ԱՄՆ-ում պատրաստվում են Բայդենի երդմնակալությանը. անվտանգության խիստ միջոցառումներ են ամենուր (լուսանկարներ)

ԱՄՆ-ի բոլոր 50 նահանգները և Կոլումբիայի շրջանը բարձր պատրաստվածության են բերվել՝ այս շաբաթվա վերջին հնարավոր բողոքների և անկարգությունների հավանականության պատճառով, որը կարող է թափ առնել նորընտիր նախագահ Ջո Բայդենի երդմնակալության արարողությանն ընդառաջ:

Ազգային գվարդիայի զորքերը երկրի ամբողջ տարածքից բերվել և տեղակայվել են Վաշինգտոնում ՝ կանխելու համար հունվարի 6-ին տեղի ունեցած ու 5 մարդու մահվան պատճառ դարձած խռովությունների կրկնությունը, որոնց արդյունքում մի քանի մարդ էր զոհվել:

Երկրի անվտանգության ծառայությունները նախազգուշացում են տարածել Թրամփի կողմնակիցների կողմից բոլոր նահանգներում և խոշոր քաղաքներում հնարավոր երթերի մասին: Վաշինգտոնում գտնվող Ազգային ալեյան, որտեղ թանգարաններ և հուշարձաններ են տեղակայված, փակ է հանրության համար: Փողոցներում ամենուր պատնեշներ կան տեղադրված:

Կապիտոլիումի շուրջ ծառայություն իրականացնող ոստիկանության աշխատակիցներն ուրբաթ օրը բերման են ենթարկել Վիրջինիա նահանգից մի տղամարդու, երբ նա փորձել է իր մեքենան վարել Վաշինգտոնի կենտրոնում տեղակայված անցակետի տարածքով՝  երդմնակալության մասնակցության համար թողարկված կեղծ անցագրով: Նրա մոտ լիցքավորված ատրճանակ և ավելի քան 500 փամփուշտներ են եղել, հաղորդում է CNN- ը:

Ավելի ուշ նրան ազատ են արձակել: Կապիտոլիումի ոստիկանությունից հայտնել են, որ տղամարդն ունեցել է  մասնավոր մի կազմակերպության կողմից տրված վկայական: Ինքը տղամարդը Washington Post- ին հայտնել է, որ աշխատում է անվտանգության մասնավոր ընկերությունում: «Ես Վաշինգտոնում մոլորվելուց հետո բարձրացա անցակետ, քանի որ ես տեղացի չեմ, այնուհետ ցույց տվեցի ինձ մոտ եղած անցագիրը», - բացատրել է նա:

Այժմ ստուգվում են կենտրոնական փողոցներով և պետական կառույցներին մոտ երթևեկող բոլոր մեքենաները:

Բայդենի թիմը ամերիկացիներին հորդորել է խուսափել մայրաքաղաք մեկնելուց ՝ կորոնավիրուսի համաճարակի պատճառով, իսկ տեղական պաշտոնյաներն առաջարկել են երդմնակալության արարողությունը դիտել հեռուստատեսությամբ և համացանցով: Ամենամեծ հանրահավաքները սպասվում են կիրակի-երկուշաբթի:

Համաձայն Թրամփի կողմնակիցների ու ակտիվիստների հորդորների, կոչ է արվում երդմնակալության օրը երթով շարժվել դեպի Վաշինգտոն: Որոշ խմբեր էլ կողմնակիցներին են խորհուրդ են տալիս չմեկնել Վաշինգտոն՝  ուշադրություն հրավիրելով անվտանգության ուժեղացված միջոցառումների վրա կամ զգուշացնելով, որ գործողությունները կարող են լինել ոստիկանության «ծուղակները»:

Երկրի ամբողջ տարածքում բոլոր նահանգները նախազգուշական տարբերմիջոցներ են ձեռնարկում ՝ սկսած կառավարական շենքերի պատուհանների ցանցապատումից մինչև հանրահավաքների արգելք: Մերիլենդի, Նյու Մեխիկոյի եւ Յուտայի նահանգապետները բողոքի ցույցերից առաջ հայտարարել են արտակարգ դրություն: Կալիֆոռնիան, Փենսիլվանիան, Միչիգանը, Վիրջինիան, Վաշինգտոնը, Վիսկոնսինը և այլ նահանգներ Ազգային գվարդիայի իրենց խմբերին են բերել պատրստության աստիճանի, իսկ Տեխասը ժամանակավորապես փակել է տեղի Կապիտոլիումի շենք մուտքը:

Փորձագետները կարծում են, որ բռնությունների ամենամեծ ռիսկը այն նահանգներում է, որտեղ նախընտրական և հետընտրական կրքերը  հատկապես թեժ են եղել և արդյունքները վիճարկվել են: Միչիգանում, նկատի ունենալով այդ ամենը, տեղի Կապիտոլիումի շենքի շուրջ երկու մետրանոց ցանկապատ է կանգնեցվել:

Հիշեցնենք, Ջոզեֆ Բայդենի երդմնակալության արարողությունը տեղի է ունենալու այս շաբաթ՝ հունվարի 20-ին: Թրամփը հայտարարել է, որ չի մասնակցելու արարողությանը:

Այս շաբաթ Թրամփը դարձավ ԱՄՆ պատմության մեջ առաջին նախագահը, որին երկու անգամ իմփիչմենթ է հայտարարվել: Սենատը, որը պետք է հաստատի որոշումը, խոստանում է, որ կքննարկի բռնության հրահրման մեղադրանքները նոր նախագահի երդմնակալությունից հետո:

Իմփիչմենթի պատճառ էր դարձել Վաշինգտոնում Կապիտոլիումի շենքի վրա հարձակումը, որին նախորդել էր գործող նախագահ Դոնալդ Թրամփի կողմնակիցների հանրահավաքը: