Բանակի հենքը տնտեսությունն է, տուրիստական հոսք ապահովելու համար ջանք է ներդրվում. Խաժակյանը՝ Երևանի զարդարանքի մասին

Երևանի ավագանու «Լույս» խմբակցության անդամ Դավիթ Խաժակյանի կարծիքով՝ մայրաքաղաքի ամանորյա զարդարանքը տուրիստական գրավչության համար կարևոր բաղադրիչ է, և ներդրված միջոցները բազմապատիկ ծառայելու են տուրիստական ներհոսքին:

«2020 թվականից հետո առաջին անգամ տոները կնշենք քաղաքի պատշաճ զարդարանքով, ինչը պայմանավորված է նաև մայրաքաղաքում «Մանկական Եվրատեսիլ»-ի ներկայությամբ»,- ասում է նա:

Անդրադառնալով վերջին շրջանում մեծ աղմուկ բարձրացրած Հանրապետության հրապարակի զարդարանքի միջոցներին, ըստ որոնց՝ պատմամշակութային շենքերի պատերը վնասվել են՝ վերջինս նկատում է՝ իհարկե, կարելի էր ավելի մտածված կերպով իրականացնել, բայց այն աղմուկը, որ բարձրացվեց, ավելի մեծ էր, քան այդ արված անցքերը:

«Տպավորություն ստեղծվեց, թե ամբողջ Կառավարության շենքի վրա անցքեր են արվել, մինչդեռ լույսերի մեծ մասը կախված են վերևից և շենքի ֆասադին ընդհանրապես չեն դիպչել: Իսկ անցքերը կվերականգնվեն, և մյուս անգամների համար զարդարանքն այլ կերպով իրականացնելու տարբերակներ կմտածենք: Կարծում եմ՝ այս խնդիրն ուռճացվեց, որպեսզի պատկերը, որը պետք է ստացվեր և տպավորեր մարդկանց, այդքան էլ տպավորիչ չլինի»,- նշում է Խաժակյանը՝ օրինակ բերելով՝ 5-րդ ալիքի օպերատորի գործողությունը, որը հեղույս էր տեղադրել պատի մեջ և նկարել այն:

Նրա խոսքով՝ ասում ենք՝ բանակի հենքը ամուր տնտեսությունն է, հետո ասում, որ տնտեսությունը զարգացնելու համար պետք են ներդրումներ և տուրիստական հոսքեր: Հիմա այդ տուրիստական հոսքը ապահովելու համար ջանք է գործադրվում, որը կբերի տնտեսական աճ՝ նոր ներդրումներ:

«Այցելեք մեր հարևան Թբիլիսի, տեսեք՝ ինչքան մեծ տուրիստական ներհոսք կա, և նրանց ծախսած գումարները վերածեք դրամի ու կտեսնեք, որ դրանք մի քանի անգամ ավելին են, սակայն նաև տնտեսական աճ են ապահովում տուրիստական հոսքերի հաշվին»,- նշում է Խաժակյանը և զուգահեռներ անցկացնում մեր իրականության հետ. «Մեզ մոտ ասում են՝ բանակի սպառազինության վրա ծախսեք նույն գումարները: Մենք երբեմն կրկնում ենք ակսիոմատիկ ճշմարտություններ, հետո հակասում դրան»:

Խաժակյանի համոզմամբ՝ պատերազմական իրավիճակում գտնվող յուրաքանչյուր երկիր չի կարող բոլոր ծախսերն ու միջոցներն ուղղել միայն ռազմական ոլորտին՝ մոռանալով մշակույթի, տնտեսության և պետության համար այլ կարևոր ոլորտների մասին:

«Ուկրաինայում այսօր միայն ռազմական ծախսե՞ր են: Իհարկե, ոչ: Մարդիկ շարունակում են իրենց կենսագործունեությունը, և նույնն էլ մենք ենք անում: Դա չի նշանակում, որ մենք չենք տեսնում պատերազմի վտանգը և խրախճանքով ենք զբաղված: Ոչ, անում ենք ամեն ինչ, որ քաղաքը ներկայանալի տեսք ունենա և եկող տարի ավելի մեծ տուրիստական հոսքեր ունենանք»,- շեշտում է Խաժակյանը:

Ավագանու անդամի պնդմամբ՝ եթե ուզում ենք երկարաժամկետ զարգացումներ, ապա և՛ մշակութային ոլորտին ուղղված ծախսեր պետք է արվեն, և՛ տոնական զարդարանքի, և՛ նոր տրանսպորտային համակարգի ներդրման, և՛ այսպես շարունակ:

«Մեզ համար ցավալի կամ ողբերգական չէ, որ Ռուսաստանից տուրիստների հոսքի մեծ մասը գնում է մեր հարևան Վրաստան և դրա շատ փոքր մասն է հասնում Հայաստան: Այն պարագայում, որ վստահաբար ռուս տուրիստները կամ պոտենցիալ բնակիչները շփումների մեջ իրենց ավելի հարմարավետ են զգում հայ ժողովրդի հետ: Ընկալումներն այստեղ ավելի դրական են, բայց զբոսաշրջիկները Թբիլիսին զարգացվածության առումով ավելի հարմարավետ են համարում: Ժամանցային վայրերի քանակն ավելի շատ է»,- նշում  է Խաժակյանը:

Ըստ նրա՝ ամեն անգամ, երբ այցելում է Թբիլիսի, հասկանում է, որ մեր քաղաքը առնվազն 5 տարով հետ է մնացել զարգացվածության իմաստով. «Դա, վստահեցնում եմ, արագ նկատում են Հայաստան այցելող զբոսաշրջիկները, և այն ստանում է մուլտիպլիկատիվ էֆեկտ: Սա անհերքելի փաստ է: Մենք ասում ենք, որ Երևան է եկել ռուս տուրիստների մեծ հոսք, բայց չենք ասում, որ բազմապատիկ ավելին այսօր Վրաստանում են, քանի որ ենթակառուցվածքների իմաստով այնտեղ շատ ավելի հարմար է: Եթե մենք միջոցներ ծախսենք ենթակառուցվածքներն ավելի հարմար դարձնելու համար, բազմապատիկ ավելի ներդրում կունենանք զբոսաշրջիկների տեսքով, որը կամրացնի մեր տնտեսությունը, և կկարողանանք ավելի մեծ ծախսեր իրականացնել սպառազինության վրա: Սրանք փոխկապակցված հարցեր են»:

Անդրադառնալով Ամանորի միջոցառումները բոյկոտելու վերաբերյալ որոշ շրջանակների հայտարարություններին՝ Խաժակյանը նշում է. «Աբսուրդն այն է, որ դա ասում են իրենց քաղաքական գործիչներ համարող մարդիկ, որոնց քաղաքական գործունեությունը դարձել է տոնական միջոցառումների բոյկոտը: Ո՞ւր են հասել քաղաքական գործիչները, որ ամանորյա միջոցառումներն են բոյկոտում: Նույնիսկ չեմ կարող մեկնաբանել: Իրենք էլ լավ գիտեն, որ այդ միջոցառումների իրականացումից հետո բոլորը միայն գոհունակություն են հայտնելու, և իրենք կրկին առանձնանալու են ամեն ինչ շահարկելու իրենց մոլուցքով, որը քաղաքական պատիվ, կարծում եմ, չի բերում»:

Հերմինե Կարապետյան