Գարիկ Սարգսյանն անդրադարձել է Տիգրան Վահրամյանին աշխատանքից ազատելու պատճառներին

Պետական գույքի կառավարման կոմիտեի նախագահ Գարիկ Սարգսյանն անդրադարձել է Կուրորտաբանության և ֆիզիկական բժշկության գիտահետազոտական ինստիտուտի տնօրենի ժ/պ Տիգրան Վահրամյանի աշխատանքից ազատման պատճառներին՝ արձագանքելով երեկ տարածած նրա հաղորդագրությանը: 

Ըստ Սարգսյանի՝ Վահրամյանին աշխատանքից ազատելու պատճառներից մեկը 2019 թվականի հոկտեմբերի 1-ից մինչև 2020 թվականի դեկտեմբերի 31-ը ՀՀ առողջապահության նախարարի համապատասխան հրամանով ձևավորված հանձնաժողովի ուսումնասիրության ընթացքում արձանագրված խախտումներն են, որոնց ընդհանուր գումարը կազմել է 18.545.000 ՀՀ դրամ: Այն ենթակա է փոխանցման ՀՀ պետական բյուջե։

«Հանձնաժողովի կողմից արձանագրված մի շարք խախտումների, թերությունների և թերացումների շարքում հատկանշական և հատկապես անընդունելի է Տ. Վահրամյանի կողմից իր հրամանով ինքն իրեն իր վարորդ ձևակերպելը և 2019-2020թթ. ժամանակահատվածում 1.411.200 ՀՀ դրամ վարձատրություն ստանալը։ Սա այն դեպքում, երբ ՀՀ կառավարության 07.07.2011թ. թիվ 992-Ն որոշմամբ ընկերության գործադիր մարմնի պաշտոն զբաղեցնող անձը չի կարող կատարել այլ վճարովի աշխատանք՝ բացի գիտական, մանկավարժական և ստեղծագործական աշխատանքից»,- իր գրառման մեջ նշել է Սարգսյանը:

Հաջորդ պատճառը, ըստ Սարգսյանի, ՓԲԸ-ի կարիքների համար փոխկապակցված անձանցից՝ Գևորգ Վահրամյան ԱՁ-ից, ձեռք բերված հիմնական միջոցներն են՝ խախտելով «Բաժնետիրական ընկերությունների մասին», «Արժեթղթերի շուկայի մասին» ՀՀ օրենքների պահանջները, փոխկապակցված անձանց համար սահմանված օրենսդրական սահմանափակումներին ներկայացվող պահանջները:

Պետական գույքի կառավարման կոմիտեի նախագահը շեշտում է՝ Տիգրան Վահրամյանին աշխատանքից ազատելու մասին որոշումն ուղղված է ինստիտուտի գործունեության արդյունավետության բարձրացմանը, միջոցների ռացիոնալ օգտագործմանը, ինչպես նաև պայմանավորված է Հայաստանի Հանրապետության՝ որպես տվյալ ՓԲԸ-ի միակ բաժնետիրոջ իրավունքների և շահերի պաշտպանությամբ։

Ըստ Սարգսյանի՝ արձանագրված խախտումների մասին տեղեկություններն ուղարկվել են իրավապահ մարմիններին։

Կուրորտաբանության և ֆիզիկական բժշկության գիտահետազոտական ինստիտուտի տնօրենի ժ/պ Տիգրան Վահրամյանը երեկ իր ֆեյսբուքյան էջում գրառում էր կատարել, որում նշել էր՝ ապրիլի 28-ին ստացել է բանավոր առաջարկ՝ գրել դիմում զբաղեցրած պաշտոնից ազատվելու վերաբերյալ կամ հեռացվել աշխատանքից՝ որպես վատ կառավարիչ՝ վերադասի՝ պետական գույքի կառավարման կոմիտեի նախագահ Գարիկ Սարգսյանի հրամանով։  Ըստ նրա, աշխատանքից ազատելու որոշման դրդապատճառների մասին իրեն տեղյակ չեն պահել։

«2018թ․ վերջից նշանակվել եմ ԿՖԲԳՀԻ տնօրենի պաշտոնակատար (Ֆիզիոթերապիայի ինստիտուտ՝ Օրբելի փողոց)։ Իմ ղեկավարությամբ 2.5 տարվա ընթացքում կատարվել են բազմաթիվ բարեփոխումներ, որը կարող են փաստել և՛ աշխատակիցները, և՛ հիվանդները։ Վերադաս ղեկավարության կողմից չեմ ստացել ոչ մի դիտողություն իրականացվող աշխատանքների վերաբերյալ։ Բուժհիմնարկը 20 տարուց ավելի գտնվում է սեփականաշնորհման գործընթացում։ Պատճառի մասին զարմացած հարցիս հնչել է պատասխան, որ պարտավոր չէ տեղյակ պահել ինձ որոշման դրդապատճառների մասին։ Խնդրել եմ որոշակի ժամանակ առողջապահության ոլորտի և այլ պատասխանատու պաշտոնյաներից որոշակի պարզաբանումներ ստանալու համար։ Սակայն մինչ օրս ոչ մի պարզաբանում իմ ազատման և կազմակերպության հետագայի վերաբերյալ չեմ ստացել, այլ փոխարենը պետական գույքի կառավարման կոմիտեի նախագահ Գարիկ Սարգսյանի հրամանով մայիսի 3-ից ազատվել եմ տնօրենի պաշտոնից՝ առանց նախնական գրավոր տեղեկացման և պատճառաբանության։

Գիտակցելով բուժհիմնարկի դերը առողջապահական համակարգում, հատկապես՝ պատերազմի հետևանքով վիրավորումներ ստացած զինծառայողների վերականգնողական տևական բուժման անհրաժեշտությունը, դիմել եմ և դիմելու եմ օրինականության վերականգնելու և իրականությունը պարզելու համար բոլոր հնարավոր օրինական քայլերին։ Ակնկալում եմ բուժհիմնարկի ճակատագրով հետաքրքրվածների աջակցությունը բուժհիմնարկի հետագայի և հնարավոր անդառնալի հետևանքները կանխելու համար»,- ասված էր նրա գրառման մեջ։

Նույն օրը Սարգսյանը արձագանքել էր Վահրամյանի գրառմանը՝ նշելով, որ այսօր հանդես կգա համապատասխան հայտարարությամբ:

Մերի Խաչատրյան