Չեմպիոնական մրցավազքում կարող է «ֆոտոֆինիշ» պահանջվել. Իրավիճակը Հայաստանի Պրեմիեր լիգայում վերջին տուրից առաջ

Ֆուտբոլի Հայաստանի առաջնությունը հետաձգված երեք խաղերի ավարտից հետո դուրս եկավ վերջնական եզրագիծ: Ու եթե նախորդ շաբաթ 5 թիմեր պայքարում էին չեմպիոնության և եվրագավաթային գոտու համար, ապա հիմա՝ եզրափակիչ 25-րդ տուրից առաջ այդ պայքարում մնացին երկուական թիմեր:

Շաբաթ օրը տեղի ունեցած երկու խաղերից հետո իրավիճակն ավելի էր սրվել: «Ուրարտուն» հաղթել էր «Արարատին»՝ վճռականորեն մտնելով չեմպիոնական պայքարի մեջ, իսկ «Ալաշկերտը» հաղթել էր «Արարատին»՝ դառնալով չեմպիոնական մրցավազքի գլխավոր ֆավորիտը: Եթե երեքշաբթի օրը «Արարատ» - «Ալաշկերտ» խաղում ոչ-ոքի գրանցվեր, ապա վերջին տուրում կարող էր նույնիսկ այնպիսի իրավիճակս ստեղծվել, որ միանգամից 5 թիմեր ունենային 41-ական միավոր: Սակայն «Ալաշկերտը» նվազագույն հաշվով հաղթանակ տարավ՝ դրանով վերջ դնելով ֆանտաստիկային ժանրի սիրահարների ուրախությանը:

Այժմ իրավիճակը վերջին տուրից առաջ շատ ավելի պարզ է, բայց ոչ պակաս հետաքրքիր: «Ալաշկերտը» գլխավորում է մրցաշարային աղյուսակը 43 միավորով, «Նոան» հետ է մնում երկու միավորով: Հենց այս երկու թիմերն են պայքարելու չեմպիոնության և Չեմպիոնների լիգայի որակավորման փուլում հանդես գալու համար: «Ուրարտուն», «Արարատ-Արմենիան» և «Արարատը» չեմպիոնության համար պայքարից դուրս մնացին: Առաջին երկուսն ունեն 38-ական, իսկ երրորդը՝ 37 միավոր: Բայց «Արարատը», հաղթելով Հայաստանի գավաթի խաղարկությունում, արդեն ապահովել է իր համար Եվրոպայի Կոնֆերենցիաների գավաթի ուղեգիրը: Այնպես որ «Շիրակի» հետ վերջին տուրի հանդիպումն արդեն նշանակություն չունի «Արարատի» համար: Մինչդեռ «Ուրարտուն» և «Արարատ-Արմենիան» ամեն ինչ պետք է անեն իրենց հաղերը հաղթելու համար, որպեսզի եվրագավաթների ուղեգիր նվաճեն: Վերջին տուրում չեմպիոնության համար պայքարող «Ալաշկերտը» հանդիպելու է եվրագավաթների համար պայքարող «Արարատ-Արմենիային»: Դա միակ խաղն է, որտեղ երկու կողմերին էլ պարտադիր միավորներ են պետք: Մրցաշարային աղյուսակի այս խառնաշփոթը փորձենք պարզեցնել խաղերի հավանական ելքերով:

Չեմպիոնական պայքար

Չեմպիոնական պայքարում սխեմաները շատ չեն: Ամենապարզը՝ եթե «Ալաշկերտը» հաղթում է «Արարատ-Արմենիային», ապա դառնում է չեմպիոն և հանում բոլոր հարցերը: Եթե «Ալաշկերտը» ոչ-ոքի է խաղում, ապա նույնպես նվաճում է չեմպիոնի կոչումը, քանի որ նույնիսկ եթե «Նոան» հաղթի «Վանին» և միավորներով հավասարվի «Ալաշկերտին», միևնույն է հետ է մնում, քանի որ միմյանց դեմ երեք խաղերում «Ալաշկերտը» երկու հաղթանակ է տարել: Իսկ եթե «Ալաշկերտը» պարտվի, ապա «Նոան» կարող է չեմպիոն դառնա, եթե հաղթի «Վանին»: Եթե «Նոան» վերջին տուրում միավորներ կորցնի, ապա «Ալաշկերտը» կդառնա չեմպիոն՝ անկախ իր հանդիպման արդյունքից:

