ՀՀ-ում կրճատվել է միջմարզային երթուղիների թիվը. աստիճանաբար անցում կկատարվի միասնական երթուղային ցանցի

Հայաստանում, նախորդ տարվա սկզբի համեմատ, կրճատվել է միջմարզային երթուղիների թիվը: Դրանք 2021 թվականի հունվարին 150-ն էին, այժմ դարձել են 133-ը: Ուղեվարձի որեւէ փոփոխություն, սակայն, նախորդ տարվա համեմատ, չի եղել: Այս մասին «Հայկական ժամանակ»-ի հարցմանն ի պատասխան՝ տեղեկացրին ՀՀ տարածքային կառավարման եւ ենթակառուցվածքների նախարարության ավտոմոբիլային տրանսպորտի քաղաքականության վարչությունից:

Միջմարզային երթուղիներ սպասարկող 3 կազմակերպություն հրաժարվել է աշխատել 2022 թվականին, 2-ն էլ դիմել են՝ սպասարկումից հրաժարվելու համար, ինչը, սակայն, դեռ չի հաստատվել: Դադարեցվել է Երեւան-Նոյակերտ (թիվ 483), Երեւան-Երասխ (թիվ 468), Արաքս-Մասիս (թիվ 479) երթուղիների սպասարկումը:

Գործունեությունը դադարեցնելու խնդրանքով էլ դիմել են Երեւան-Աբովյան երթուղին սպասարկող (թիվ 261 ավտոբուս) «Կինգ դելյուքս» ՍՊԸ-ն ու Իջեւան-Վանաձոր երթուղին սպասարկող «Արմինե եւ Սյուզան» ՍՊԸ-ն (թիվ 669 ավտոբուս):

Ամիսներ առաջ էլ անդրադառնալով սպասարկումը դադարեցնելու խնդրանքով դիմած մեծաթիվ ընկերությունների խնդրին՝ ՏԿԵ-ից հայտնել էին, որ շուրջ երկու տասնյակից ավելի կազմակերպություններ դադարել են սպասարկել 2019 թվականից՝ համավարակի պիկ շրջանից հետո: Հիմնական պատճառներն են նվազ ուղեւորահոսքն ու մասնավոր տաքսի ծառայությունների ավելացումը:

ՏԿԵ ավտոմոբիլային տրանսպորտի քաղաքականության բաժնի պետի պաշտոնակատար Ռուզաննա Այվազյանն էլ «Հայկական ժամանակ»-ին փոխանցեց, որ մեկ օպերատորի կողմից Հայաստանի բոլոր մարզերում լինելու է կենտրոնացված սպասարկում:

Կոտայքի մարզում ունեն արդեն հաղթող կազմակերպություն. բոլոր երթուղիներն սպասարկելու է մի կազմակերպություն: «Մինչեւ մայիս նոր տրանսպորտային միջոցները Հայաստանում կլինեն, եւ այդ մարզի երթուղիները կսպասարկվեն նոր կոմպակտ դասի հարմարավետ ավտոբուսներով»,- ասաց նա: Նույնը ներդրվելու է մյուս մարզերում: Երեկ կայացել է Արարատի մարզը սպասարկող ընկերությունների մրցույթը, որին երեք ՍՊԸ էր դիմել: Ռուզաննա Այվազյանի փոխանցմամբ՝ հաղթողը կսպասարկի ամբողջ մարզը:

Արմավիրի մարզի Վաղարշապատի շրջանում եւս արդեն հաղթող կա: «Քանի որ տրանսպորտային պարկն ամբողջովին թարմացվում է, այսինքն՝ 2021-2022 թվականների արտադրության են լինելու միայն, ուստի ընկերությունները կոնկրետ պայմանագրեր են ներկայացնում մրցույթին: Պայմանագրում կետ կա, որտեղ նշվում է, որ մրցույթում հաղթող ընկերությունն առավելագույնը 6 ամիս ժամկետում պետք է ձեռք բերի ավտոբուսներ, ու երթուղիները շահագործելու են բացառապես նոր ավտոբուսներով:

Իսկ ինչ վերաբերում է Իջեւան-Վանաձոր երթուղուն, ապա այն մտնում է Տավուշ-Լոռի միջմարզային երթուղու մեջ: Այստեղ դեռ մրցույթ չի հայտարարվել, սակայն եթե ցանկություն ունեցող ընկերություն լինի, կարող են տվյալ երթուղուն տալ ժամանակավոր սպասարկման իրավունք: Այվազյանի փոխանցմամբ՝ 2018 թվականից իրականացվում է շատ մեծ ծրագիր, որի արդյունքը քաղաքացիները մի քանի ամսից կտեսնեն:

«Արդեն ունենք մշակած ծրագրային համակարգ, որի միջոցով կկարողանանք ապահովել ինտերակտիվ քարտեզի պահանջը. բջջային հավելվածով մարդիկ կկարողանան տեսնել, թե իրենց տրանսպորտային միջոցը որտե՞ղ է, ո՞ւր է հասել: Ծրագիրը պատրաստ է, սակայն այդ հավելվածը եւս կգործարկվի, երբ բոլոր մարզերում արդեն շահագործման հանձնվի նոր տրանսպորտային շարժակազմը»- հայտնեց Այվազյանը:

Հարցին՝ վճարման համակարգն ինչպե՞ս է լինելու, արդյոք մայրաքաղաքի տրանսպորտի նման կլինի, Այվազյանը նշեց, որ նման պահանջ չկա սահմանված, փոխադրողն ինքը կորոշի:

Հետագայում նախատեսվում է նաեւ միասնական տոմսային համակարգի ներդրում միջմարզային երթուղիների դեպքում, ինչը, սակայն, հնարավոր կլինի իրականացնել բոլոր երթուղիների ձեւավորումից հետո: Իսկ ինչ վերաբերում է ամբողջական տրանսպորտային համակարգին, ըստ Այվազյանի՝ մինչեւ 2023 թվականի ավարտը ենթադրվում է, որ աշխատանքներն ավարտված լինեն: