ՄԱԿ-ում 3-րդ անգամ չեն կարողացել համաձայնության գալ իսրայելա-պաղեստինյան հարցի շուրջ. Էրդողանը Բայդենին է մեղադրում

Մերձավոր Արևելքում պաղեստինա-իսրայելական հակամարտության սրացումը շարունակվում է: Փոխադարձ հրթիռային հարվածներ, զոհեր ու վիրավորներ, ավերված շինություններ, քննարկումներ ու հանդիպումներ և զինադադարի բացառում է եղել նաև այսօր:

Երրորդ անգամ ՄԱԿ-ի Անվտանգության խորհուրդը ԱՄՆ-ի առարկությունների պատճառով չի կարողացել համաձայնության գալ Իսրայելի և Գազայի հատվածի ռազմական գործողությունները դադարեցնելու մասին համատեղ հայտարարության շուրջ:

«ԱՄՆ-ը դեմ արտահայտվեց հայտարարության առաջարկվող նախագծին կիրակի օրը կայացած բաց հանդիպումից հետո», -հայտնում է TACC-ը:

Ավելի վաղ Անվտանգության խորհուրդը շաբաթվա ընթացքում երկու անգամ անցկացրել էր փակ հանդիպումներ, որի արդյունքում նույնպես հնարավոր չէր եղել համատեղ հայտարարություն մշակել: Վաշինգտոնը պնդում է, որ փաստաթուղթը պետք է ոչ թե 2 կողմերին դատապարտի, այլ հենց պաղեստինյան արմատական ՀԱՄԱՍ շարժման գործողությունները:

Ճեպազրույցի ընթացքում ՄԱԿ-ի Գլխավոր քարտուղարի պաշտոնական ներկայացուցիչ Ստեֆան Դյուժարիկը մեկ անգամ ևս շեշտել է «Անվտանգության խորհրդի միասնական հայտարարության անհրաժեշտությունը, որը անկասկած  կազդի իրավիճակի վրա»:

Միաժամանակ, Սպիտակ տան մամուլի քարտուղար Ջեն Փսակին ամենօրյա ճեպազրույցում այսօր հայտարարել է, որ ԱՄՆ նախագահ Ջո Բայդենը պաշտպանում է իսրայելա-պաղեստինյան հակամարտության լուծումը երկու պետությունների փոխհամաձայնության սկզբունքով:

«Մենք բոլորս գիտենք, որ բռնությունը դադարեցնելու միակ միջոցը այն է, որ ժամանակի ընթացքում գտնել լուծում, որը հիմնված կլինի երկու պետությունների համակեցության վրա: Նախագահը այս հանգստյան օրերին կայացած երկու հեռախոսազանգերի ժամանակ էլ (բանակցություններ Իսրայելի վարչապետի հետ Բենյամին Նեթանյահուի և Պաղեստինի նախագահ Մահմուդ Աբբասի հետ) շեշտել է իր վճռական նվիրվածությունը երկու երկրների համակեցության վրա հիմնված կարգավորմանը, որը իսրայելա-պաղեստինյան հակամարտության արդար և կայուն լուծման լավագույն միջոցն է»,- ասել է նա:

Նրան հարցրել են, թե արդյոք Բայդենը պատրա՞ստ է անձամբ մասնակցել որպես միջնորդ հակամարտության երկարաժամկետ կարգավորմանը: Ըստ Սպիտակ տան խոսնակի, ամերիկյան հնարավոր միջնորդությունը պահանջելու է «երկու կողմերի պատրաստակամությունը՝ մասնակցելու այս բանակցություններին և քննարկելու իրավիճակից դուրս գալու ուղիները և միջնորդության թեման»:

«Մենք, իհարկե, դեռ չենք հասել այս փուլին, և երկու կողմերն էլ պետք է որոշում կայացնեն` արդյո՞ք նրանք ցանկանում են քայլել այս ճանապարհով », - ավելացրել է Փսակին: 

Ինքը Բայդենն էլ, Սպիտակ տանը պատասխանելով լրատվամիջոցների ներկայացուցիչների հարցերին, հայտնել է, որ նոր  քննարկումներ է ունենալու պաղեստինա-իսրայելական հակամարտության գոտում տիրող իրավիճակի մասին  Իսրայելի վարչապետ Բենյամին Նեթանյահուի հետ հեռախոսազրույցում:

«Ես կխոսեմ Վարչապետի հետ,  դրանից հետո կարող եմ ձեզ հետ խոսել», - ասել է նա լրագրողների՝ Մերձավոր Արևելքում հրադադարի վերաբերյալ իր դիրքորոշման մասին հարցին ի պատասխան:

Մինչ Բայդենը պատրաստվում է սպասվելիք հեռախոսազանգերին ու  քննարկումներին, նրան Մերձարևելքի հակամարտության սրման համար քննադատության է արժանացրել Թուրքիայի նախագահ Ռեջեփ Թայիփ Էրդողանը: Վերջինս նախատել է Բայդենին՝ Ամերիկյաի կողմից Իսրայելին 735 միլիոն դոլար արժողությամբ բարձր ճշգրտության զենք վաճառելու համար:

«Պարոն Բայդեն, ցավոք, դուք ձեր արյունոտ ձեռքերով պատմություն եք գրում: Դուք ստիպեցիք մեզ դա ասել», - ասել է նա Անկարայում կայացած մամուլի ասուլիսում ՝ մեկնաբանելով այն տեղեկությունները, թե Բայդենի վարչակազմը հաստատել է Իսրայել զենքի վաճառքը: Այս հակամարտության մեջ, ինչպես հայտնի է, Թուրքիան պաշտպանում է Պաղեստինի շահերը՝ Երուսաղեմը համարելով պաղեստինյան ու նշելով, որ պատրաստ է աջակցել Երուսաղեմի պաշտպանությանը:

Ավելի վաղ Էրդողանը հայտարարել էր, որ պատրաստվում է «աջակցել» Պաղեստինին ճիշտ այնպես, ինչպես Ադրբեջանին է նախորդ տարի «աջակցել» ղարբաղյան պատերազմի ընթացքում:

 «Մենք բարկացած ենք ահաբեկչական Իսրայել պետության լծից: Իսրայելը հատել է բոլոր սահմանները: Ինչպես մենք վճռականորեն աջակցում էինք Ադրբեջանին Ղարաբաղում, այսօր մենք նույն զգացումներով սկսում են գործողություններ՝ ընդդեմ պաղեստինյան քաղաքներում և Երուսաղեմում ճնշումների: Նույն վճռականությամբ, ինչ մենք պաշտպանել ենք մեր «սիրիական սահմանը: Իսրայելին կանգնեցնելը մարդկության պատվի պարտքն է: Մենք միջազգային հանրությանը գործելու կոչ ենք անում: ՄԱԿ-ի մասնակցությունն անհրաժեշտ պայման է: Այն, ինչ հարկավոր է անել, պետք է արվի անհապաղ, այլապես անխուսափելի են սարսափելի հետևանքները»,-ավելացրել է Թուրքիայի նախագահը:

Գազայում պաղեստինյան արմատական խմբավորումները և իսրայելական բանակը ավիահարվածներ են փոխանակում մայիսի 10-ից: Հրթիռային հարձակումները հաջորդեցին Արևելյան Երուսաղեմի Ալ-Աքսա մզկիթում տեղի ունեցած անկարգություններին, երբ Իսրայելի դատարանի որոշմամբ` այնտեղ ապրող արաբական ընտանիքներից Շեյխ Ջարրահում տներ գրավելու մասին: Վերջին տվյալների համաձայն ՝ իսրայելական կողմից զոհվել է առնվազն 10 մարդ, հարյուրավոր մարդիկ վիրավորվել են: Պաղեստինյան կողմը հայտնում է ավելի քան 200 մարդու մահվան և գրեթե 6000 վիրավորի մասին Իսրայելի հետ հակամարտության ներկա սրման ընթացքում: