Տրանսֆերային անցուդարձ. ինչպես են ուժեղացնում իրենց կազմերը հայկական թիմերը

Տրանսֆերային պատուհանը Հայաստանում վաղուց բացվել է, ու թեև Հայաստանում եղանակը բավականին ցուրտ է, սակայն ֆուտբոլային աշխարհում թեժ է: Հայկական թիմերն արդեն ամբողջ ուժով պատրաստվում են մրցաշրջանի երկրորդ կեսին, և վերջին մեկ շաբաթվա ընթացքում արդեն բավականին տրանսֆերներ են եղել:

Տրանսֆերային շուկայում հատկապես ակտիվ է Երևանի «Փյունիկը», և դա հասկանալի է. նոր գլխավոր մարզիչը ցանկանում է հավաքել այն կազմը, որով կկարողանա բարձրացնել թիմը մրցաշարային աղյուսակում:

Այս ընթացքում «Փյունիկը» մեկ խաղացող կորցրեց. թիմից հեռացավ նիգերիացի հարձակվող Սթիվեն Ալֆրեդը, որը հիմնականում փոխարինման էր դուրս գալիս և առանձնակի արդյունավետ խաղով աչքի չէր ընկնում: Փոխարենը «Փյունիկը» ձեռք է բերել 4 նոր պաշտպանների, ինչը մի փոքր զարմանալի է: Պաշտպանությունը «Փյունիկի» թույլ կողմերից չէր, սակայն Եղիշե Մելիքյանը, հավանաբար, իր տեսակետն ունի այդ հարցի շուրջ: 

«Փյունիկ» է վերադարձել Հայաստանի հավաքականի ձախ պաշտպան Արման Հովհաննիսյանը, որն այդ դիրքում կմրցակցի հավաքականում իր թիմակից Սերոբ Գրիգորյանի հետ: Աջ եզրի համար ձեռք է բերվել «Ուրարտուի» պաշտպան Ռոբերտ Դարբինյանը: Վերջինիս համար տեղափոխությունը կարող է դառնալ կարիերայի նոր փուլ, քանի որ «Ուրարտուում» Դարբինյանը կորցրել էր տեղը հիմնական կազմում և հազվադեպ էր դուրս գալիս խաղադաշտ: Հայաստանի հավաքականի թեկնածուն հանդես է գալիս այն եզրում, որը «Փյունիկում» խնդրահարույց էր, և հաճախ մարզիչները եզրային հարձակվող Ալիկ Առաքելյանին էին տեղափոխում այդ դիրք: Հատկանշական է նաև, որ գլխավոր մարզիչ Մելիքյանն իր խաղային տարիներին եղել է աջ պաշտպան, և, միգուցե, նրա մոտ ստացվի լուծել այդ խնդիրը: 

Պաշտպանության կենտրոնում թիմը համալրվել է ուկրաինացի կենտրոնական պաշտպանների զույգով՝ Անտոն Բրատկով և Իգոր Գոնչար:

Լուրջ ձեռքբերում կարող է լինել Հայաստանի Մ-21 հավաքականի անդամ Հովհաննես Հարությունյանի տեղափոխությունը: Երիտասարդ կիսապաշտպանը խաղային պրակտիկայի կարիք ունի, իսկ «Արարատ-Արմենիայում» նա դրանից զրկված էր: Հարությունյանը ներուժ ունի դառնալու Հայաստանի հավաքականի ֆուտբոլիստ, սակայն դրա համար պետք է կարողանա խաղային պակտիկա ձեռք բերել և վստահ խաղ ցուցադրել:

«Արարատ-Արմենիան» շարունակում է ուժեղացնել իր կազմը՝ զուգահեռաբար փոխարիողներ գտնելով այս կամ այն պատճատով թիմից հեռացած ֆուտբոլիստներին: Ձախ եզրում Ալեքս Ջունիորին կփոխարինի Եգոր Կլիմենչուկը, Հերադի Ռաշիդին կուժեաղցնի թիմի հարձակման եզրը, կոլումբացի Խայմե Խուլիո Բուենոն էլ պետք է ամրապնդի պաշտպանության կենտրոնը: Ձեռք բերված ֆուտբոլիստները Հայաստանի առաջնության մակարդակով ուժեղ կատարողներ են, որոնք ունակ են եղանակ փոխել, եթե մարզիչը կարողանա նրանց արագորեն ընդգրկել թիմի կազմում: Մինչ ԱՄԷ՝ ուսումնամարզական հավաքի մեկնելը, մայրաքաղաքային թիմը ևս մեկ գործարք իրականացրեց. հիմնական դարպասապահ Ստեֆան Չուպիչի տրանսֆերը վաճառեց Կիպրոս՝ «Օմոնիա», նրա փոխարեն ձեռք բերեց մեկ այլ սերբ՝ փորձառու դարպասապահ Նիկոլա Պետրիչին:

Այս տեղափոխությունից թիմը դժվար թե տուժի. «Արարատ-Արմենիան» կշարունակի երկու ուժեղ դարպասապահ ունենալ՝ ի դեմս ՊԵտրիչի և Դավիդ Աբակումովի, թիմում է նաև Հայաստանի հավաքականի թեկնածու, երիտասարդ դարպասապահ Վարդան Շահատունին: Եթե հաստատվի նաև sport24.ru-ի տեղեկությունն այն մասին, որ ակումբի հետ պայմանագիր կկքնի նաև Հայաստանի հավաքականի և ռուսական «Տամբովի» հարձակվող Ալեքսանդր Կարապետյանը, ապա «Արարատ-Արմենիան» շատ մեծ հայտ կներկայացնի չեմպիոնի կոչումը պահպանելու համար:

Առայժմ պասիվ են տրանսֆերային պատուհանի ընթացքում «Ուրարտուն» և «Ալաշկերտը»: Մեծ հաշվով երկու թիմերն էլ լավ համալրված են, սակայն հունվարի 28-ին նրանց միջև կայացած ստուգողական խաղում «Ուրարտուն» հաղթեց 6-0 հաշվով, ինչը կարող է ստիպել «Ալաշկերտի» սեփականատեր Բագրատ Նավոյանին և նոր-հին մարզիչ Աբրահամ Խաշմանյանին մտածել թիմի որոշ դիրքերի ուժեղացման մասին: «Արարատն» ու «Շիրակն» էլ կօգտվեն տրանսֆերայի պատուհանի ընթացքում ընձեռնված հնարավորություններից, բայց աղմկոտ ձեռքբերումներ դժվար թե լինեն:

Առայժմ միայն կորուստների մասին են հայտնում «Լոռին», «Վանը» և «Նոան», սակայն բոլոր այդ թիմերում էլ համալրումներ կլինեն: «Վանը» երկկողմանի համաձայնությամբ խզեց պայմանագիրը Էբերտ Կարդոսո Դա Սիլվայի, Մուսլիմ Բամմատգերեևի, Մեդիա Լադջի Տրաորեի, Միհրան Մանասյանի, Դավիթ Ղանդիլյանի, Արման Խաչատրյանի, Միքայել Գնոլոուի, Դավիթ Այվազյանի, Օրբելի Համբարձումյանի, Միհրան Պետրոսյանի, Լիե Պատո Նգավուկա-Ցեկեի և Աշոտ Այվազյանի հետ: Նրանցից առնվազն 5-ը հիմնական կազմի խաղացողներ էին, հատկապես ցավալի է Հայաստանի երիտասարդական հավաքականի կիսապաշտպան Միհրան Պետրոսյանի հեռանալը:

Առայժմ ակումբը չի հայտարարում թիմի ղեկավար և մարզչական կազմերում տեղի ունեցած փոփոխությունների մասին, սակայն նման քանակությամբ ֆուտբոլիստների հետ պայմանագիր խզելը վկայում է, որ ակումբում ինչ-որ բան տեղի է ունեցել: Հավանաբար շուտով ակումբը կհայտարարի մեծ թվով ռուս և ուկրաինացի խաղացողների ձեռքբերման մասին: Մնում է հուսալ, որ այս փոփոխությունները բացասաբար չեն ազդի կոլեկտիվի վրա, և «Վանը» կշարունակի հաճելի խաղ դրսևորել նաև առաջնության երկրորդ հատվածում:

Ինչ վերաբերում է երկրի փոխչեմպիոն «Նոային», ապա թիմը շարունակում է կորցնել այն խաղացողներին, որոնք ժամանել էին նախկին գլխավոր մարզիչ Իգոր Պիկուշչակի հետ: Սոսլան Կագերմազովն ու Դմիտրի Լավրիշևը հեռացան օրեր առաջ, ավելի վաղ գնացել էր նաև Արտյոմ Սիմոնյանը: Վերջինս կարիերան շարունակում է Ռուսաստանի առաջին դիվիզիոնի «Տոմում», մյուս երկուսը, հավանաբար, ևս ակումբ կգտնեն Ռուսաստանում: Հավանաբար շուտով «Նոայում» կլինեն համալրումներ նույն Ռուսաստանից, ֆուտբոլիստներ, որոնք ծանոթ կլինեն գլխավոր մարզիչ Դմիտրի Գունկոյին: 

Տրանսֆերային պատուհանը դեռ շարունակելու է բաց մնալ Հայաստանում, այնպես որ մոտ ժամանակներում կարող ենք նոր հետաքրքիր տեղափոխությունների ականատես լինել: