Քաղաքացին ահազանգում է՝ «Հայփոստի» աշխատակիցներից 200-300 մարդ հեռացվում է աշխատանքից. ընկերությունից պարզաբանում են

«Հայկական ժամանակի» խմբագրության էլեկտրոնային փոստով ստացված մի նամակում հեղինակը հայտնում է, որ աշխատանքից հեռացվում են «Հայփոստի» մեծ թվով աշխատակիցներ: Խոսքը 200-300 հոգու մասին է: Ըստ նամակի՝ պատճառաբանվում է, թե նրանք չեն հաղթահարել ընկերությունում անցկացված գիտելիքների ստուգման (թեստային առաջադրանքներ) նվազագույն շեմը: Մեզ ահազանգողը նշում է, որ նույնիսկ ուռուցքով հիվանդ միայնակ մորը չեն խնայել, հեռացրել են աշխատանքից:

Ըստ նամակագրի՝ թեստերում ներառված են եղել ոչ մասնագիտական հարցեր, որոնց մասին աշխատակիցներին նախապես տեղյակ չի պահվել:

«Հայփոստ» ՓԲԸ-ից, սակայն, հերքում են 200-300 աշխատողի ազատման մասին տեղեկությունը, նշում, որ այն իրականությանը չի համապատասխանում. «Հայփոստ»-ը չի նախատեսել եւ չի նախատեսում աշխատակիցների ազատում»: Նշվում է, որ ատեստավորման արդյունքները դեռ հայտնի չեն: Դրանից հետո է միայն հնարավոր պարզել, թե աշխատակիցների որ մասն է հաղթահարել այն եւ որ մասը չի վաստակել անհրաժեշտ նվազագույն միավորը:

Մեր գրավոր հարցմանը, թե քանի՞ աշխատակից է ոչ բավարար արդյունք գրանցելուց հետո ազատվելու վերջին ատեստավորումից հետո «Հայփոստ» ՓԲԸ-ից պատասխանել են. «Ընկերությունում անցկացված գիտելիքների հերթական ստուգման (ատեստավորման) ոչ բավարար արդյունք ունեցող եւ ազատման ենթակա աշխատակիցների տվյալները ընկերության կողմից դեռ չեն ամփոփվել, ուստի քանակի մասին հայտնել չեն կարող:

Նկատենք՝ Հայաստանի փոստային կապի ազգային օպերատոր «Հայփոստ» ՓԲԸ-ն ունի ավելի քան 850 փոստային բաժանմունք եւ ավելի քան 3000 աշխատակից:

Հետաքրքրվել էինք՝ ի՞նչ թեստավորման մասին է խոսքը: Արդյոք դա պարբերաբա՞ր է արվում, ինչքա՞ն ժամանակը մեկ, ի՞նչ հարցեր են հիմնականում ընդգրկված: Արդյոք վերոնշյալ ոչ մասնագիտական հարցերի մասին հայտարարությունը նորությո՞ւն է եղել ու առաջին անգամ էր:

Մեզ պատասխանել են, որ «Հայփոստի» կողմից մատուցվող ծառայությունների որակը բարելավելու անհրաժեշտությամբ պայմանավորված՝ ընկերությունը պարբերաբար անցկացնում է ատեստավորում՝ թեստերի միջոցով աշխատակիցների մասնագիտական ունակությունների համապատասխանությունը զբաղեցրած պաշտոնին կամ կատարվող աշխատանքին գնահատելու նպատակով: Թե կոնկրետ ինչ պարբերականությամբ է ատեստավորումն իրականացվում, «Հայփոստ»-ից չեն մանրամասնում: Սակայն վստահեցնում են, որ թեստերում ընդգրկվում են բացառապես այն հարցերը, որոնք թույլ են տալիս գնահատել աշխատողի մասնագիտական ունակությունների մակարդակը։

Մանրամասնելով գիտելիքների ստուգման (ատեստավորման) գործընթացը՝ հայտնել են, որ դրանք ենթադրում են մի քանի փուլեր: Նախ, բոլոր աշխատողները գրավոր կարգով իրազեկվում են իրենց աշխատանքային պարտականությունները կազմող ներքին կանոնակարգերի մասին: Աշխատակիցները պարբերաբար եւ բոլոր թեմաների վերաբերյալ անցնում են ուսուցման գործընթաց, որը կազմակերպվում է ընկերության կողմից համապատասխան հարմարեցված ուսուցման կենտրոնում կամ հեռավար կարգով:

Ուսուցման գործընթացներին հաջորդում է գիտելիքների ստուգման գործընթացը, որի շրջանակում աշխատողները նախապես տեղեկացվում են գիտելիքների ստուգման օրվա, վայրի եւ ժամանակի մասին, եւ վերջիններիս տրամադրվում է գիտելիքների ստուգման թեմաներն ու նյութերը:

Նաեւ հայտնում են, որ գիտելիքների ստուգման գործընթացն արձանագրվում եւ տեսաձայնագրվում է: Գիտելիքների ստուգման գործընթացի արդյունքներով՝ 70-79 տոկոս հավաքած աշխատակիցները հնարավորություն են ստանում մասնակցելու երկրորդ փուլին, իսկ մինչեւ 70 տոկոս հավաքած աշխատողների հետ հետագա աշխատանքի հարցերը քննարկվում ու լուծվում են ՀՀ աշխատանքային օրենսգրքով սահմանված կարգով: Մինչեւ 70 տոկոս արդյունքի պարագայում աշխատողը հնարավորություն չի ունենա պատշաճորեն կատարելու իր աշխատանքային պարտավորությունները և իրականացնելու հաճախորդների սպասարկում:      

«Ցանկանում ենք եւս մեկ անգամ նշել, որ ոչ մասնագիտական եւ աշխատակցի կողմից կատարվող գործառույթների հետ կապ չունեցող հարցեր թեստերում չեն ընդգրկվում։ Ամեն հերթական ատեստավորման համար կազմվող հարցաշարերը ընդգրկում են ընկերության կողմից մատուցվող ծառայությունների եւ սպասարկման որակի բարելավմանն ուղղված միջոցառումներով պայմանավորված, այդ պահի դրությամբ ընկերությունում գործող համապատասխան ընթացակարգերից բխող հարցեր»,- հավելել են ընկերությունից:

Մեզ ահազանգող քաղաքացին նաեւ նշել էր, թե «Beeline»-ի նախկին աշխատակիցներն են ընդունվելու «Հայփոստի» ազատված աշխատակիցների փոխարեն: «Հայփոստ»-ից պատասխանել են, որ տեղեկությունը չի համապատասխանում իրականությանը։ Ընկերության այն աշխատակիցների տեղերը, որոնք ազատվում են այս կամ այն պատճառով, համալրվում են ընդհանուր հիմունքներով՝ ընկերության թափուր հաստիքների մասին հայտարարագրմամբ՝ մրցութային կարգով։ Թափուր հաստիքների մասին հայտարարությունները հրապարակվում են «Հայփոստի» կայքէջում, սոցիալական ցանցերում եւ այլ հարթակներում: