Մարդու օրգաններ, շան, կատվի մսից մթերք. որ երկրներն ինչ ապրանքների արգելքներ են սահմանում «Հայփոստ»-ով առաքման դեպքում

Վերջին շրջանում քաղաքացիներից դժգոհություններ են հնչում, որ ոչ բոլոր ապրանքներն են կարողանում «Հայփոստ»-ով առաքել: «Հայկական ժամանակը» ՓԲԸ-ից հետաքրքրվել է պատճառների մասին, խնդրել նաև տրամադրել արգելված ապրանքների ցանկը:

Ի պատասխան մեր հարցման՝ «Հայփոստ» ՓԲԸ-ից տեղեկացրել են, որ կա տարանջատում ԵԱՏՄ երկրներ ուղարկվող առաքանիների ներդրանքի արգելքների մասով, որը կարգավորվում է ԵԱՏՄ կանոնակարգերով։ Արգելված իրերի ցանկը սահմանվում է ՀՓՄ կանոնակարգերով, ինչպես նաև՝ ՀՀ օրենքով։ 

««Հայփոստ» ընկերությունը ընդունում է հաճախորդներից առաքանի, այլ ոչ ապրանք։ Այսինքն՝ ընկերությունը պատասխանատու չէ հաճախորդի առաքանու սխալ հայտարարագրած ներդրանքի համար։ «Հայփոստը» առաքանիներն ընդունում է նաև փակ վիճակում՝ չիմանալով իրական ներդրանքը»,- պատասխանել է «Հայփոստի» մամուլի պատասխանատու Գևորգ Աբրահամյանը:

Նշենք, որ փոստային առաքանիներով արգելված է փոխադրել ցանկացած տեսակի զենք, պայթուցիկ նյութեր, ալկոհոլային ապրանքներ, ծխախոտ, թմրամիջոց, տարադրամ, պոռնկագրական նյութեր և այլն: Ստորև առավել մանրամասն ներկայացնում ենք ՀՓՄ կանոնակարգերով արգելված 15 կետից բաղկացած իրերի ցանկը՝ 

1. Ցանկացած տեսակի զենք (դրանց հիմնական (բաղկացուցիչ) մասեր), փամփուշտները (մասերը), այն առաքանիները, որոնք կառուցվածքով նման են քաղաքացիական և ծառայողական զենքին, գազային, նետողական, ազդանշանային, օդաճնշիչ, սառը զենքեր, ռազմամթերք, էլեկտրաշոկային սարքեր և կայծահաններ, ինչպես նաև զենքի և հրազենի հիմնական մասեր,

2. Պայթուցիկ նյութեր, պայթուցիկ սարքեր, պայթեցման միջոցներ, ռադիոակտիվ, թունավոր, դյուրավառ և այլ վտանգավոր նյութեր,

3. Արագ փչացող ապրանքներ,

4. Ալկոհոլային արտադրանք (բացառությամբ ԵԱՏՄ երկրներ),

5. Թանկարժեք քարեր, ցանկացած տեսակի և վիճակում գտնվող բնական ադամանդներ, բացառությամբ՝ ոսկերչական իրերի,

6. Թմրամիջոցներ, հոգեմետ նյութեր և դրանց պրեկուրսորներ, ինչպես նաև թմրամիջոցներ, հոգեմետ նյութեր և դրանց պրեկուրսորներ պարունակող բույսեր և սունկ, ցանկացած տեսքով և վիճակում, ներառյալ՝ դրանց պտուղները, սերմերը,

7. Ծխախոտ և ծխախոտային արտադրանք (բացառությամբ՝ ԵԱՏՄ երկրներ)

8. Վտանգավոր թափոններ,

9. Թունավոր կենդանիներ և բույսեր,

10. Վայրի կենդանիներ և առանձին վայրի բույսեր,

11. Դրամական նիշեր և տարադրամ,

12. Առարկաներ, որոնք իրենց բնույթով կամ փաթեթավորմամբ կարող են վնաս հասցնել փոստային կապի կամ սուրհանդակային կապի օպերատորի աշխատողներին, աղտոտել փոստային կապի մյուս առաքանիներն ու սարքավորումները,

13. Արտահանման համար արգելված տպագիր, տեսաձայնային և այլ կրիչներում պարունակվող տեղեկատվություն,

14. Արտահանման համար արգելված պարենային ապրանքների առանձին տեսակներ,

15. Պոռնկագրական նյութեր:

Բացի հստակ սահմանված վերոնշյալ ցանկից՝ յուրաքանչյուր ընդունող երկիր սահմանում է իր համար ներմուծվող ապրանքների արգելքներ։ Հայաստանից և հակառակ ուղղություններով «Հայփոստի» միջոցով ապրանքներ է ներմուծվում 53 երկիր, դրանք են՝ ԱՄՆ, Ավստրիա, Ավստրալիա, Արաբական Միացյալ Էմիրություններ, Արգենտինա, Բելառուս, Բելգիա, Բրազիլիա, Բուլղարիա, Գերմանիա, Դանիա, Դոմինիկյան Հանրապետություն, Եգիպտոս, Էստոնիա, Թուրքիա, Թուրքմենստան, Իսպանիա, Իսրայել, Իտալիա, Իրանի Իսլամական Հանրապետություն, Իրաք, Լատվիա, Լյուքսեմբուրգ, Կանադա, Կիպրոս, Կորեա, Հնդկաստան, Հոնկոնգ Չինաստան, Հունաստան, Հունգարիա, Ղազախստան, Ղրղզստան, Ճապոնիա, Մեծ Բրիտանիա, Մեքսիկա, Մոլդովա, Նիդեռլանդներ, Նորվեգիա, Շվեդիա, Շվեյցարիա, Չեխիա, Չինաստան, Պորտուգալիա, Ռումինիա, Ռուսաստանի Դաշնություն, Սաուդյան Արաբիա, Սիրիա, Վիետնամ, Վրաստան, Տաջիկստան, Ուզբեկստան, Ուկրաինա, Ֆրանսիա:

Ստորև ներկայացնում ենք որոշ երկրների ամենաուշագրավ արգելքները: Օրինակ՝ Գերմանիան արգելում է առաքել շան, կատվի, աղվեսի, կապիկի, ձիու մսից պատրաստված մթերք:

Չեխիան էլ, օրինակ, արգելում է առաքել կոմունիզմի վերաբերյալ փաստաթղթեր, առաքանու միջոցով ընդունվում են նվերներ, որոնց արժեքը չի գերազանցում 45 եվրոն: Դրանք ազատվում են մաքսատուրքերից և հարկերից: Ուղարկողը և հասցեատերը պետք է լինեն ֆիզիկական անձինք:

Մեծ Բրիտանիան արգելում է առաքել դիակիզված փոշի:

Իսկ ահա Ռուսաստանում, բացի ՀՓՄ կանոնակարգերով սահմանված արգելված իրերից, կա ևս մեկ ավելի ընդլայնված ցանկ, որից առանձնացրել ենք ամենաուշագրավները՝ մարդու օրգաններ, արյուն և դրանց բաղադրիչներ, ցանկացած տեսակի և վիճակի բույսեր ու սերմերջրային կենսաբանական աղբյուրների ձկնորսական գործիքներ, փչացող սննդամթերք, օզոնային շերտը քայքայող նյութեր, տեսալսողական նյութեր և հրատարակություններ, որոնք պարունակում են ծայրահեղական և տեռորիստական գործունեության կոչեր կամ տեռորիզմի հասարակական հիմքեր, որոնք ունեն պոռնոգրաֆիկ բնույթ, որոնք արտադրված են կամ առաքված՝ խախտելով ընտրությունների և եվրասիական տնտեսական ընկերության Մաքսային միության անդամ-երկրների հանրաքվեների վերաբերյալ օրենքի պահանջները:

Հարևան Վրաստանն էլ արգելում է առաքել նյարդերը պարալիզացնող գազ:

ԱՄՆ-ն ՀՓՄ դրույթներով նախատեսված առաքման ենթակա արգելված իրերից զատ՝ նշվում է, որ արգելում է ստրուկների պատրաստած ապրանքների առաքանին, բոլոր տեսակի թարմ, սառեցված, չոր և ապխտած միս և ձուկ, կաթ, սերուցք, յուղեր, ճարպեր, մոմեր և դրանից պատրաստված ապրանքներ, սուրճ, բուրդ, եթե այն մաքուր չէ (առանց արյան և կեղտի), իսկ մաշված հագուստը պետք է ուղեկցվի վկայականով, որ ախտահանվել է, շիճուկներ, դեղեր, ախտորոշիչ կամ բուժական սարքեր, կենսաբանական արտադրանքներ, վարակիչ նյութեր, ճառագայթում արձակող էլեկտրոնային սարքեր, ինքնաբերաբար բացվող դանակներ:

Թուրքիան էլ արգելում է առաքել սուրճ, թեյ, հող, կոսմետիկ արտադրանք: Որպես նվեր՝ արգելվում է ուղարկել հետևյալ իրերը՝ հեղուկ և ալկոհոլային արտադրանք, ծխախոտ, բջջային հեռախոս և այլ անլար ցանցեր:

Չինաստանն էլ արգելում է առաքել հասարակական կարգին հակասող իրեր, վիճակախաղի տոմսեր, չստորագրված ապառիկ քարտեր, հնդկական ծագմամբ անձնագիր, երեխայի սեռը որոշելու համար նախատեսված թեստային հավաքածու, արտաքինից ատրճանակի նմանվող իրեր, խաղալիք ատրճանակներ:

Ֆրանսիայում, բացի արգելվող ապրանքների ցանկից, կան նաև ներմուծման սահմանափակումներ՝ բնական մեղր՝ մինչև 2 կգ, հնաոճ և օգտագործված իրեր, օրինակ՝ համակարգիչներ, մեքենայի մասեր, կոսմետիկա, արվեստի գործեր, գործվածք, 1 կգ միս և մսամթերք, 2 կգ կենդանական ծագմամբ այլ սննդամթերք:

Հատկանշական է, որ այս ցանկում ամենաքիչ արգելքները սահմանել է Եգիպտոսը: Այս երկիր «Հայփոստի» միջոցով առաքումն արգելված է հետևյալ ապրանքների համար՝ ողջ կենդանիներ, միս, թռչուն, հնաոճ իրեր, հրազեն, վիճակախաղի տոմսեր, հեղուկներ, փոշի, մեղր, ապակե լինզաներ:

Ներմուծվող ապրանքների արգելքներին, ըստ երկրների, առավել մանրամասն կարող եք ծանոթանալ այստեղ: