Ոլորտն իրոք կանոնակարգման կարիք ունի. մարզերում հրավառությունների հաճախականությունը և դրա հետևանքով առաջացող խնդիրները

ՀՀ-ում հրավառություններ կիրականացվեն բացառապես տոնական և հատուկ նշանակության միջոցառումներին համայնքի ղեկավարի կամ Կառավարության թույլտվությամբ և միայն համայնքի թույլ տված վայրերում:

Օրերս այս մասին «Ֆեյսբուք»-ում գրել էր նախագծի համահեղինակ, ԱԺ «Քաղաքացիական պայմանագիր» խմբակցության պատգամավոր, Գիտության, կրթության, մշակույթի, սփյուռքի, երիտասարդության և սպորտի հարցերի մշտական հանձնաժողովի նախագահ Սիսակ Գաբրիելյանը: 

Հրավառությունների և դրանց վաճառքը քաղաքացիներին արգելող օրենքի նախագծի շուրջ «Հայկական ժամանակ»-ը զրուցել է ՀՀ մարզպետների հետ՝ փորձելով հասկանալ, թե ի՞նչ հաճախականությամբ են մարզերում՝ համայնքներում, իրականացվում հրավառություններ, և ի՞նչ վտանգ են դրանք ներկայացնում:

Արարատի մարզպետ Սեդրակ Թևոնյանի խոսքով՝ օրենքի նման նախագիծն անհրաժեշտություն է, քանի որ քիչ չեն դեպքերը, երբ հրավառությունների պատճառով մարդիկ իրենց առողջությունն են վնասում: «Արարատի մարզում վերջին երկու տարիներին, պատերազմով պայմանավորված, հրավառություններն ավելի պասիվ են կամ էլ լինում են հատուկ օրերի՝ հատուկ մարդկանց ներգրավվածությամբ»,- նշում է Թևոնյանը:

Արմավիրի մարզպետ Էդվարդ Հովհաննիսյանի դիտարկմամբ էլ մարզում ընդհանուր առմամբ սահմանված կարգը խախտելու դեպքեր չեն գրանցվել, և որ իր պաշտոնավարման՝ վերջին մեկ տարվա ընթացքում, չի հանդիպել որևէ հրավառություն կամ դրա հետևանքով առաջացած միջադեպ: Այդ առումով ակտիվությունը մարզում մեծ չէ:

Պատկերը որոշակիորեն այլ է Կոտայքի մարզում և հատկապես Ջրվեժ համայնքում, որը հարուստ է ռեստորանային համալիրներով: Մեզ հետ զրույցում Կոտայքի մարզպետ Ահարոն Սահակյանն ասում է. «Առաջ սահմանված կարգը խախտելու և հասարակության անդորրը խանգարելու հետ կապված բողոքները շատ էին, սակայն արդեն տևական ժամանակ է՝ չունենք նման խախտումներ և փորձում ենք խնդրին լուծում տալ, քանի որ այս երևույթը տհաճ է և տգեղ: Իսկ այն, որ ոչ լիցենզավորված ամեն ոք հրավառ նյութեր է վաճառում կամ կազմակերպում, հղի է մի շարք վտանգներով»:

Սյունիքի մարզում ևս պատերազմով և հասարակության տրամադրությամբ պայմանավորված՝ հրավառություններ գրեթե չեն լինում, ասում է մարզպետ Ռոբերտ Ղուկասյանը: «Վերջին շրջանում Սյունիքի մարզում և հատկապես Կապան քաղաքում հրավառություններ չեմ նկատել: Կարծում եմ՝ այս խնդիրը հատկապես ակտուալ է Երևանում, սակայն մարզում էլ հետևում ենք, որ սեփական ուրախությունը կազմակերպելով՝ անհարմարություններ չպատճառեն հասարակությանը»,- ընդգծում է Ղուկասյանը:

Տավուշի մարզում 2020 թվականից հետո հրավառություններ չեն լինում, ինչը մարզպետ Հայկ Ղալումյանի խոսքով, կապված է պատերազմի ու դրա պատճառած հետևանքների հետ, սակայն, այդուհանդերձ, նրա կարծիքով, օրենքի այս նախագիծը շատ կարևոր է:

Արագածոտնի մարզում հրավառություններ հիմնականում լինում են Աշտարակ քաղաքում՝ պահպանելով օրենքով սահմանված կարգը, ներկայացնում է մարզպետ Սերգեյ Մովսիսյանն ու հավելում, որ ընդհանուր առմամբ մարզում և հատկապես գյուղական բնակավայրերում հրավառություններ օգտագործելու մշակույթ չկա: «Մեր մարզի դեպքում օրենքի նման նախագիծը խնդիրներ չի առաջացնի, եթե օրենսդիրն ընդունի վերոնշյալ օրենքի նախագիծը, մենք ի գիտություն կընդունենք և կանցնենք առաջ»,- նկատում է մարզպետը:

Լոռու մարզպետ Արամ խաչատրյանը ևս օրենքի նման նախագիծը դրական է որակում և հավելում, որ մարզում հրավառությունների հետ կապված որևէ խնդիր կամ միջադեպ չի արձանագրվել, այժմ էլ անգամ ամանորյա տոներին գրեթե չի արվում հրավառություն:

Գրեթե նույն պատկերն է Գեղարքունիքի մարզում: Մարզպետ Կարեն Սարգսյանը դժվարանում է հիշել, թե վերջին անգամ մարզում երբ է հրավառություն տեսել: Իսկ օրենքի նման նախագծի ընդունմանը կողմ է, քանի որ քիչ չեն դեպքերը, երբ հասարակությունը հրավառ նյութերի ոչ պատշաճ օգտագործելուց վնասներ է կրել:

Շիրակի մարզպետ Նազելի Բաղդասարյանի խոսքով էլ՝ այս ոլորտն իսկապես կանոնակարգման կարիք ունի, քանի որ հատկապես ամանորյա տոներից առաջ հրավառ նյութերի ոչ կանոնակարգված և ազատ վաճառքը հանգեցնում է մի շարք խնդիրների: «Ընդհուպ դեպք ենք ունեցել, որ երեխան կորցրել է մատները պայթուցիկ հրավառ նյութեր օգտագործելու հետևանքով»,- նշում է Բաղդասարյանը:

Նրա դիտարկմամբ՝ այս տարվա սեպտեմբերյան իրադարձություններից և 2020 թվականի պատերազմից հետո մարդիկ շքեղությունների մեջ զուսպ են դարձել, հրավառությունների հաճախականությունն էլ պակասել է:

Նշենք, որ Վայոց ձորի մարզպետ Արարատ Գրիգորյանի հետ մեզ չհաջողվեց կապ հաստատել:

Հիշեցնենք, որ հրավառությունները Երևանում կթույլատրվեն միայն Ազատության և Հանրապետության հրապարակներում տոն օրերին և բացառապես պետական ու տեղական ինքնակառավարման մարմինների նախաձեռնությամբ։ Ավագանին վերջին նիստում միաձայն կողմ է քվեարկել ներկայացված նախագծին։

Հերմինե Կարապետյան