ԶԼՄ ներկայացուցիչներին «մշակում են» եզակի սարքով, արծաթի մասնիկներով. մեկնարկել է Պուտինի 17-րդ ամենամյա մեծ ասուլիսը

Մոսկվայում արդեն մեկնարկել է ՌԴ նախագահ Վլադիմիր Պուտինի՝ ամենամյա տարեվերջյան մեծ ասուլիսը: Այն լրատվամիջոցների հետ 17-րդ անընդմեջ հարցուպատասխանն է։ Այս տարի այն կանցկացվի «Մանեժ»-ում, որտեղ հրավիրված են 500 լրագրողներ:

Անցյալ տարի «Քովիդ-19» համաճարակը ճշգրտումներ կատարեց միջոցառման ձևաչափում. Վլադիմիր Պուտինը լրագրողների հետ զրուցեց Մոսկվայի մերձակայքում գտնվող Նովո-Օգարյովո նստավայրից՝ տեսաձևաչափով: Այս տարի վերադարձել են դեմ առ դեմ հանդիպման ֆորմատին, սակայն միջոցառման մասնակիցները պետք է անցնեն երեք ՊՇՌ թեստ:

Պուտինի տարեվերջյան ասուլիսներն ավանդաբար մի քանի ժամ են տևում, ընթանում առանց ընդմիջումների: 2020 թվականին մամուլի ասուլիսը տևել է 4 ժամ 30 րոպե, երկրի ղեկավարը պատասխանել է 60 հարցի։

Մեծ մամուլի ասուլիսներ անցկացնելու պրակտիկան գոյություն ունի 2001 թվականից։ Պուտինն այն ներկայացրել է իր առաջին նախագահական ժամկետում։ Դա լրագրողների հետ ամենակարճ տարեվերջյան հանդիպումն էր, այն տևել է 1,5 ժամից մի փոքր ավելի։ Միջոցառմանը մասնակցել են 400 լրագրողներ, որոնք 22 հարց են տվել Ռուսաստանի տնտեսական և քաղաքական զարգացման, Չեչնիայի իրավիճակի և միջազգային հանրությանը երկրի ինտեգրման վերաբերյալ։

Հետագա բոլոր ասուլիսները տարեցտարի ավելի ու ավելի երկար էին դառնում։ Արդեն 2006 թվականին միջոցառումը տևել է 3 ժամ 26 րոպե, տրվել է 76 հարց, այդ թվում՝ ԱՊՀ-ում գազային հակամարտությունների, Պաղեստինում ՀԱՄԱՍ շարժման հաղթանակի, ռուսական հասարակական կազմակերպությունների իրավիճակի, զինված ուժերում իրավիճակի և ռուս-վրացական լրտեսական սկանդալի մասին:

Ամենաերկար ասուլիսը տեղի է ունեցել 2008 թվականին. նախագահը լրագրողների հետ զրուցել է 4 ժամ 40 րոպե, նրան տրվել է 106 հարց, այդ թվում՝ գնաճի, Չեչնիայի և Ինգուշեթիայի ընտրությունների, Ստավրոպոլի երկրամասում միգրացիոն քաղաքականության և երրորդ նախագահական ժամկետի հնարավորության մասին:

2012 թվականին տեղի ունեցավ Պուտինի առաջին ասուլիսը Դմիտրի Մեդվեդևի նախագահությունից հետո։ 4 ժամ 33 րոպեում պետության ղեկավարը ստացել է մի քանի ոչ ստանդարտ հարցեր, այդ թվում՝ աշխարհի վերջի մասին։ Լրագրողներին ակտիվորեն հետաքրքրում էր ամերիկյան քաղաքացիների կողմից ռուս երեխաների որդեգրումն արգելող օրինագծը։

2013 թվականին Պուտինը Ուկրաինայի հետ հարաբերությունների մասին հարցին պատասխանել է ամենաերկարը՝ գրեթե 15 րոպե։ Հարց ու պատասխանում այս երկիրը հիշատակվել է 55 անգամ։ Ընդհանուր առմամբ, նախագահը 4 ժամ 5 րոպեում պատասխանել է 73 հարցի։ Հարցերի ավելի քան 30%-ը նվիրված էր միջազգային հարաբերությունների թեմային։

Այս ձևաչափի ողջ պատմության ընթացքում ռեկորդային թվով լրագրողներ հավատարմագրվել են 2019 թվականի Մեծ մամուլի ասուլիսի համար: Այդ տարի միջոցառմանը մասնակցել են 1895 լրատվամիջոցների ներկայացուցիչներ:

Բայց բոլորին չէ, որ հաջողվում է հարց ուղղել նախագահին: Այդ տարի նախագահը 4 ժամ 19 րոպեում պատասխանել է 55 լրագրողների 71 հարցի, հիմնականում հասարակության և սոցիալական ոլորտի թեմայով։ Պուտինն այնուհետ ասել է, որ որպես պետության ղեկավար՝ իր համար ամենադժվար իրադարձությունները ահաբեկչական հարձակումներն են Բեսլանում և Մոսկվայի Դուբրովկայի թատերական կենտրոնում, և որ ինքը երբեք չի մոռանա այդ իրադարձությունները։

Ինչպես հայտնի է, տարեվերջյան այս մեծ ասուլիսների ժամանակ լրագրողները փորձում են տարատեսակ մեթոդներ՝ նախագահի ու նրա օգնականի ուշադրությունը գրավելու և հետևաբար հարց տալու հնարավորություն ստանալու համար: Դեռ տարիներ առաջ նրանք հսկայական պաստառներ էին պատրաստում՝ տարատեսակ, երբեմն նույնիսկ զավեշտի հասնող գրառումներով:

Դեռ 3 տարի առաջ հատուկ կարգ սահմանվեց այն մասին, որ լրագրողների պաստառները պետք է լինեն միայն Ա3 ֆորմատի չափով: Սա արվում է՝ տեսա և լուսանկարիչների աշխատանքին չխոչընդոտելու նպատակով:

Գործող կարգի համաձայն՝ հարցի հնարավորություն ստացած ԶԼՄ ներկայացուցիչը կարող է 2 հարց ուղղել միաժամանակ՝ սպասելով 2 պատասխանի:

Այս տարի զարմանալի չէ, որ հատուկ ուշադրություն է դարձվել սանիտարահամաճարակային պահանջներին։ Մասնավորապես՝ Պետդեպարտամենտի ղեկավարի մամուլի քարտուղար Ելենա Կրիլովան ասել է, որ ««Մանեժ»-ում տեղադրվել է եզակի սարք, որը հատուկ արծաթի իոններով կմշակի մուտքով անցնող բոլոր լրագրողներին»։  Նման մասնիկներով մշակումը բացարձակապես անվտանգ է և, ինչպես ասում է Կրիլովան, «նույնիսկ օգտակար»:

Անգամ լրատվամիջոցների ներկայացուցիչներին հատկացված դիմակներն են մշակված նշված արծաթի մասնիկներով:

Քիչ առաջ սենյակ է բերվել Պուտինի անձնական թերմոբաժակներից մեկը, որը նրա ասուլիսների անբաժան ուղեկիցն է, այնուհետ մտել է Պուտինն ու ասուլիսը մեկնարկել է: