Ռեյտինգայինը վերածնում է նախկին քրեաօլիգարխիկ համակարգը, պետք է անցյալի պորտալարը կտրենք. Լևոն Շիրինյան

«Քրիստոնեա-Ժողովրդավարական» կուսակցությունն օրեր առաջ հայտարարեց, որ մասնակցելու է արտահերթ խորհրադարանական ընտրություններին: Կուսակցությունը պատրաստվում է կենտրոնանալ Հայաստանի արդիականացման նախատեսումների վրա, որի արդյունքը, նրա համոզմամբ, լինելու է 4-րդ Հանրապետության հիմնադրումը: «Հայկական ժամանակը» զրուցել է ՔԺԿ ղեկավար Լեւոն Շիրինյանի հետ:

- Պարո՛ն Շիրինյան, արդեն հայտարարել եք, որ ՔժԿ-ն մասնակցելու է խորհրդարանական արտահերթ ընտրություններին: Որոշե՞լ եք՝ ով է գլխավորելու կուսակցության ցուցակը,  եւ ովքե՞ր են ընդգրկված լինելու ցուցակում: Ի՞նչ ակնկալիքներով եք մասնակցում ընտրություններին:

- Կուսակցության ցուցակը ղեկավարելու եմ ես: Ցուցակը ժամանակի ընթացքում ամբողջությամբ կհրապարակենք: Ակնկալիքներ, իհարկե, ունենք, բայց դրանք նախնական խոսակցություններ են: Թեթեւսոլիկ բաներ չեմ ուզում ասել: Երբ ժամանակը գա, կհարցնեք՝ կասեմ: Բայց մեր կուսակցության համար ամեն բան պարզ է: Մեր կուսակցությունը ծնվել է հեղափոխության արդյունքում եւ մինչեւ հիմա մնում է հեղափոխության իդեալների կրողը եւ աջակցում է բոլոր այն նախաձեռնություններին, որոնք ծառայում են մեր երկրի առաջընթացին: Մենք կողմ ենք դասական պառլամենտական կառուցվածքի առաջացմանը: Մենք կներկայանանք որպես այլընտրանք եւ կհամագործակցենք նրանց հետ, ովքեր Հայաստանի ապագան են, եւ չենք լինի այնտեղ, որտեղ Հայաստանի տխուր անցյալն է:

- Դուք նշում եք, որ ՔԺԿ-ն այլընտրանք է, ոչ թե ընդդիմություն: Այսինքն՝ բացառո՞ւմ եք ընդդիմադիր որեւէ ուժի հետ կոալիցիա կազմելը: Եթե այո, ինչո՞ւ:

- Երբ որեւէ պարզություն կլինի, այս մասին կարող ենք խոսել: Մենք հակված ենք ընտրություններին գնալ ընդհուպ առանձին: Պատրաստ ենք միանալ հեղափոխական ուժերի հետ, որոնք ծնվել են Նոր Հայաստանի հետ, մնացածների հետ ի՞նչ գործ ունենք:

- Նիկոլ Փաշինյանը երեկ ԱԺ-ում վերահաստատեց՝ արտահերթ ընտրություններն անկացվելու են համամասնական ընտրակարգով: Դուք ինչպե՞ս եք վերաբերում Ընտրական օրենսգրքի փոփոխություններին: Ռեյտինգայի՞ն, թե՞ համամասնական ընտրակարգի կողմնակից եք:

- Ես վախենում էի, որ ռեյտինգայինը կպահեն: Դրա համար ամեն օր դրա մասին գրառումներ էի անում: Ռեյտինգայինը վերածնում է նախկին քրեաօլիգարխիկ համակարգը: Հիմա այդ վտանգից անցանք: Մենք պետք է անցյալի պորտալարը կտրենք, գողապետության շրջանի բարքերից  ազատվենք: Հեղափոխությունը պետք է շարունակվի եւ խորացվի:

- Համամիտ չե՞ք այն պնդումների հետ, որ ռեյտինգային ընտրական համակարգի միջոցով ամեն մարզ ունենում էր իր պատվիրակ-պատգամավորը, իսկ համամասնական ընտրակարգով մարզի բնակիչները զրկվում են իրենց պատգամավորն ունենալու հնարավորությունից:

- Ովքեր ինչպես էլ ընտրվեն, դառնում են Ազգային ժողովի պատգամավոր: Դա հին, կիսագրագետ պատկերացում է: Սա արտացոլում է համապետական շահը: Կուսակցությունները, որոնք այդ բլեֆով զբաղվում են, ոչ ոք չի խանգարում իրենց ընտրական ցուցակներում ներգրավել մարզից պատգամավորների: Ո՞վ է խանգարում: Օրինակ՝ ես հակված եմ Մեղրիից անպայման պատգամավորի թեկնածու ներգրավել մեր ցուցակում: Դա մի փաստարկ էր, որի նպատակն էր անցյալի «հեղինակություններին» ընդգրկել իրենց շարքերում, իսկ դա ձախողվեց: Մենք չպետք է մեր այն էլ փոքր երկիրը բաժանենք բդեշխությունների եւ բդեշխների: Ես, օրինակ, 90-ականներին՝ իմ լավ տարիներին, այս կամ այն ձեւով նվիրել եմ Արցախին, ինձ ոչ ոք չէր խանգարում դա անել, իսկ որքան այնտեղի տեղացիներ եկել են Հայաստան ու սատանի քամի են կազմակերպում, Արցախին օգուտ տալի՞ս են:

- Քարոզարշավի մեկնարկը սարերի հետեւում չէ: Այն անցկացնելու ինչ-որ հետաքրքիր լուծումներ արդեն մտածե՞լ եք:

- Մենք պրոֆեսիոնալ քաղաքագետներ ենք, ոչ թե քաղաքագետներ, որոնք բժիշկներ են կամ ճիճվի մասնագետ: Մեր նորությունն այն կլինի, որ բոլոր ոլորտներից ներկայացուցիչներ կունենանք: Հետաքրքիր նորություններ կլինեն:

- Չնայած իշխանությունների այն պնդումներին, որ իրենք ընտրությունները չեն կեղծելու, ընդդիմադիրները մտավախություն ունեն, որ իշխանությունները իրենց լծակներն օգտագործելու են ընտրություններում. դո՞ւք էլ ունեք այդ մտավախությունը, եւ ի՞նչ եք կարծում՝ կեղծիքների ականատես կլինե՞նք:

- Դա հնարավոր է իրենց պարագայում, իրենք իրենց փորձից են ասում: Իրենք դա արել են, բայց նոր Հայաստանը կեղծիք չի անի: Դրանք օդից արված հայտարարություններ են, դատարկ, անիմաստ խոսակցություններ:

- Որպես ձեր ուժին մրցակից ո՞ր քաղաքական ուժերին եք տեսնում եւ ի՞նչ եք կարծում՝ նոր խորհրդարանում ո՞ր ուժերին կտեսնենք:

- Դեռ պետք է բոլոր ուժերը հայտարարեն, որ մասնակցում են, նոր այս հարցին պատասխանենք: Դե, պարզ է, որ «Քաղաքացիական պայմանագիր» կուսակցությունը կլինի, ենթադրում եմ, որ մենք նույնպես անպայման կլինենք, քանի որ նոր ուժ ենք: Ճիշտ է՝ մենք կուսակցությունով հայտնի չենք, բայց կուսակցության անդամ եմ ես, Հայկ Սուքիասյանը. Թամարա Հայրապետյանը, որը բանասիրության ճանաչված դոկտոր է: Այսինքն՝ մարդիկ ենք, որոնք տասնյակ տարիների պայքարի մեջ են: Այս պարագայում կարեւորում ենք քաղաքական գործընթացը, ոչ թե վերջն ինչպես կլինի:

Անյուտա Աթանեսյան