Արվեստը պետք է քայլի, իսկ Հայաստանն ապրի այդ արվեստով. Էլինա Պողոսյանը՝ հայկական արտադրության հագուստների հեղինակ

«Հայկական ժամանակ»-ը շարունակում է «Արարում են Հայաստանում» խորագրի ներքո ներկայացնել մեր երկրում իրենց սեփական բիզնեսն ստեղծած և տեղական արտադրության ապրանքատեսակների հեղինակներին: Շարքի այս անգամվա զրուցակիցը հայկական արտադրության հագուստների հեղինակ Էլինա Պողոսյանն է:

24-ամյա աղջիկն արդեն 2 տարի է, ինչ ստեղծել է իր փոքրիկ բիզնեսը։ Մասնագիտությամբ նկարիչ չէ, սակայն նկարելն ամենից շատ է սիրում, այդ պատճառով էլ որոշել է, որ պետք է հայկական արտադրության հագուստներ արտադրի և հայտնի նկարիչների գործերը կամ իր հեղինակային նկարներն արտացոլի այդ հագուստների վրա:

Արվեստը պետք է քայլի, կարծում է նա․ «Իմ բրենդը ներկայացնում եմ՝ որպես քայլող արվեստ։ Մարդիկ քայլում են, նրանց վրա նկար է։ Մի ժամանակ միայն կտավների վրա էի նկարում, բայց հասկացա, որ դա բավարար չէ։ Հագուստներն ինձ մոտ մի քանի տարբերակով են ստեղծվում․ առաջինը վերնաշապիկներն են, որոնք իմ հեղինակային դիզայնով կարում է դերձակը։ Տարբերակ կա, որ հայկական արտադրության արտադրամասի հետ եմ համագործակցում, իրենք արտադրում են հագուստը, ես՝ վրան նկարում։ Մեկ այլ տարբերակով էլ ես պատվիրում եմ արտերկրից բաճկոններ ու նկարում դրանց վրա»,- մանրամասնում է Էլինան:

Առաջին գործերն արել է 2020 թվականի սկզբներին. 6 վերնաշապիկի և այլ հագուստների վրա պատկերել է գունավոր աղջիկների, սակայն 3-4 ամիս ոչ մի գնորդ չի ունեցել։ Ասում է, որ երբեմն հուսահատվել է, սակայն դրա հետ մեկտեղ մարդկանց հետաքրքրվածությունն ստիպել է չհիասթափվել:

Հաջողություններ սկսել է գրանցել 2020 թվականի մարտի 8-ին, երբ այդ օրը Էլինան թողարկել է մարտիության նոր տեսականին․ «Իմ առաջին հաջողված տեսականին մարտի 8-ի հետ էր կապված։ Մարդիկ սկսեցին գնել որպես նվեր, և այդպես առաջին վաճառքներն ունեցա։ Դա էլ խթան հանդիսացավ, որ նոր տեսականիներ ստեղծեմ։ Հագուստների վրա նկարում եմ հայտնի նկարիչների աշխատանքները՝ Պիկասո, Շագալ, Վան Գոգ, հետո հայկական նկարիչների նկարներն էլ սկսեցի նկարել՝ Սարյան և Մինաս, բայց հիմա 99 տոկոսն իմ հեղինակային նկարներն են հագուստների վրա»:

Բիզնեսի հաջորդ ակտիվ շրջանն սկսվել է 2020-ի գարնանից, երբ կորոնավիրուսային հիվանդության պատճառով սահմանափակումներ էին գործում, և խանութներն ու մոլերը բնականոն չէին աշխատում։ Մարդիկ դիմել են օնլայն գնումների տարբերակին, և այդ ճանապարհին նրանց գրավել են նաև տարբեր նկարներով հայկական արտադրության հագուստները։

Էլինայի խոսքով՝ հագուստի վրա նկարելը տևում է շուրջ 2 ժամ, կախված նկարից, կարող է տևել նաև 3 օր։ Մեծ նշանակություն ունի՝ իր հեղինակա՞ծ նկարներն է նկարում, թե՞ այլ լուսանկարիչների։

«Լինում են հագուստներ, որ մտքումս ասում եմ՝ երանի չգնեն այս տարբերակը, որովհետև չեմ ուզում դրանից բաժանվել։ Չհաջողված տարբերակներ չեն լինում, ընդամենը մի դեպք է եղել, երբ ինձ դուր չի եկել արածս աշխատանքը, դա մի կողմ եմ դրել ու նորն եմ նկարել»,- ընդգծում է զրուցակիցը:

Էլինային աշխատանքի մեջ ոգևորում են մարդկանց կարծիքներն ու արձագանքները։ Ասում է՝ ամենից շատ ոգևորվում է այն բանից, երբ փողոցում հագուստի վրա արած իր նկարով որևէ մեկին է տեսնում։

Նրա հագուստները մարդիկ կարող են գնել սոցցանցերի միջոցով։ Վաճառքը դեռևս միայն Հայաստանում է, իսկ ապագայի համար ծրագրեր կան․ «Առաջին հերթին՝ օֆլայն դառնալ, այսինքն՝ ունենալ սրահ, որը գեղեցիկ ձևավորված կլինի, ու մարդը, ներս մտնելով, կտեսնի իմ լուսանկարները։ Դա կլինի սրահ, բայց նաև հնարավոր կլինի վաճառք իրականացնել։ Փոքրիկ ցուցահանդես, որտեղ մոդելները կներկայացնեն իմ հագուստները։ Առաջիկայում նաև կտավների ցուցադրություն եմ ունենալու։ Դա կլինի իմ առաջին անհատական ցուցահանդեսը, որտեղ կներկայացնեմ նաև հագուստները, սակայն շրջանակների մեջ, որպեսզի մարդիկ հասկանան, որ դա նույնպես նկար է։ Ուղղակի՝ քայլող արվեստ-նկար»,- ասում է մոդելավորողը:

24-ամյա աղջիկը նկատում է՝ արվեստը պետք է քայլի, իսկ Հայաստանն ապրի այդ արվեստով։

Մերի Խաչատրյան