Էկոնոմիկայի նախարարի կանխատեսմամբ՝ 2020 թվականի տնտեսական անկումը կլինի 8․5 տոկոս

Այսօր Կառավարությունում քննարկված նախագիծը վերաբերում էր անցած տարվա մայիսի 21-ին կայացված որոշման մեջ փոփոխություններ կատարելուն, համաձայն որի՝ մենք փորձել ենք պետություն եւ ձեռնարկատեր ներդրումային ֆոնդում ստեղծել այնպիսի պայմաններ, որ ֆոնդը կարողանա արդյունավետ աջակցություն ցուցաբերել մասնավոր սեկտորին: Այս մասին ՀՀ կառավարության նիստից հետո լրագրողների հետ զրույցում ասաց էկոնոմիկայի նախարար Վահան Քերոբյանը։

«Կառավարությունը խնդիր ունի ռիսկի դիմելու: Դեռեւս նախանցած տարվա դեկտեմբերի 12-ին վարչապետը Կառավարության նիստի ժամանակ ասաց, որ ամբողջ պետական կառավարման համակարգը հակադրված է փոփոխություններին: Ես դա զգում եմ, բայց այդտեղ պատճառն այն չէ, որ մարդիկ չեն ուզում փոխվել, ուղղակի ամեն քայլափոխին մարդկանց ասում են՝ եթե դու սա անես, կլինի այսպիսի ռիսկ, նա անես՝ կլինի այնպիսի ռիսկ, ինչը կաշկանդում է բոլորին եւ չի թողնում աշխատել: Դա օդի մեջ կախված է, այսինքն՝ ամեն տեղ կա, աշխատանքի մշակույթ է, որը պետք է փոխել»,- ասաց նախարարը:

Նրա խոսքով՝ նախորդ Կառավարությունների մեջ կար հստակ հակակշիռ, մոտիվացիա, դա կոռուպցիան էր. «Այսինքն՝ դու գիտեիր, որ այս կողմից ռիսկ կա, եւ այդ ռիսկի գնալու վարձը կոռուպցիան էր: Հիմա քանի որ կոռուպցիա չկա, մարդիկ առանձնապես մոտիվացիա չունեն ռիսկի գնալու, հետեւաբար ընտրում են ավելի պահպանողական աշխատելաոճը, որը պետք է փոխվի»։

Քերոբյանն անդրադարձավ նաեւ 2020 թվականի տնտեսական վնասներին՝ նշելով, որ առավել շատ վնասներ կրել են ներմուծում, արտահանում եւ սպառում իրականացնող ընկերությունները:

Նախարարի խոսքով՝ մոտավորապես 20 տոկոս անկում կա այդ երեք ոլորտներում։ Նա կանխատեսում է, որ 2020 թվականի տնտեսական անկումը կլինի 8․5 տոկոս:

«Ունենք քայլերի երկար ցուցակ, եւ այսօրվա որոշումը այդ քայլերից մեկն է: Այսօր կային նաեւ այլ որոշումներ չզեկուցվող հարցերի մեջ, որոնք նույնպես ուղղված էին մեր տնտեսական պոտենցիալը պաշտպանելուն եւ մեր տնտեսվարողների համար ավելի լավ տնտեսական պայմաններ ստեղծելուն: Էլի կրկնում եմ՝ իմ լավատեսությունը տնտեսության նկատմամբ չի փոխվել, երկնիշ տնտեսական աճն իմ թիրախն է»,- նշեց Քերոբյանը։

Անդրադառնալով ներդրումների վերաբերյալ հարցերին՝ նա ասաց, որ չի տարանջատում ներքին եւ արտաքին ներդրողներին, եւ այդ առումով կարող է ասել՝ կան շատ ներդրողներ. «Ամեն օր հանդիպում եմ մի քանի նման ներդրողի հետ եւ լուծում նրանց առջեւ ծառացած խնդիրները»։  

Հարցին՝ ե՞րբ հանրությունը կտեսնի խոշոր ներդրում Հայաստանում, նախարարը պատասխանեց, որ հենց հիմա կարող են գնալ, եւ ինքը ցույց կտա 100 մլն-անոց ներդրում. խոսքը կառուցապատմամբ զբաղվող «Ռենշին» ընկերության մասին է:

Անդրադառնալով թուրքական եւ ադրբեջանական մակնշմամբ ապրանքների առկայությանը Հայաստանի շուկայում՝ Քերոբյանն ասաց. «Տասնյակ տարիներ Հայաստանի շուկայում եղել են ապրանքներ, որոնց վրա եղել է թուրքական մակնշում, ադրբեջանական մակնշում, եղել են բազմաթիվ թուրքական ապրանանքներ, եւ դա այն ժամանակ համարվել է նորմալ: Հիմա, եթե մենք պնդենք, որ «Սանդորան» կամ «Կոկա Կոլան» մեզ վաճառեն ապրանք, որոնց վրա չկա ադրբեջաներեն մակնշում, այդ ժամանակ գնաճը կբարձրանա եւ կդառնա 10 տոկոս, որովհետեւ այդ ընկերությունները պետք է փող ծախսեն եւ դա մտցնեն իրենց ապրանքի գնի մեջ»:

Խոսելով թուրքական ապրանքների ներկրման արգելքի մասին՝ Քերոբյանն ասաց. «Այս պահին մենք հակված ենք լինելու երկարացնել թուրքական ապրանքների ներկրման արգելքը, եթե աշխարհաքաղաքական այնպիսի փոփոխություններ չլինեն, որոնց արդյունքում դա անհնար դառնա: Դա արվում է տեղական արտադրանքը պաշտպանելու համար»:

Լրագրողները հետաքրքրվեցին նաեւ գնաճից, ինչին ի պատասխան՝ նախարարը նշեց, որ Հայաստանում գնաճը գտնվում է թիրախային մակարդակում, այսինքն՝ չի գերազանցելու 2-2.5 տոկոսը: 

Նրա խոսքով՝ էապես ավելի քիչ գնաճ կա, քան մեր հարեւան եւ առեւտրային գործընկեր երկրներում: Ըստ նրա՝ Ռուսաստանը, Բելառուսը, Ղազախստանը, Թուրքիան, Իրանը, Վրաստանն էականորեն ավելի մեծ գնաճ ունեն. «Մերը, ի պատիվ Կենտրոնական բանկի, գտնվում է շատ մեղմ վիճակում: Հիմա, եթե կոնկրետ ապրանքների վերաբերյալ խոսենք, ինչ-որ մի ապրանքի թանկանալը փոխհատուցվում է այլ ապրանքի էժանանալով: Միջազգային շուկաներում որոշ ապրանքների գներ կտրուկ բարձրացել են, ու այստեղ Հայաստանը չի կարող իր սեփական քաղաքականությունը մշակել, որ աշխարհում գները նվազեն»։