահաս երեխաների առկայությունը, բազմազավակ ընտանիք լինելը:

Նրա խոսքով՝ շահառուների ընտրությունից հետո ցուցակները նաև քննարկվել ու համաձայնեցվել են Գյումրիի քաղաքապետարանի հետ, որպեսզի շահառուների ընտրությունը կատարվի լիովին անաչառ։

Ծրագրի այս փուլում բնակարաններ են ստացել նաև 44-օրյա պատերազմում նահատակված գյումրեցիների ընտանիքները։

Բնակարանամուտին ներկա էր նաև ՀՀ նախագահը։ Վահագն Խաչատուրյանի խոսքով՝ պարտավորություն ունեն երկրաշարժի գոտի հասկացությունն ընդհանրապես վերացնել մտածողությունից, և այն հաջողվում է։

«Մենք բոլոր ուղղություններով պարտավոր ենք աշխատել, պարտավոր ենք ամեն ինչ անել, որ Լաչինի միջանցքն օր առաջ բացվի։ Բայց սա չի նշանակում, թե մյուս գործերը չպետք է անենք. կյանքն այդպես է, շարունակվում է։ Եվ բոլորիդ խնդրում եմ՝ առօրյա կյանքում այն բոլոր խնդիրներն ու պարտավորությունները, որ ունենք, անենք, խոսքը հատկապես վերաբերում է պետական կառույցներին։ Եվ ես երբ որ տնտեսական հաջողությունների մասին եմ խոսում, պատահական չեմ ասում. եթե մենք չունենանք հաջողակ տնտեսություն, ոչ մի խնդիր չենք կարողանա լուծել։ Այս շենքն էլ չէր լինի»,- նշեց նա:

Նախագահին, նախարարներին, Շիրակի մարզպետին, Գյումրու համայնքապետին ու բոլոր ներկաներին իրար հերթ չտալով՝ բնակարանատեր դարձած գյումրեցիներն իրենց նոր բնակարաններ հրավիրեցին ու օրը համարեցին գտնված երազ։

Գյումրու համայնքապետ Վարդգես Սամսոնյանն ասաց՝ 3 տասնամյակից ավելի ժամանակավոր կացարաններում ապրած մարդկանց շատ լավ է հասկանում։ Անձամբ է 10 տարի ապրել տնակում, դժվարությունների մասին ոչ թե պատմություններից, այլ սեփական փորձից է տեղյակ։

Այս բնակարանները հանձնվեցին կահավորված, կենցաղային տեխնիկայով հագեցած, այնպես, որ բնակիչները տեղափոխվելուց հետո գույքի ձեռք բերման հարցում գրեթե խնդիրներ չեն ունենալու։

Գալիք տարում նույն տարածքում ևս երկու շենք կկառուցվի. այդ բնակարանները հատկացվելու են հաշմանդամություն ունեցող տնակաբնակ գյումրեցիներին։

«Ես՝ որպես հիմնադրամի հոգաբարձուների խորհրդի նախագահ, ամեն ինչ կանեմ, որ այդ ծրագիրը իրականանա, յուրահատուկ շենքեր են սարքում՝ կահավորված, պատրաստի, այստեղ ովքեր ապրելու են, շատ խնդիրներ չեն ունենալու»,- վստահեցրեց ՀՀ նախագահը։

«Համահայկական հիմնադրամ»-ի գործադիր տնօրեն Հայկակ Արշամյանն էլ տեղեկացրեց, որ 44-օրյա պատերազմում հաշմանդամություն ձեռք բերած և բնակարան չունեցող գյումրեցիները ևս այդ նոր շենքերում իրենց բնակարանները կունենան։