Գործազուրկ անձանց աշխատանքի տեղավորման դեպքում գործատուն կստանա գումարային աջակցություն. նախագիծ

Աշխատանքի և սոցիալական հարցերի նախարարությունը առաջարկում է ներդնել նոր ծրագիր, որով գործազուրկ անձանց  աշխատանքի ընդունած գործատուին կտրամադրվի աջակցություն: Աջակցությունը կտրամադրվի աշխատանքի ընդունված անձանց աշխատավարձից հաշվարկված և վճարված եկամտային հարկի չափով՝ եռամսյակային կտրվածքով՝ առավելագույնը 100.000 դրամի չափով։ Գործատուին աջակցությունը կտրամադրվի առավելագույնը մեկ տարի ժամկետով։

Աշխատանքի եւ զբաղվածության վարչության պետ Ժորա Սարգսյանը մեզ հետ զրույցում նշեց, որ ծրագրում կարող են ընդգրկվել այն գործազուրկները, որոնք հաշվառված են  աշխատանքի և սոցիալական հարցերի նախարարության՝ միասնական սոցիալական ծառայության տարածքային կենտրոններում: Ծրագրի իրականացման համար անհրաժեշտ է, որ թե՛ գործատուն, թե՛ գործազուրկը պատրաստակամություն եւ ցանկություն հայտնեն դառնալու ծրագրի շահառու:

«Ըստ կարգի՝ նախ գործատուն ծրագրի մասնակցության հայտ է ներկայացնում տարածքային կենտրոն՝ նշելով թափուր աշխատատեղն ու իր պահանջները: Տարածքային կենտրոնը պետք է աշխատանքի այդ նկարագրին համապատասխանող անձ գտնի: Գործատուի հետ համաձայնեցնելով՝ տարածքային կենտրոնը գործատուի մոտ է ուղեգրում գործազուրկ անձանց՝ ըստ ցուցակում նշված հերթականության: Եթե, օրինակ, գործատուն մեկ թափուր աշխատատեղ ունի, իսկ այդ պայմաններին համապատասխանող երեք գործազուրկ կա, նախապատվությունը տրվում է ավելի վաղ գործազուրկի կարգավիճակ ստացածին: Տարածքային կենտրոնի եւ գործատուի հետ աջակցության տրամադրման մասին պայմանագիր է կնքվում, եւ աշխատանքային պայմանագիր՝ գործատուի ու գործազուրկի միջեւ՝ առնվազն մեկ տարի ժամկետով»,- նշեց նա։

Նախագծով առաջարկվում է ծրագրի շրջանակներում աշխատանքի տեղավորված յուրաքանչյուր անձի համար գործատուին տրամադրել աջակցություն՝ այդ անձանց աշխատավարձից հաշվարկված և վճարված եկամտային հարկի չափով, եռամսյակային կտրվածքով՝ առավելագույնը 100.000 դրամի չափով։

«Եթե այդ 100 հազար դրամը դիտարկում ենք եռամսյա կտրվածքով, մոտավորապես յուրաքանչյուր ամիս ստացվում է 33 հազար դրամ: Այդ գումարը կարող է մի փոքր տարբերվել՝ կախված նրանից՝ աշխատողը համարվում է կենսաթոշակային կուտակայինի վճարող, թե ոչ: Այնուամենայնիվ, մոտավոր նվազագույն աշխատավարձից մի փոքր ավելի է լինում: Եվ եթե, օրինակ, աշխատողին նախատեսվում է հատկացնել 90 հազար դրամ «մաքուր» աշխատավարձ, գործատուն պայմանագրում պետք է նախատեսի 120 հազար դրամ: Այդ 30 հազարը փոխհատուցվում է, եւ գործատուի ծախսը ուղիղ լինում է 90, ոչ թե 120 հազար դրամ»,- պարզաբանեց մասնագետը:

Հարցին՝ իսկ ռիսկ չկա՞, որ մեկ տարի հետո պայմանագիրը կչեղարկվի գործատուի կողմից, Ժորա Սարգսյանը պատասխանեց.

«Նման ռիսկ, իհարկե, կա, բայց ասեմ, որ նման պահանջ էլ չկա, որ չպետք է չեղարկվի. չէ՞ որ արդեն մեկ տարվա աջակցությունը գործատուին հնարավորություն է տալիս ավելի լավ ճանաչել գործատուին: Հավատացեք, որ շատ քիչ դեպքեր են լինում, երբ գործատուն արդյունավետ աշխատողի հետ պայմանագիրը խզում է»:

Իսկ այն հարցին, թե ծրագիրը ենթադրո՞ւմ է չգրանցված աշխատողներին գրանցելու ու եկամտային դաշտ բերելու գործընթաց, նա արձագանքեց.

«Նման բան չի կարող ծրագրից ենթադրվել, նախագծի ընդունմամբ ակնկալվում է ընդլայնել գործազուրկ անձանց աշխատանքի տեղավորման և ստեղծել կայուն զբաղվածության ապահովման հնարավորություններ։ Բայց եթե մտածենք, որ կարող է որեւիցե մեկը իր չգրանցված աշխատողին այս ծրագրով գրանցել, իհարկե, չի բացառվում»:

Նշենք նաեւ, որ հանրապետությունում այսօր հաշվառված է շուրջ 63 հազար գործազուրկ: Աշխատանքի եւ սոցիալական հարցերի նախարարությունն ունի նաեւ նախնական կանխատեսումներ շահառուների թվի հետ կապված: Նախագծի ընդունմամբ ակնկալվում է կայուն զբաղվածության ապահովման հնարավորություններ ստեղծել մոտ 500 գործազուրկի համար:

Մարիամ Գեւորգյան