Առանց ծանոթ բարեկամի ու կոռուպցիոն ռիսկերի․ քանի առաջին դասարանցի է հայտագրվել մինչ այս պահը

Արդեն երկու տարի է, ինչ Հայաստանում առաջին դասարանցիների ընդունելությունը կատարվում է առցանց։ Ցանկացած ծնող իր երեխային Հայաստանի տարբեր դպրոցներում կարող է գրանցել:

Մինչև հայտագրումը, նախ, անհրաժեշտ է ստուգել երեխայի տվյալները stugum.emis.am կայքի միջոցով, որպեսզի հայտագրման ժամանակ տեխնիկական խոչընդոտներ չառաջանան։ Հայտագրման կարգում այս տարի որոշակի փոփոխություններ են կատարվել, որոնք ավելի մատչելի են դարձնում գործընթացը։

Այս տարի հայտագրումը մեկնարկեց հունիսի 21-ին։ Այդ օրվանից մինչ այսօր հայտագրվել է 21 հազար 128 աշակերտ։ Կրթական տեխնոլոգիաների ազգային կենտրոնի տնօրեն Արտակ Պողոսյանը «Հայկական ժամանակ»-ի հետ զրույցում նշում է՝ քանի դեռ հայտագրումը չի ավարտվել, հույս ունեն, որ այս տարի էլ կունենան նախորդ տարիների փորձը։

«Կան դպրոցներ, որտեղ հայտագրման կարգով չէ ընդունելությունը։ Դրանք այն դպրոցներն են, որոնք բնակավայրում միակն են։ Այդ պատճառով սպասում ենք 40 հազար առաջին դասարանցու ընդունելության։ Հստակ պատկերը սովորաբար կարող ենք տեսնել օգոստոսի վերջ կամ սեպտեմբերի սկիզբ, երբ ավարտված լինի հայտագրումը»,- ասում է նա։

Համակարգը ի սկզբանե հնարավորություն չի տալիս խախտել լիցենզավորման կարգը ու բացառում է բոլոր կոռուպցիոն ռիսկերը, նշում է Պողոսյանը։ Այսինքն՝ ծնողները իրենց երեխային դպրոց ընդունելու համար դիմեն, խնդրեն կամ զանգահարեն ծանոթ-ազգականի։ Այն ցույց է տալիս, թե քանի լիցենզիոն տեղ է առկա դպրոցներում, քանիսն են զբաղված։

«Շատ կան նման դպրոցներ, որ արդեն լիցենզիայով սահմանված կարգով սպառել են իրենց ազատ տեղերը։ Այդպիսիք կան թե՛ Երևանում, թե՛ մարզերում։ Կարող ենք փաստել՝ մարզերում և մայրաքաղաքում նույն համամասնությունն է, չի լինում, որ տեղերը սպառվում են, ու երեխաները մնան առանց ընդունվելու, բոլորը լրացվում են»,- ընդգծում է ԿՏԱԿ-ի տնօրենը։

Առաջին դասարանցիների հայտագրումը այս տարի որոշակի փոփոխությունների ենթարկվեց և այժմ ընթանում է երեք փուլով։ Որպես առաջնահերթություն՝ դիտարկվել է նույն դպրոցում հայտագրվող երեխայի քրոջ կամ եղբոր սովորելու, ինչպես նաև ծնողի աշխատելու հանգամանքը։ Առաջին փուլով հայտագրվել են նաև ռուսերեն դասարաններում։ Այս փուլով հայտագրումը տևել է 14 օր։ Երկրորդ փուլը սկսվել է հուլիսի 6-ին։ Այս դեպքում իրականացվել է ընդհանուր հիմունքներով՝ հայերենով ուսուցում իրականացնող հանրակրթական պետական հաստատություններ դիմող բոլոր առաջին դասարանցիների համար։

Երրորդ փուլում, այսինքն՝ հուլիսի 12-ից, հայտագրում կիրականացվի նաև օտարերկրյա քաղաքացիների, երկքաղաքացիների, քաղաքացիություն չունեցողների, ինչպես նաև ազգային փոքրամասնությունների ներկայացուցիչների երեխաների համար նրանց ընտրությամբ ռուսերենով ուսուցմամբ դասարաններում։ Այս կարգավորումը վերաբերում է նաև այն երեխաներին, որոնց ծնողներից մեկը ՀՀ քաղաքացի է, մյուսը՝ ոչ:

«Նոր կարգի համաձայն՝ ծնողները պետք է հայտագրումից հետո դիմում ներկայացնեն տվյալ դպրոց՝ իրենց երեխային ընդունելու համար։ Դա պետք է արվի մինչև սեպտեմբերի 5-ը։ Եթե դիմում չներկայացվի երեխային դպրոց ընդունելու համար, ապա սեպտեմբերի 6-ին երեխան ինքնաբերաբար դուրս կմնա համակարգից՝ իր տեղը զիջելով մեկ այլ առաջին դասարանցու»,- նկատում է Պողոսյանը։

Վերջինս ասում է՝ հատկապես այս փոփոխությունը համակարգի համար կարևորներից է, քանի որ նախորդ տարիներին դեպքեր են եղել, երբ ծնողը երեխային հայտագրել է, բայց մինչև հոկտեմբեր երեխան դպրոց չի գնացել։ Այսինքն՝ տեղը է զբաղեցրել՝ խոչընդոտելով այլ երեխայի մուտքը դպրոց։ Հիմա այս կարգավորումը հաստատելու է երեխայի դե յուրե դպրոց ընդունվելու փաստը։

Համակարգն ընտրում է հերթականությա՞մբ, թե՞ պատահականության սկզբունքով․ Արտակ Պողոսյանն ասում է՝ համակարգի հիմքում արագությունն է։ Առավելությունը տրվում է նրան, որը ավելի արագ կսեղմի վերջին հրահանգը։ Նա նաև նկատում է՝ այս տարի բավականին քչացել է համակարգից օգտվել դժվարացող ծնողների քանակը. ծնողները այժմ ավելի տեղեկացված են, և սրա հիմքը նախորդ տարիների փորձն է:

Հայտագրումը կշարունակվի ուսումնական ողջ տարվա ընթացքում։