Գերմանացի նախարարի՝ ամերիկացի գործընկերոջն ուղղած նամակի պատճառով կրկին ուշադրության կենտրոնում «Հյուսիսային հոսք-2»-ն է

Գերմանիայի ֆինանսների դաշնային նախարար Օլաֆ Շոլցը հայտնվել է սկանդալի կենտրոնում՝  իր ամերիկացի գործընկեր Սթիվեն Մնուչինին 2020 թվականի օգոստոսին ուղարկած նամակի համար:

Ըստ գերմանական Süddeutsche Zeitung պարբերականի, նամակի բովանդակությունը, սակայն, հայտնի է դարձել այս օրերին միայն, ավելի ստույգ՝ նամակի մասին հրապարակումներ են եղել երեքշաբթի օրը: 1 օր անց՝ չորեքշաբթի օրը նախարարը կանչվել է Բունդեսթագ `Կանաչների կուսակցության պատգամավորների խնդրանքով` քննարկելու Ռուսաստանում տիրող իրավիճակն ու նամակը: Կանաչների խմբակցության ղեկավարի տեղակալ Օլիվեր Քրիշերը Շոլցին մեղադրել է «կեղտոտ գործարքի» մեջ:

Վերոհիշյալ նամակում Շոլցը ԱՄՆ-ին առաջարկել է մինչև մեկ միլիարդ եվրո LNG նոր տերմինալների համար, որպեսզի Վաշինգտոնը հրաժարվի գերմանա-ռուսական «Հյուսիսային հոսք-2» գազատարի  դեմ պատժամիջոցներ կիրառելու մտքից:

Գերմանիայի արտաքին գործերի նախարար Հեյկո Մաասը «կեղծավոր թատրոն» է որակել իր կուսակից գործընկերոջ `Շոլցի մարտահրավերը, որն այժմ մասնակցում է համաճարակի շուրջ դաշնային պետությունների վարչապետների հետ խորհրդակցություններին:

«Գերմանական օգնություն էկոլոգիային» կազմակերպության կողմից հրապարակված նամակում ասվում է, որ Գերմանիան պետք է նրբանկատ լինի՝ խոստանալով ամերիկացիներին հնարավորություն տալ շուկա բերել իրենց թերթաքարային գազը և համոզելայն ժամանակվա նախագահ Դոնալդ Թրամփի կառավարությանը, որ գազը հատկապես վնասակար է շրջակա միջավայրին: Նամակի թեման բարձրացվել էր անցյալ տարի, բայց դաշնային կառավարության կողմից արձագանք չէր եղել:

Արևելյան Եվրոպայում Կանաչների կուսակցության փորձագետ Մանուել Սարազինը խիստ քննադատել է գերմանական կառավարությանը այս ամենին տեղյակ լինելու և դրանով չզբաղվելու համար:

Գերմանացի պատգամավոր Մայքլ Բրենդն էլ ասել է, որ չի կարելի «պարզապես շարունակել կառուցել« Հյուսիսային հոսք-2 »-ը՝ կարծես ոչինչ չի պատահել»: Նրա խոսքով, պետք է մորատորիում մտցնել շինարարական աշխատանքների համար, իսկ Ռուսաստանի դաշնության ներկայացուցիչների հետ զրույց ունենալ, ընդ որում՝ բաց խաղաքարտերով:

Գերմանական մյուս կուսակցությունների ներկայացուցիչները նույնպես պահանջել են դադարեցնել մորատորիումը: «Հյուսիսային հոսքը 2-ը բաժանում է Եվրոպան և Գերմանիան մեկուսացնում», - ասել է խմբակցության փոխնախագահ Ալեքսանդր Գրաֆ Լամբսդորֆը:

Այնուամենայնիվ, լիբերալները չեն ցանկանում, որ Բալթյան գազատարը վերածվի միլիարդավոր դոլարների կորուստների: Նրանց կարծիքով, Ռուսաստանին պետք է ժամանակ տրամադրել ՝ վերանայելու իր քաղաքականությունը:

Արտաքին գործերի նախարար Մաասը, ի պատասխան, կոչ է արել մտածել շինարարության հնարավոր դադարեցման աշխարհառազմավարական հետևանքների մասին: «Ինձ ընդհանրապես դուր չի գալիս կամուրջներն այրելու  ռազմավարությունը», - շեշտել է նա:

Մաասը հավելել է, որ այսպես թե այնպես ռուսաստանի դեմ նոր պատժամիջոցներ սահմանվելու են Եվրամիության կողմից ու իրենց դրան աջակցելու են՝ Նավալնիի ու նրա աջակիցների ձերբակալությամբ պայմանավորված: Ընդ որում, ըստ նախարարի, երկխոսության բանալին ոչ թե Բրյուսելի կամ Բեռլինի, այլ Մոսկվայի մոտ է:

Հավելենք, որ այս շաբաթվա սկզբին Ռուսաստանի հետ հարաբերությունները մի շարք երկրների հետ հասել են ցածր կետի: Լեհաստանից և Շվեդիայից հետո, Գերմանիան ևս իր ռուս դիվանագետներից մեկին հայտարարել էր պերսոնա նոն գրատա: Ավելի վաղ Ռուսաստանը որոշում էր կայացրել երկրից վտարել վերոհիշյալ երեք երկրներից մեկական դիվանագետի, քանի որ նրանք մասնակցել էին Նավալնիի աջակիցների կողմից կազմակերպված չարտոնված ցույցերին:

Հիշեցնենք,  «Հյուսիսային հոսք-2» գազատարի շինաշխատանքները դադարեցվել էին Ռուսաստանից Գերմանիա ձգվող հատվածում: Ուկրաինան շրջանցող նոր խողովակաշարի աշխատանքները կասեցվել էին ԱՄՆ-ի պատժամիջոցների հետեւանքով: Պատժամիջոցների մասին փաստաթուղթը, որը մշակվել է հանրապետական և դեմոկրատական կուսակցությունների ներկայացուցիչների կողմից միաժամանակ, անհնար էր դարձնում «Հյուսիսային հոսք-2» գազատարի շինարարության ավարտը: 2020 թվականի հունիսի 25-ին ԱՄՆ պետքարտուղար Մայք Պոմպեոն կոչ էր արել եվրոպական երկրներին ավելի լուրջ վերաբերվել իրենց անվտանգությանը, մասնավորապես ՝ Չինաստանի և Ռուսաստանի սպառնալիքներից, որոնց թվում նշվում էր գազատարի գործարկումը:

Կառուցումն ավարտելու դեպքում, հումքի արժեքը, որը առաքվելու է այս խողովակաշարով, 30 տոկոսով պակաս կլինի, քան ԱՄՆ հեղուկացված բնական գազի գինը: Գազատարի ընդհանուր երկարությունը1200 կիլոմետր է։«Գազպրոմ»-ը նախատեսում է Ուկրաինան շրջանցող այս գազատարով Գերմանիա հասցնել եվրոպական երկրներին մատակարարվող ռուսական գազի շուրջ 25 տոկոսը։