Ինչ շեմի վրա կկանգնի ռուբլի-դրամ փոխարժեքը. տնտեսագետի խոսքով՝ ստեղծված իրավիճակը կարող է նոր բիզնես միջավայր ստեղծել

Ուկրաինայում ռազմական հատուկ գործողությունների մեկնարկից հետո Ռուսաստանի և Արեւմուտքի միջև սկսվեց պատժամիջոցային պատերազմ: Դրանք տարածվեցին տնտեսության բազմաթիվ առանցքային ճյուղերի վրա: Այս ամենի ֆոնին էլ ռուսական ռուբլին սկսեց գահավիժել:

Վերջին օրերին հայկական դրամը ևս սկսել է արժեզրկվել մյուս հիմնական արտարժույթների՝ դոլարի, եվրոյի, բրիտանական ֆունտի նկատմամբ։ Եթե մեկ շաբաթ առաջ բանկերից ամերիկյան մեկ դոլարը կարելի էր ձեռք բերել 485 դրամով, ապա այսօր այն արժե ավելի քան 510 դրամ։

Տնտեսագետ Եղիշե Սողոմոնյանը, «Հայկական ժամանակ»-ի հետ զրույցում անդրադառնալով ռուբլու արժեզրկմանը և դրան հետևող խնդիրներին, նկատում է՝ ռիսկերը միայն Հայաստանում չեն, գրեթե ողջ աշխարհն է նույն կարգավիճակում հայտնվել:

«Հաշվի առնելով այն փաստը, որ ՀՀ-ն ԵԱՏՄ երկիր է, և կապերը մեծ են Ռուսաստանի հետ՝ ռիսկերը ավելի մեծ են: Մեր այն քաղաքացիները, որոնք ապրում են ՌԴ-ում կամ աշխատում են այնտեղ, եկամուտը ուղարկում են Հայաստան, ունենալու են ֆինանսական խնդիրներ, քանի որ ռուբլու արժեզրկման հետ կապված ռուսական տրանսֆերները նվազում են: Բացի դրանից, Ռուսաստանում կլինեն աշխատատեղերի կրճատումներ, ինչը կրկին վատ կանդրադառնա մեր քաղաքացիների վրա: Մենք տեսանք, որ դրամը նույնպես արժեզրկվեց դոլարի նկատմամբ, սակայն այս ամենի մեջ դրական կողմերն էլ պետք է նկատենք»,- կարծում է նա:

Տնտեսագետը, խոսելով իր իսկ նշած դրական կողմերի մասին, նշում է՝ Հայաստանը կարող է կամուրջ դառնալ Ռուսաստանի համար արտարժույթի հետ կապված փոխանցումների հարցում. «Նաև կարող է ձևավորվել նոր բիզնես միջավայր: Մենք կարող ենք շահել ներմուծման և արտահանման ծավալների աճի հաշվին: Ռուսական մի շարք ընկերություններ գրանցվում են ՀՀ-ում, բյուջեի մասով եկամուտների աճ կլինի: Դրական ազդեցություն կլինի նաև հանրային սննդի, զբոսաշրջության և այլ ոլորտների դեպքում: Բացասական կողմերը պետք է հակակշռել դրականով»:

Սողոմոնյանի դիտարկմամբ՝ ստեղծված իրավիճակը Հայաստանը պետք է ճիշտ օգտագործի, փորձի դրական օգուտներ քաղել: «Պետք է օգուտներ քաղել ու դրանք հասցնել մաքսիմումի: Այո, բացասական է դրամի արժեզրկման գործընթացը, սակայն կարծես թե կայունացման փուլ ենք մտնում: Դրամ-դոլար փոխարժեքի տարբերությունը նվազում է: 520 դրամը որպես վաճառքի գին, հուսով եմ, չի գերազանցի: Իսկ հետագա զարգացումները կախված են պատերազմական գործողություններից և սանկցիաներից, որոնք կիրառում է Եվրոպան, չնայած հիմնական ճնշումներն արդեն անցյալում են: Ապագայի ռիսկերը, որոնք նոր են ի հայտ գալու, ավելի հաղթահարելի են լինելու: Հիմա պետք է կենտրոնանալ դրական էֆեկտների վրա»,- ասում է Սողոմոնյանը:

Հարցին՝ ի՞նչ շեմի վրա կկանգնի ռուբլի-դրամ փոխարժեքը, զրուցակիցը նշում է. «Ամեն բան կախված է պատերազմական գործողությունների ընթացքից: Սակայն եթե գործողությունները մոտ ժամանակներում ավարտվեն, կարծում եմ՝ 500-510-ի շրջանակում»:

Դիտարկմանը, որ ՀՀ-ում մի շարք քաղաքացիներ աշխատում են այլ երկրներում գործող ընկերությունների հետ և իրենց աշխատավարձը ստանում այլ երկրներից, հարցին՝ ինչպիսի՞ խնդիրների առջև կարող են կանգնել մեր հայրենակիցները փոխարժեքների տատանման և սանկցիաների ֆոնին, տնտեսագետը նկատում է. «Գործատուները պետք է այնպիսի վճարահաշվարկային համակարգերով վճարումները կատարեն, որոնցով խնդիրներ չեն առաջանան: Պետք է ստեղծված իրավիճակով պայմանավորված՝ ճկունություն ցուցաբերել և ընտրել ապահով տարբերակ, խուսափել ռուսական վճարահաշվարկային համակարգերից, ինչը, կարծում եմ, ժամանակավոր է»:

Անյուտա Աթանեսյան