Ճարտարապետության և շինարարության Հայաստանի ազգային համալսարանում բացվեց ճանապարհաշինարարական փորձարկումների լաբորատորիա

Ճարտարապետության և շինարարության Հայաստանի ազգային համալսարանում (ՃՇՀԱՀ) Համաշխարհային բանկի «ՇԻՆԼԱԲ» դրամաշնորհային ծրագրի շրջանակում այսօր հանդիսավորությամբ բացվել է Ճանապարհաշինարարական փորձարկումների լաբորատորիան։ Միջոցառմանը ներկա են եղել ՀՀ ԿԳՄՍ նախարար Վահրամ Դումանյանը և նախարարի տեղակալ Կարեն Թռչունյանը։

Այս մասին տեղեկացնում է ՀՀ ԿԳՄՍ նախարարության հասարակայնության հետ կապերի և տեղեկատվության վարչությունը:

Ծրագրի նպատակն «Ավտոճանապարհներ, կամուրջներ և թունելներ» կրթական ծրագրի դասավանդման և ուսումնառության կատարելագործումն է, գիտահետազոտական գործունեության զարգացումն ու առևտրայնացումը (կրթություն- գիտություն-բիզնես կապի ամրապնդումը), ինչպես նաև բուհի ուսումնագիտական գործառույթների ընդլայնումն ու կարողությունների հզորացումը։

Շնորհավորելով ներկաներին նոր լաբորատորիայի բացման կապակցությամբ՝  ԿԳՄՍ նախարար Վահրամ Դումանյանն ասել է, որ սա ցայտուն օրինակ է, թե ինչպես են այսօր բուհերում ստեղծվում լաբորատորիաներ, որոնք, կրթության որակն ապահովելուց զատ, կարող են նաև գործնական խնդիրներ լուծել տնտեսության համար։

«Այս մոտեցումն ունի մեծ ապագա, և մենք ամեն ջանք գործադրելու և խրախուսելու ենք, որ բոլոր բուհերում ստեղծվեն նմանօրինակ հնարավորություններ՝ գործնականում աշխատող լիարժեք լաբորատորիաներ»,- ասել է նախարարը։

Նրա խոսքով՝ արդեն այսօր հանրապետության ամբողջ տարածքում նկատելի են որակյալ ավտոճանապարհները, և նոր լաբորատորիայի առկայությունը շինարարական կազմակերպություններին տարբեր հետազոտություններ պատվիրելու և գիտական արդյունք ստանալու հնարավորություն կտա. «Որակյալ ճանապարհ ունենալու համար պետք է կատարել որակյալ հետազոտություն։ Ընդհանրապես, շինարարությունը շատ պատասխանատու ոլորտ է, շինարարական նյութերի որակից է կախված մեր բոլորի անվտանգությունը»։

Նախարար Վահրամ Դումանյանը նաև նշել է, որ բյուջետային քննարկումներն ընթացքի մեջ են, կրթության և գիտության ոլորտներն առաջնահերթությունների շարքում են, և պետական բյուջեից հատկացվելիք միջոցները տարեցտարի ավելանալու են։ Ինչ վերաբերում է գիտության ոլորտի դրամաշնորհային ծրագրերին, ապա փորձնական նախագծերի արդյունքները գոհացուցիչ են, և դրանք նույնպես շարունակական են լինելու։

Ճանապարհաշինարարական փորձարկումների լաբորատորիան ամբողջությամբ հագեցած է նորագույն թվային սարքավորումներով, կից բացվել է համակարգչով և ցուցադրման պրոյեկտորով հագեցված լսարան, ուսանողները տեսական ժամերը կանցկացնեն լսարանում, գործնականը՝ լաբորատորիայում։

Ճանապարհաշինարարական փորձարկումների լաբորատորիայի սարքավորումները հնարավորություն են տալիս ուսումնական նպատակով փորձարկել ճանապարհաշինական նյութեր՝ ասֆալտաբետոն, բիտում, խիճ, ինչպես նաև որոշել բնահողի խտությունը և արտաքին բեռնվածքի տակ կամուրջների կամ այլ կառույցների առանձին տարրերի ճկվածքները։

ՃՇՀԱՀ-ի ռեկտոր Եղիազար Վարդանյանը, շնորհավորելով ներկաներին, աջակցության համար շնորհակալություն է հայտնել նախարարությանն ու «Կրթական ծրագրերի կենտրոն» ԾԻԳ-ին. «Այս լաբորատորիան իրականություն դարձավ երկկողմ համագործակցության արդյունքում, որի նպատակն է ոչ միայն բարելավել ուսումնական գործընթացը, այլև խթանել գիտական ծրագրերի իրականացումը՝ ի նպաստ տնտեսության զարգացմանը»։

«ՇԻՆԼԱԲ» ծրագիրն իրականացվել է Ճարտարապետության և շինարարության Հայաստանի ազգային համալսարանի որդեգրած «Որակյալ կրթությունը՝ շինարարական բարձր որակի ապահովումն է» ռազմավարության շրջանակում։ Դրամաշնորհային ծրագրի շրջանակում նախատեսված է «Ավտոճանապարհներ, կամուրջներ և թունելներ» կրթական ծրագրում ընդգրկված մասնագիտական դասընթացների թվայնացում՝ Moodle էլեկտրոնային հարթակի կիրառմամբ, այդ թվում՝ համապատասխան պրոֆեսորադասախոսական կազմի մեթոդական վերապատրաստում։

Մինչ բացման արարողությունը նախարար Վահրամ Դումանյանն ու փոխնախարար Կարեն Թռչունյանը բուհի ներկայացուցիչների ուղեկցությամբ շրջայց են կատարել Շինարարական նյութերի և պատրաստվածքների, Ջրային պաշարների և շրջակա միջավայրի պահպանության և արդյունավետ օգտագործման, Գրունտային մեխանիկայի ուսումնագիտական լաբորատորիաներում, ծանոթացել հնարավորություններին և նոր ստացված սարքավորումներին։Այցի ավարտին անդրադարձ է կատարվել նաև բուհի շենքային պայմանների բարելավման խնդրին։