Առաջ Գյումրիում տնակների թիվն ուռճացված էր, քանի որ ընտրություններին դրանցով որոշակի խնդիր էին լուծում. Շիրակի մարզպետ

ՀՀ Ազգային ժողովի տարածքային կառավարման, տեղական ինքնակառավարման, գյուղատնտեսության և շրջակա միջավայրի պահպանության հարցերի մշտական հանձնաժողովն արտագնա առաջին նիստն այսօր անցկացրեց Գյումրիում: Հանձնաժողովականներին Շիրակի մարզպետարանում հյուրընկալելիս Շիրակի մարզպետ Նազելի Բաղդասարյանը մեկ անգամ ևս ընդգծեց գործադիր և օրենսդիր մարմինների համագործակցության կարևորությունը:

«Բարի գալուստ Շիրակի մարզ, շատ ուրախ եմ, որ մարզային արտագնա այցելությունները մեր մարզից եք սկսում։ Ինձ համար միշտ առանձնակի կարևորություն է ներկայացրել համագործակցությունը օրենսդիր ու գործադիր մարմինների միջև: Այս ձևաչափը ևս մեկ հնարավորություն է՝ անդրադառնալու այն խնդիրներին, որոնք առկա են մարզում, և ակնկալում ենք, որ դրանց լուծման համար կլինեն օրենսդրական նախաձեռնություններ։ Լիահույս եմ, որ արդյունավետ աշխատանք կծավալվի, և վստահ եմ քննարկելու շատ հարցեր կունենանք»,- ասաց մարզպետը։

Հանձնաժողովի նախագահ Վահե Ղալումյանը, ի պատասխան մարզպետի, ասաց՝ ուրախ է, որ Շիրակում են, և արտագնա նիստերը հենց այս մարզից են մեկնարկում:

«Քննարկելու բազմաթիվ հարցեր ունենք, համակարծիք եմ, որ մեր համագործակցությունը հնարավորություն է հիմնահարցերի լուծման հարցում»,- նշեց Ղալումյանը։

Հանդիպման ընթացքում քննարկման առանցքում էր մարզի հիմնախնդիրներից հատկապես անօթևանությանը վերաբերող հարցը։ Նազելի Բաղդասարյանը հանգամանալից ներկայացրեց աղետի գոտու խնդիրներն ու դրանց լուծման ուղղությամբ ձեռնարկված քայլերը, անդրադարձավ ՀՀ վարչապետի հանձնարարականով ստեղծված հանձնաժողովի աշխատանքներին։

Խոսելով Գյումրին տնակներից ազատելու հարցի մասին՝ մարզպետն ասաց՝ դա ինքնանպատակ անել չի կարելի, քանի որ կարող է սոցիալական մեծ հիմնախնդրի հանգեցնել:

«Կան ընտանիքներ, որոնք իսկապես նախորդող ժամանակաշրջանում պարզապես դուրս են մնացել ցուցակներից: Ինչո՞ւ են դուրս մնացել, «բարեխիղճ պաշտոնյաների աշխատանքի՞ արդյունքում», արդյոք փաստաթղթային խնդիրների՞ պատճառով: Սա ամբողջական ուսումնասիրություն է պահանջում:

Երբ դետալներին ծանոթ չես, շատ վերացական մոտեցում կարող է լինել: Օրինակ՝ երկրաշարժի ժամանակ ընտանիքն ունեցել է 3 անդամ, կորցրել է 2 սենյակ, հիմա 12 անդամից է բաղկացած այդ նույն ընտանիքը: Նման ընտանիքների համար փոխհատուցում չի կարող լինել ընտանիքի թվով, ընտանիքն էլ մեծացել է, մի մասը՝ գնացել, պետության տված բնակարանում են ապրում, բայց մյուսները մնացել են տնակում: Հիմա այդ տնակը ո՞նց քանդեն:

Այս առումով ՀՀ կառավարությունը որևէ պարտավորվածություն չունի այս ընտանիքների հանդեպ, բայց չեմ կարծում, որ մարզպետարանը կամ համայնքապետարանը իրավասու են քանդել այդ տնակը, մարդկանց թողնել փողոցում: Սա է լուծում գտնելու դժվարությունը»,- խնդիրը մանրամասնեց Շիրակի մարզպետը:

Ըստ Բաղդասարյանի՝ տնակներում ապրող քաղաքացիների թիվը մշտապես փոփոխվում է: ՀԿ-ների ուսումնասիրությունը մի թիվ է ներկայացրել, մարզպետարանի բազայում այլ թիվ է եղել, համայնքապետարանինը՝ այլ: Այժմ փորձում են համադրել բոլորի տվյալները:

«Ես պետք է անկեղծ լինեմ, թե ինչու էր նախկինում տնակների թիվն ուռճացված: Սա նաև որոշակի խնդիր էր լուծում ընտրական գործընթացի ժամանակ: Տնակային հասցե կար գրանցված, ինչ-որ բնակիչներ, որոնք գոյություն չունեին: Սա ընտրական գործընթացներում շատ ակտիվ և ճկուն գործիք էր: Դրա համար էլ այս վերջին 2 տարիներին մենք ունեցանք տնակների թվի նվազում: Կարող է էլ ավելի նվազել: Դրա համար նախօրեին առաջարկվեց, որ կադաստրի միջոցները ևս ներգրավվեն գործընթացում, արբանյակային լուսանկարներով նույնականացվեն:

Ներկա պահին մեր ունեցած և Գյումրու համայնքապետարանի տրամադրած վերջին տվյալների համեմատությամբ մի քանի տասնյակի տարբերություն կա: Մեր մոտ թիվն ավելի քիչ է»,- ասաց Նազելի Բաղդասարյանը:

Խոսվեց նաև Շիրակի մարզում և Գյումրիում առկա վթարային շենքերի մասին, որոնք բնակեցված են: «Մարզում՝ 91, Գյումրիում 88 հատ 3-րդ և 4-րդ աստիճանի նման կառույց կա, որոնցում անհնար է անգամ պատկերացնելը, որ մարդիկ ապրում են, բայց ասեմ, որ՝ այո, ապրում են»,- տեղեկացրեց մարզպետը:

Գյուղական բնակավայրերում ևս բնակապահովման հարցի լուծման հետ կապված խնդիրներ կան, որոնց մասին Շիրակի մարզպետը նախընտրեց խոսել փակ ձևաչափով, առանց լրագրողների ներկայության:

Սամսոն Մատինյան