Գողություն Գյումրու Մերկուրովի նկարչականում․ հաստիքացուցակով 1, իրականում կես դրույքով պահակն այստեղ ցերեկն է աշխատում

Գյումրու Մերկուրովի անվան նկարչական դպրոցից գողացել են ջեռուցման կաթսան։ Դեպքը տեղի է ունեցել 1-2 օր առաջ։ Հաստատությունը գիշերային պահակ չունի, անվտանգության համակարգ՝ նույնպես։ Պատուհաններն առանց ճաղավանդակների են։

Տնօրեն Ժակլին Սարգսյանը «Հայկական ժամանակ»-ի հետ զրույցում ասում է՝ իրավունք չունեն ճաղավանդակներ տեղադրել, քանի որ շենքը Կումայրի արգելոց-թանգարանին է պատկանում։

Տնօրենը գողության մասին ոստիկանությունում համապատասխան հաղորդում ներկայացրել է, սակայն՝ ովքե՞ր են գողերն ու ինչո՞ւ են նկարչական դպրոց ներխուժել, պատկերացում անգամ չունի։ Իրավապահներն ասել են՝ գործել են արհեստավարժ, հավանաբար՝ ձեռնոցներով, քանի որ մատնահետքեր չկան։ Ջեռուցման կաթսան էլ նոր չէր. հինգ տարի առաջ էր տեղադրվել։

Կողոպտիչները նաև տնօրենի սենյակի դուռն են փորձել բացել, ինչը չի հաջողվել: Սակայն կոտրել են զուգարաններից մեկի դուռը։ Գողության պատճառով մեծապես վնասվել է դեռ նախորդ տարի հիմնանորոգված ցուցասրահը։

«Կաթսան, որը պոկել, տարել են, շատ վատ են տարել. խողովակները կոտրել են։ Այդ ցուցասրահը կեսով ջուր էր լցվել, նախորդ ամառ հազիվ չորացրել էինք։ Դրանից առաջ 30 տարի աղբով, ջրով լցված նկուղ է եղել»,- ընդգծում է տնօրենը։

Գողության դեպքին անդրադարձել է Գյումրու ավագանու նախկին անդամ, ԺԱԱ խորհրդի նախագահ Լևոն Բարսեղյանը՝ մասնավորապես ուշադրություն հրավիրելով պահակի կողմը։

Նկատենք՝ ի սկզբանե, Մերկուրովի նկարչական դպրոցին ավագանու հաստատմամբ մեկ ամբողջ դրույքով պահակի հաստիք է տրվել։ Այստեղ, սակայն, պահակն աշխատում է կես դրույքով և միայն ցերեկային ժամերին։ Մյուս կես հաստիքը բաժին է հասել հյուսնին։

«Ասացեք, խնդրեմ՝ ինչի՞ համար է պահակը, եթե ոչ գողության ռիսկը խափանելու եւ տեխնիկական աղետները ահազանգելու համար: Իսկ լսած կա՞ք, թե երբ է արվում գողությունը սովորաբար, չէ, չեք լսել, հարկավ ... պահակին հարկավոր էր ցերեկվա ժամերին աշխատանքի կանչել, որպեսզի գիշերը գողություն չլիներ: Հավանաբար այդ է եղել տնօրենի եւ այլ պաշտոնյաների տրամաբանությունը: Ես, իհարկե, չեմ կարող հավատալ նման անհեթեթության, բայց, ասացեք, խնդրեմ՝ իմաստը ո՞րն է ցերեկն աշխատող պահակի: Մեզ, էս քաղաքին թափով ձեռ են առնում, փաստորեն: Մեկը կա՞, որ հոդաբաշխ բացատրություն կտա այս տրամաբանությանը»,- հարցադրումներ է արել Բարսեղյանը:

Իսկ թե ինչո՞ւ է ավագանու սահմանած հաստիքացուցակում դպրոցն ինքնակամ փոփոխություն կատարել, դպրոցի տնօրենը մեզ հետ զրուցում ասում է՝ ունի այդ իրավունքը։ Հաստիքացուցակը, ըստ Ժակլին Սարգսյանի, ավագանին հաստատում է միավորներով և ոչ անձերի անուն-ազգանուններով։ Այդ միավորները քանի մասի ուզի, ըստ իր հայեցողության, կարող է կիսել։

«Օրինակ՝ մեկ միավոր հավաքարարի հաստիքը կիսեմ, ունենամ 2 հավաքարար։ Դա ո՜ւմ ինչ գործն է: Վերջը, ես տնօրեն եմ, ես եմ կառույցը ղեկավարում, ես գիտեմ իմ տան խոհանոցը։ Էս դեպքում էլ պահակի այդ մեկ հաստիքը կիսել եմ երկու մասի՝ ելնելով անհրաժեշտությունից»,- շեշտում է նա:

Հարցին՝ իսկ ո՞վ է ցերեկային պահակն ու ի՞նչ գործառույթ ունի, Սարգսյանն ասում է՝ դպրոցի նախկին տնտեսվարն է, որը 50 տարի անընդմեջ աշխատել է Մերկուրովում, և զուտ մարդկայնորեն ինքը չի կարողացել 80-ամյա պապիկին ազատել աշխատանքից։

«Պահակը 50 տարի էստեղ աշխատել է՝ որպես տնտեսվար։ Ես ուղղակի չգիտեմ՝ էդ վերջին տարիներին ինչո՞ւ է հաստիքացուցակում դարձել պահակ։ Ես երևի ուշադիր էլ չեմ եղել։ Ինքը ցերեկը գալիս է, բացում դռները, գնում է։ Թոշակառու է, 80-անց է, և ես չեմ ուզում իրեն հեռացնեմ: Բայց ինձ պետք էր մի ջահել ուժ, որ կկարողանար դպրոցի հարցերը կարգավորել։ Հյուսնը հիմա անում է դպրոցի տնտեսվարի աշխատանքն ամբողջությամբ՝ այն, ինչ պահանջվում է։ Անընդհատ մի բան փչանում է, շարքից դուրս գալիս, սա էլ համայնքապատկան կառույց է: Ես հո անընդհատ չեմ գնալու, մուրացկանի նման ասեմ՝ հիմա էլ սա է պետք, այս խնդիրը կա։ Ամեն մարդ էդպես իր գլխի ճարը տեսնում է»,- ընդգծում է զրուցակիցը:

Հաստիքը կիսել է, ավագանու հաստատած 93 հազար դրամ աշխատավարձը՝ ևս։ Յուրաքանչյուրին 30-32 հազար դրամ գումար է հասնում, քանի որ 93 հազար դրամը մաքուր աշխատավարձի չափը չէ։

«Գումարի չափի խախտում չի եղել, տվյալ անձը գալիս, աշխատում է։ 3 տարի վճարվում է մարդը, ոչ թե ես եմ իմ գրպանը դնում։ Ես ո՛չ էս դպրոցի գումարով եմ ապրում, ո՛չ էլ տնօրեն բառով եմ կայացել։ Քաղաքում ճանաչված նկարիչ եմ, դիզայներ, սրանով չէ, որ կայանալու եմ: Բայց ինչ կարող եմ, քաղաքիս ու դպրոցիս համար անում եմ, ու էս ձևով պատասխանել ինձ, նման քննարկում անել ուղղակի անսպասելի ու շատ վիրավորական էր։ Նույն քաղաքի մարդ ենք, վերջը իրար երեսի ենք նայելու վաղը։ Ես որ եկա, 16-րդ դարն էր էստեղ, նույնիսկ զուգարան չկար։ Հիմա ամեն ինչ արել ու անում եմ, որ դպրոցը ծաղկի, ու նման սխալ խոսակցություններ են ծավալում մարդիկ, ինչը շատ տհաճ է»,- վրդովված ասում է նկարչականի տնօրենը։

Տնօրենն ամեն ինչ ճիշտ է ասում, մեզ հետ զրույցում նկատում է Գյումրու համայնքապետի խորհրդական Լենա Ջիլավյանը։ Հաստիքը կիսելու իրավունք ունեցել է, սակայն այդ մասին իրենց տեղյակ չպահելու իրավունք՝ ոչ։

«Դրույքը չի խախտել, կիսել է, ուղղակի պետք է տեղյակ պահեր, գրություն գրեր քաղաքապետին։ Անփութության հետևանք է, որ չի հայտնել, մնացածը նորմալ է»,- վստահեցնում է Ջիլավյանը։

Գողացած կաթսան 5 տարի առաջ գնվել է 320 հազար դրամով։ Հիմա տնօրենն սպասում է ավագանու որոշմանը՝ կտրամադրվի՞ նոր գումար կամ կաթսա, կամ հարցն ի՞նչ կերպ կլուծվի։ Ջրածածկ եղած ցուցասրահի հատակի խնդիրը Սարգսյանն արդեն սեփական միջոցներով կարգավորել է՝ առանց որևէ մեկի օգնությունն ակնկալելու։

Ներկա պահին համայնքապետարանն անվտանգության համակարգ է անցկացնում դպրոցում։ Ժակլին Սարգսյանը նշում է՝ արդեն ստիպված է լինելու պահակին ազատել աշխատանքից, որպեսզի նրան տրվող գումարով այդ ծախսը հոգա։

Իսկ դպրոցի սաները հիմնականում այս օրերին դրսում են աշխատում. էտյուդային շրջան է։