Քաղաքական գործիչներն ամեն ինչ կարող են ասել, անգամ հայտարարել, որ այլեւս Նյուտոնի օրենքները չեն գործում. Իոաննիսյան

Այն թիվը, որը մենք հաղորդում ենք ցանկացած հավաքի ժամանակ, ստուգելի է: Ամենայն պատասխանատվությամբ հայտարարում եմ՝ եթե որեւէ մեկը ստուգեց եւ 10 տոկոս տարբերություն գտավ, այսինքն՝ ապացուցեց, որ մեր ներկայացրած տվյալները սխալ են, հրապարակային ներողություն կխնդրենք եւ էլ երբեք հավաքների քանակ չենք հաշվի:

Այս մասին «Հայկական ժամանակ»-ի հետ զրույցում ասում է «Իրազեկ քաղաքացիների միավորում» կազմակերպության համակարգող Դանիել Իոաննիսյանը՝ անդրադառնալով պարբերաբար հնչող քննադատություններին, թե հանրահավաքների ժամանակ հավաքված մարդկանց մասին «Իրազեկ քաղաքացիների միավորում» ՀԿ-ի ներկայացրած թվերը ստույգ չեն:

Իոաննիսյանը նշում է, որ յուրաքանչյուր ոք, որը կասկածի տակ է դնում իրենց հաշվարկը, կարծում, թե տվյալների խեղաթյուրում կա, կարող է մտնել իրենց կայք, բեռնել եւ համոզվել, որ դրանք միանգամայն ճիշտ են:

ՀԿ նախագահը նաև ներկայացնում է, թե ինչպես է իրականացվում գործընթացը: Ըստ նրա՝ հավաքը սկսելուց մոտ 20 րոպե հետո իրենց նկարահանող թիմը 5-10 րոպե պարբերությամբ նկարում է այնտեղ հավաքված մարդկանց: Որպես կանոն՝ դա լինում է հավաքը սկսելուց կես ժամ կամ 40 րոպե հետո, երբ ուշացողները արդեն եկել են, իսկ շուտ գնացողները դեռ չեն հասցրել հեռանալ:

«Արված նկարի վրա հատ-հատ հաշվում ենք մարդկանց, եւ ամեն մարդու գլխին թիվ է դրվում: Դրանից հետո ստանում ենք վերջնական թիվն ու հրապարակում: Մենք հրապարակում ենք ոչ միայն վերջնական ստացված թիվը, այլեւ այդ 20 մեգապիկսելանոց ֆայլը, որի վրա թիվ կա»,- վստահեցնում է Իոաննիսյանը:

Նրա խոսքով՝ ստուգելը շատ ավելի հեշտ գործընթաց է, քան հաշվելը: Իսկ թե ինչո՞ւ են որոշ ընդդիմադիր քաղաքական գործիչներ պարբերաբար շահարկում այդ հրապարակումներն ու ասում, թե թիվն ակնհայտ պակաս է ներկայացվում, Իոաննիսյանն ընդգծում է. «Քաղաքական գործիչներն ամեն ինչ կարող են ասել, անգամ հայտարարել, որ այլեւս Նյուտոնի օրենքները չեն գործում»:

Անդրադառնալով նաև վերջին օրերին ոստիկանների գործողություններին՝ վերջինս նկատում է՝ 2018 թվականին տեղի ունեցած Թավշյա հեղափոխությունից հետո՝ առ այսօր, «Իրազեկ քաղաքացիների միավորում» ՀԿ-ն հավաքների ժամանակ ոստիկանական ուժերի կողմից հատուկ միջոցների կիրառում չի նկատել: Այսինքն՝ եթե նախկինում ցույցերի ժամանակ ոստիկանների կողմից օգտագործվում էին վահաններ, խլացուցիչներ, էլեկտրաշոկեր կամ ջրցան մեքենաներ, այժմ դրանց մասին հիշատակելն անտեղի է:

«Անգամ վահանը, որը թեեւ հատուկ միջոց չէ, դա էլ չենք տեսել առ այսօր: Նույնիսկ ցույցերի ժամանակ Կառավարության շենքի դիմաց կանգնած ոստիկաններն առանց վահանների են, չենք նկատել անգամ պասիվ պաշտպանության միջոց, ինչպիսին է, օրինակ, փշալարը: Միակ բանը, որը նկատվում է, ձեռնաշղթան է. երբեմն բերման ենթարկվողներին ձեռնաշղթա են հագցնում, ըստ էության՝ այդտեղ խնդիր չկա: Բերման ենթարկելն իրավաչափ է, եւ եթե ոստիկանները կասկածում են, որ անձը կարող է գործողության դիմել բերման ենթարկելու ընթացքում, ձեռնաշղթա են կիրառում: Դա ընդունված պրակտիկա է»,- ասում է նա:

Իոաննիսյանը նաեւ ընդգծում է՝ երեկվա ակցիաների ժամանակ արձանագրել են բազմաթիվ դեպքեր, երբ ցուցարարները ևս ագրեսիվ պահվածք են դրսեւորել ոստիկանների նկատմամբ:

«Ականատես ենք եղել ցուցարարների կողմից քաղաքացիների նկատմամբ բռնության, նաեւ՝ ոստիկանների նկատմամբ: Ականատես ենք եղել նաեւ ցուցարարների կողմից խուլիգանական գործողությունների դրսեւորումների, ինչպիսին է, օրինակ, իրենց չմիացող քաղաքացիներին հայհոյելը, մարդկանց վրա հարձակվելը եւ այլն: Երեկ նման դեպքեր շատ ենք արձանագրել: Երկուշաբթի օրը մենք տեսել ենք դեպք, երբ ոստիկանն էր ցուցարար ծեծում, երեկ էլ դեպք տեսանք, երբ ցուցարարն էր ոստիկանի դեմքին հարվածում: Տեսել ենք, երբ ցույցի հետ անհամաձայն վարորդների մեքենաներին են հարվածում ու վնասում»,- նշում է Իոաննիսյանը:

«Իրազեկ քաղաքացիների միավորում» ՀԿ նախագահը նաեւ նկատում է՝ ցուցարարները գնալով ավելի ագրեսիվ վարքագիծ են դրսեւորում. «Երկուշաբթի օրը ցուցարարներն ավելի հանգիստ էին, քան երեքշաբթի: Առնվազն այդ երկու օրերի միջեւ կար ակնհայտ տարբերություն: Միգուցե ագրեսիվությունը պայմանավորված է նրանով, որ այդ մարդիկ հանրային լայն աջակցություն չեն ստանում»:

Աղունիկ Հովհաննիսյան