Եվրագավաթային պայքար

Այստեղ ամեն ինչ շատ ավելի բարդ է: Թեև «Արարատն» արդեն չի պայքարում ոչ մի բանի համար, բայց «Շիրակի» հետ հանդիպման արդյունքը կարող է վճռական նշանակություն ունենալ եվրագավթային պայքարում: Պարզ է, որ եթե թիմերից մեկը վերջին տուրում սայթաքի, մյուսը՝ հաղթի, ապա բարդ հաշվարկներ չեն լինի: Նման հաշվարկներ կարող են պահանջվել, եթե թիմերը վերջին տուրում նույն արդյունքը ցույց տան իրենց մրցակիցների հետ խաղերում և առաջնության վերջում հավասար միավորներ ունենան: Հնարավոր է նմանատիպ երեք սցենար:

Տարբերակն 1. Եթե «Ուրարտուն» և «Արարատ-Արմենիան» վերջին տուրում հաղթեն, իսկ «Նոան» պարտվի «Վանին», ապա «Ուրարտուն», «Արարատ-Արմենիան» և «Նոան» կունենան 41-ական միավոր: Այս դեպքում ըստ ՀՖՖ կանոնադրության պետք է հաշվել, թե ով է այս երեք թիմերի միջև խաղերում ավելի շատ միավորներ վաստակել: Նման պարագայում «Արարատ-Արմենիան» կունենա 9, «Նոան»՝ 8, իսկ «Ուրարտուն»՝ 7 միավոր, հետևաբար այս երեքից «Ուրարտուն» կմնա առանց ուղեգրի:

Տարբերակ 2. Եթե «Ուրարտուն» և «Արարատ-Արմենիան» պարտվեն, իսկ «Արարատը» ոչ-ոքի խաղա «Շիրակի» հետ: Այս դեպքում «Ուրարտուն», «Որարատը» և «Արարատ-Արմենիան» կունենան 38-ական միավոր: Երեք թիմերի մրցավեճում «Ուրարտուն» և «Արարատն» ունեն 8-ական միավոր, իսկ «Արարատ-Արմենիան»՝ 6: Նման դասավորվածությամբ «Արարատ-Արմենիան» կմնա առանց եվրագավաթների:

Տարբերակ 3. Եթե վերջին տուրում «Արարատ-Արմենիան» ոչ-ոքի խաղա «Ալաշկերտի» հետ, իսկ «Ուրարտուն»՝ «Փյունիկի» հետ, ապա «Ուրարտուն» և «Արարատ-Արմենիան» կունենան 39-ական միավոր: Եթե երկուսն էլ պարտվեն, իսկ «Արարատը» կամ հաղթի կամ պարտվի «Շիրակին», ապա միայն «Ուրարտուն» և «Արարատ-Արմենիան» կունենան 38-ական միավոր: Իսկ եթե երկուսն էլ հաղթեն, իսկ «Նոան» միավորներ վաստակի «Վանի» հետ խաղում, ապա միայն «Ուրարտուն» և «Արարատ-Արմենիան» կունենան 41-ական միավոր: Այս դեպքում պետք է հաշվել, թե միմյանց դեմ խաղերում թիմերը որքան միավոր են վաստակել: «Ուրարտուն» և «Արարատ-Արմենիան» միմյանց դեմ խաղերում մեկական հաղթանակ են տարել, մեկ խաղ էլ ավարտվել է ոչ-ոքի: Խփած-բաց թողած գոլերի տարբերություն նույնպես նույնն է՝ 2-2: Ըստ ՀՖՖ կանոնադրության մրցաշարային աղյուսակում թիմերի դասավորվածության հաջորդ չափորոշիչը առաջնությունում թիմերի տարած հաղթանակների քանակն է: «Ուրարտուն» «Արարատ-Արմենիայի» հաեմատ մեկ հաղթանակ ավել է տարել, այնպես որ այս դեպքում ուղեգիրը բաժին կհասնի «Ուրարտուին»:

Տեսնում ենք, որ եթե չեմպիոնական պայքարում ամեն ինչ «Ալաշկերտի» ձեռքերում է, ապա եվրագավթային պայքարում նույնիսկ հաղթելու դեպքում թիմերից որևէ մեկը չի կարողա երաշխավորված ուղեգիր ունենալ՝ անկախ մյուս հանդիպումների արդյունքներից:

Ավելացնենք, որ Հայաստանի առաջնության վերջին տուրի հանդիպումները տեղի կունենան մայիսի 28-ին ու կսկսվեն նույն ժամին՝ 17:30: