Պրեմիեր լիգան վերսկսվում է. ինչպես են Հայաստանի առաջնության թիմերը մոտեցել մրցաշարին

Ձմեռային դադարը Հայաստանի առաջնությունում ավարտվում է: Թիմերն արդեն ավարտում են կազմի համալրումը, ու թեև տրանսֆերային պատուհանը դեռ բաց է, և նոր տեղափոխություններ միգուցե դեռ կլինեն, բայց արդեն հիմա կարելի է վերլուծել թիմերի տրանսֆերային քաղաքականությունը և տեսնել, թե ինչպես են նրանք մոտեցել առաջնության երկրորդ հատվածին:

«Արարատ»

Առաջնության առաջատարը իր կազմը համալրումը, կարելի է ասել, ավարտեց արդեն հունվարի վերջին: Վարդան Բիչախչյանի թիմը բավականին լավ է կոմպլեկտավորված, այնպես որ նոր անունները թիմում կբարձրացնեն մրցակցությունը դիրքերում, ինչը կնպաստի նաև խաղի որակի բարձրացմանը: Ընդհանուր առմամբ, «Արարատի» տրանսֆերային քաղաքականությունը ձմռանը կարելի է դրական համարել: Էական կորուստներ չեղան, հեռացածները հիմնական կազմի խաղացողներ չէին, մինչդեռ նորեկներ Արթուր Դանիելյանը, Գրիգոր Մելիքսեթյանը, Դիմիտրիյե Պոբուլիչն ու Մաքսիմ Զադերական կարող են լուրջ ներդրում ունենալ թիմի հաջողություններում:

«Արարատ-Արմենիա»

Դավիդ Կամպանիայի թիմը տրանսֆերային պատուհանի ընթացքում ունեցավ թե՛ լուրջ կորուստներ, թե՛ լուրջ ձեռքբերումներ: Առաջին հայացքից՝ հեռացածներին փոխարինողները կարող են լրացնել բաց տեղերը, բայց նաև հասկանալի է, որ նորեկներին թիմին մերվելու համար ժամանակ է պետք: Ձեռքբերումներից կարելի է առանձնացնել շվեդ Հերադի Ռաշիդիին և Հայաստանի հավաքականի հարձակվող Ալեքսանդր Կարապետյանին, ինչպես նաև Հայաստանի առաջնությունում հանդես գալու փորձ ունեցող Դենու Սպատարուին: Շատ բան կախված կլինի նրանից, թե ինչպես Սպատառուն կկարողանա փոխարինել թիմից հեռացած Մաիլսոն Լիմային, որը վերջին երկու տարիներին թիմի առաջատարն էր:

«Ալաշկերտ»

Մարզչական փոփոխությունը մի փոքր ցնցեց մայրաքաղաքային ակումբը, բայց ակումբին լավ ծանոթ Աբրահամ Խաշմանյանը պետք է կարողանա արագորեն հավաքել թիմը և փորձել հերթական չեմպիոնությունը նվաճել «Ալաշկերտի» հետ: Խաշմանյանի հետ թիմ վերադարձավ նաև Միհրան Մանասյանը: Առաջնության երկրորդ շրջանի ինտրիգներից մեկը լինելու է «Ալաշկերտի» երկու դարպասապահների՝ Դավիթ Յուրչենկոյի և Օգնյեն Չանչարևիչի մրցակցությունը: Եթե Յուրչենկոն կարողացավ հաղթել այդ մրցակցությունը, դա օգուտ նաև Հայաստանի հավաքականին, քանի որ Չանչարևիչը վերջին տարիների Հայաստանի առաջնության լավագույն դարպասապահներից է:

«Լոռի»

Վանաձորցիները մեծ թվով պահեստային խաղացողներ բաց թողեցին ձմռանը, փոխարենը համալրումները շատ քիչ են: Ղուկաս Պողոսյանը, Վարդան Բակալյանն ու Գոռ Մանուկյանը Հայաստանի առաջնությանը լավ ծանոթ ֆուտբոլիստներ են, կարող են ավելացնել մրցակցությունը թիմի կազմում, բայց դեռ հայտնի չէ՝ արդյոք կհասցնեն վանաձորցիները նրանց գրանցել, քանի որ ՖԻՖԱ-ի դրած արգելքը դեռ գործում է: Հակառակ դեպքում՝ Ալբերտ Սոլոմոնովը լուրջ խնդիրների առաջ կարող է կանգնել, և «Լոռիի» համար չեմպիոնական պայքարը շարունակելը կդժվարանա: Միևնույն ժամանակ, «Լոռին» ապացուցել է, որ կարողանում է դուրս գալ բավականին դժվար իրավիճակներից:

«Նոա»

Վերջին շաբաթվա ընթացքում «Նոան» ևս մեկ տրանսֆեր կատարեց, թիմի կազմը համալրեց փորձառու գանացի հարձակվող Ռայմոնդ Գյասին: Իհարկե, Գյասին Հոլանդիայում, Նորվեգիայում և Ռումինիայում հանդես գալու մեծ փորձ ունի, բայց առանձնակի արդյունավետությամբ չի փայլել, և դժվար է ասել, թե ինչպես կկարողանա իրեն դրսևորել Հայաստանում: Միևնույն ժամանակ, Սպատառուի և թիմի մյուս առաջատար Մաքսիմ Մայրովիչի հեռանալը չի կարող դրական ազդեցություն ունենալ «Նոայի» վրա:

«Ուրարտու»

Երևանցիները կորցրեցին իրենց հիմնական կենտրոնական պաշտպան Դմիտրի Գուզին: Թիմը ընդամենը երեք ձեռբերում ունեցավ, բայց հենց այն դիրքերում, որտեղ գլխավոր մարզիչ Ալեքսանդր Գրիգորյանը ուժեղացում էր պահանջում: Հարձակվող Եվգեն Բուդնիկը լավ ծանոթ է թե՛ թիմին, թե՛ Հայաստանի առաջնությանը, իսկ պաշտպաններ Վադիմ Պարամոնովն ու Պյոտր Տենը կփորձեն լրացնել Գուզի պակասը: Նաև կարիերան վերսկսեց Իգոր Պադերինը, դա կարող է լավ ուժեղացում լինել կիսապաշտպանության համար:

«Վան»

Վանաձորցիները նշանակալի փոփոխություններ կատարեցին, փոխեցին գլխավոր մարզչին, հրավիրեցին ռուս մասնագետի և ռուս ֆուտբոլիստների:  Մնում է հուսալ, որ փոփոխությունները բացասական ազդեցություն չեն ունենա թմի վրա, և «Վանը» կշարունակի համառ պայքար մղել առաջատարների հետ:

«Շիրակ»

Գյումրեցիները բավարարվեցին մի քանի ձեռքբերումներով, որոնցից երկուսը սերբ ֆուտբոլիստներ Սպասոյե Ստեֆանովիչն ու հարձակվող Իգոր Ստանոյևիչը, իհարկե, կբարելավեն թիմի խաղը, բայց մեծ նպատակների համար դա բավական չէ:

«Փյունիկ»

Առաջնության հետնապահը կտրուկ փոփոխությունների գնաց: Փոխվեց մարզիչը, թիմը գլխավորեց առաջնության լավագույն մարզիչներից մեկը՝ Եղիշե Մելիքյանը: Կտրուկ փոփոխություններ եղան թե՛ պաշտպանությունում, թե՛ հարձակման գծում: Հեռացան հիմնական երկու կենտրոնական պաշտպանները՝ Սոլոմոն Նիրիսարիկեն և Ալեքս Յեուլեն, նրանց փոխարեն եկան ուկրաինացի կենտրոնական պաշտպաններ Բոլդենկովն ու Գոնչարը: Պաշտպանության եզրերն ուժեղացրել են Հայաստանի հավաքականի խաղացողներ Արման Հովհաննիսյանն ու Ռոբերտ Դարբինյանը: Իսկ առջևի գիշը հարավամերիկյան երանգներ ստացավ՝ ի դեմս բրազիլացի Իգոր Լեյտեի, վենեսուելացիներ Խոսե Կարաբալոյի և Խոսե Բալսայի: Վենեսուելացիների դեսանտը «Փյունիկում» ամբողջացնում է պաշտպան Ռոմել Իբառան: Անչափ հետաքրքիր է լինելու, թե ինչպես է Մելիքյանը կարողանալու այդ ֆուտբոլիստների համադրությունից ամուր թիմ ձևավորել և փորձել հանել թիմին մրցաշարային աղյուսակի նկուղից:

Ռաֆայել Խալաթյան