Երեքից՝ երեք․ Հայաստանի հավաքականը կամային հաղթանակ տարավ Ռումինիայի նկատմամբ

Ֆուտբոլի Հայաստանի հավաքականը երրորդ հանդիպումն անցկացրեց 2022թ․-ի աշխարհի առաջնության ընտրական փուլում։ Խոակին Կապառոսի սաները Երևանի Հանրապետական մարզադաշտում ընդունեցին Ռումինիայի հավաքականին։

Նախորդ խաղի համեմատ Կապառոսը 4 փոփոխություն էր կատարել մեկնարկային կազմում։ Պաշտպանությունում Տարոն Ոսկանյանի փոխարեն դաշտ դուրս եկավ Անդրե Չալըշըրը։ Կիսապաշտանության կենտրոնում Սոլոմոն Ուդոյին փոխարինել էր Կարեն Մուրադյանը։ Խորեն Բայրամյանը խաղը սկսեց կիսապաշտպանության ձախ եզրում՝ Հակոբ Հակոբյանի փոխարեն, իսկ հարձակման սուր ծայրում Սարգիս Ադամյանի փոխարեն սկզբից խաղում էր Ալեքսանդր Կարապետյանը։

Խաղի առաջին կեսն անցավ հյուրերի տարածքային առավելությամբ։ Լավ պահեր ունեին Պուշկաշն ու Ստանչիուն, սակայն Դավիթ Յուրչենկոյին խոցել չստացվեց։

Ընդմիջմանը Կապառոսը երեք փոխարինում կատարեց․ Կարապետյանի փոխարեն դաշտ դուրս եկավ Ադամյանը, Նորբերտո Բրիասկոյին փոխարինեց Ժիրայր Շաղոյանը, իսկ Կարեն Մուրադյանի փոխարեն մտավ Էդուարդ Սպերցյանը, որն իր նորամուտը նշեց հավաքականի կազմում։ Եվ երկրորդ կեսում Հայաստանի հավաքականը կերպարանափոխվեց՝ միանգամից անցնելով գրոհների։ 56-րդ րոպեին հենց Սպերցյանը, կենտրոնից առաջ շարժվելով, հարվածեց, գնդակը անդադարձավ պաշտպանից, հետո, կպնելով դարպասապահ Նիցեի ձեռքին հայտնվեց դարպասում՝ 1-0։

Խփած գնդակից հետո Հայաստանի հավաքականը շարունակեց վտանգավոր գրոհել։ Դրվագներից մեկում տուգանային հարված նշանակվեց, և Տիգրան Բարսեղյանի փոխանցումից հետո Սագիս Ադամյանը գլխով փորձեց գրավել դարպասի հեռավոր անկյունը, բայց Նիցեն հիանալի ցատկով հետ մղեց գնդակը։ 62-րդ րոպեին հյուրերի հազվադեպ գրոհներից մեկն ավարտվեց դարպասի գրավմամբ։ Եզրից փոխանցումից հետո գնդակը դիպավ Վարազդատ Հարոյանին, այնուհետև հայտնվեց դարպասային հրապարակում, որտեղից Ալեքսանդրու Չիկալդաուն դարձավ գոլի հեղինակ՝ 1-1։

Հայաստանի հավաքականն ուշքի չէր եկել բաց թողած գոլից, երբ երկրորդը հայտնվեց Յուրչենկոյի դարպասում։ 72-րդ րոպեին նույն Չիկալդաուն օգտվեց պաշտպանների անուշադրությունից, երբ գնդակն անդրադարձավ Չալըշըրից, ու հաշիվը դարձրեց 2-1։

75-րդ րոպեից սկսած Հայաստանի հավաքականը կարողացավ խաղի թելն իր ձեռքը վերցնել ու վտանգավոր հարվածներ կատարել։ Շաղոյանի ուժեղ հարվածից հետո նորից գերազանց խաղաց Նիցեն։ 78-րդ րոպեին Կապառոսի թիմին օգնության ձեռք մեկնեց հյուրերի հարձակվող Պուշկաշը։ Նա չափազանց կոպիտ խաղաց Չալըշըրի հետ պայքարում, ու մրցավարն անմիջապես կարմիր քարտ ցույց տվեց ռումինացի ֆուտբոլիստին։

Դրանից հետո Հայաստանի հավաքականը գրոհները նոր թափ ստացան, սակայն Նիցեն որոշ ժամանակ դեռ կարողանում էր հետ մղել բոլոր հարվածները։ Վերջապես 87-րդ րոպեին Բարսեղյանի՝ աջ եզրից կատարած փոխանցումից հետո թիմի ավագ Վարազդատ Հարոյանը հսկողությունից դուրս մնաց տուգանային հրապարակում և ուժեղ հարվածով գրավեց Նիցեի դարպասը՝ 2-2։ Սակայն դրանով Խոակին Կապառոսի սաները չբավարարվեցին ու շարունակեցին գրոհել։ Երկու րոպե անց Սարգիս Ադամյանը մտավ տուգանային հրապարակ, գնդակն ուղարկեց հետ, որտեղ վրա հասած Սպերցյանն առաջ անցավ պաշտպանից, վերջինս անզգուշորեն հարվածեց հայ ֆուտբոլիստի ոտքին՝ 11 մետրանոց։ Գնդակին մոտեցավ Բարսեղյան և վստահ իրացրեց այն՝ խփելով հաղթական գնդակը։

Հայաստանի հավաքականը երրորդ անընդմեջ հաղթանակը տարավ ընտրական փուլի երեք խաղերում և վաստակեց 9 միավոր՝ գլխավորելով G խմբի մրցաշարային աղյուսակը։ Ընտրական փուլում հաջորդ հանդիպումները հավաքականը կանցկացնի սեպտեմբերին՝ հանդիպելով Գերմանիայի, Հյուսիսային Մակեդոնիայի և Լիխտենշտեյնի հավաքականներին

Հայաստան – Ռումինիա 3-2

Գոլերը՝ Սպերցյան 56, Հարոյան 87, Բարսեղյան 89 (11մ) – Կիկալդաու 62, 72

Հայաստան՝ Յուրչենկո, Կ․ Հովհաննիսյան, Չալըշըր, Հարոյան, Համբարձումյան – Մուրադյան (Սպերցյան, 46), Ա․ Գրիգորյան – Բայրամյան, Բարսեղյան (Ուդո, 90+2) - Բրիասկո (Շաղոյան, 46), Կարապետյան (Ադամյան, 46)

Ռումինիա՝ Նիցե – Բանկու, Տոշկա, Կիրիկեշ, Մոգոս – Մարին, Ստանչիու (Տանասե, 74) – Մաքսիմ (Կեշերու, 74), Կիկալդաու (Կրետու, 81), Ման (Միհեյլա, 81) – Պուշկաշ։

Զգուշացումներ՝ Բարսեղյան, Բայրամյան, Հարոյան – Մաքսիմ, Բանկու, Մոգոս

Հեռացում՝ Պուշկաշ (78)