Երիտասարդներն ուժեղ էին փորձառուներից. ավարտվել է ազատ ոճի ըմբշամարտի Հայաստանի առաջնությունը

Նոյեմբերի 26-ին տեղի է ունեցել ազատ ոճի ըմբշամարտի Հայաստանի առաջնությունը։ Այս տարի, տարբեր պատճառներով, մրցաշարի մասնակիցների քանակը քիչ էր։ Ուժեղ մրցակցություն կար հիմնականում թեթև ու միջին քաշային կարգվերում, իսկ բարձր քաշային կարգերում մասնակիցների քանակը քիչ էր։ Այդ պատճառով թեթև քաշային կարգերն անցան նորմալ՝ օլիմպիական մրցակարգով՝ 4 մրցանակակիրներով, իսկ բարձր քաշային կարգում պայքարն անցավ շրջանաձև մրցակարգով՝ երեք մրցանակակիրներով։ 92 կգ քաշային կարգում, ընդհանրապես, երկու ըմբիշ հանդես եկավ:

Բոլոր քաշային կարգերում գերազանց հանդես եկան երիտասարդ ըմբիշները, ովքեր վերջին տարիներին իրենց լավ ելույթներով աչքի էին ընկնում Եվրոպայի և աշխարհի երիտասարդական առաջնություններում։

57 կգ քաշային իրեն հավասարը չունեցավ Եվրոպայի 2019թ․-ի չեմպիոն Արսեն Հարությունյանը, ով եզրափակչում պարտության մատնեց մեկ այլ տաղանդավոր երիտասարդ մարզիկի՝ Կարեն Զուրաբյանին։ Օլիմպիական մեկ այլ՝ 65 կգ քաշային կարգում վստահ ելույթ ունեցավ Եվրոպայի երիտասարդների ու պատանիների բազմակի չեմպիոն և մրցանակակիր արտաշատցի Վազգեն Թևանյանը։  Այս քաշային կարգում նրա հիմնական մրցակիցը՝ Վալոդյա Ֆրանգուլյանը պարտվեց Գևորգ Թադևոսյանին  ավելի վաղ փուլում։ Եզրափակիչում Թևանյանը պարտության մատնեց հենց Թադևոսյանին, իսկ Ֆրանգուլյանը ստիպված էր բավարարվել բրոնզե մեդալով։

74 կգ քաշային կարգում Հրայր Ալիխանյանը եզրափակչում պարտության մատնեց փորձառու Վարուժան Կաջոյանին։ 86 և 97 կգ քաշային կարգերում անակնկալ տեղի չունեցավ․ հաղթող ճանաչվեցին Հովհաննես Մխիթարյանն ու Մարզպետ Գալստյանը։ 125 կգ քաշային կարգում հաղթողի կոչման համար պայքարում էին բացառապես երիտասարդ ըմբիշները․ վանաձորցի Հովհաննես Մաղաքյանը հաղթեց թե՛ Մարտին Սիմոնյանին, թե՛ Աշոտ Ռուշանյանին և դարձավ Հայաստանի չեմպիոն։ 97 և 125 կգ քաշային կարգերում բացակայում էին հավաքականի լեգիոներներ Խաջիմուրադ Գացալովն ու Լևան Բերիանիձեն, ովքեր չէին կարողացել ժամանել Երևան։

Ոչ օլիմպիական քաշային կարգերից հետաքրքիր մրցակցություն էր ծավալվել 70 կգ քաշային կարգում։ Արտաշատցի Արման Անդրեասյանը եզրափակչում պարտության մատնեց Նարեկ Սիրունյանին։ 61 կգ քաշային կարգում հաղթող ճանաչվեց Ռազմիկ Պապիկյանը, 79 կգ քաշային կարգում՝ Արման Ավագյանը, 92 կգ քաշային կարգում՝ Սերգեյ Սարգսյանը։

Հայաստանի հավաքականի գլխավոր մարզիչ Հաբեթնակ Կուրղինյանը «Հայկական ժամանակի» հետ զրույցում նշեց, որ հատկապես գոհ է 57  և 65 կգ քաշային կարգերում հաղթող ըմբիշների ելույթներից։ 

Դեկտեմբերի 12-18-ը Սերբիայում պետք է տեղի ունենա ըմբշամարտի աշխարհի անհատական գավաթի խաղարկությունը։ Կուրղինյանի խոսքերով՝ հավաքականի կազմը պետք է ձևավորվի Հայաստանի առաջնության արդյունքներով, սակայն ավելի հստակություն՝ հավաքականի մասնակցության և վերջնական կազմի վերաբերյալ կլինի հաջորդ շաբաթվա ընթացքում։ Մարզիչը նշեց, որ մասնակցության դեպքում Գացալովն ու Բերիանիձեն չեն կարողանալու մասնակցել առաջնությանը։

Ազատ ոճի ըմբշամարտի Հայաստանի 2020թ-ի առաջնության հաղթողներն ու մրցանակակիրները.

57 կգ
1. Արսեն Հարությունյան
2. Կարեն Զուրաբյան
3. Սերժիկ Մխիթարյան
3. Վրեժ Գևորգյան

61կգ
1. Ռազմիկ Պապիկյան
2. Հարություն Մանուկյան
3. Նորիկ Հարությունյան
3. Րաֆֆի Արտուշյան

65 կգ
1. Վազգեն Թևանյան
2. Գևորգ Թադևոսյան
3. Վալոդյա Ֆրանգուլյան
3. Մուշեղ Մկրտչյան

70 կգ
1. Արման Անդրեասյան
2. Նարեկ Սիրունյան
3. Հայկ Պապիկյան
3. Գևորգ Մխեյան

74կգ
1. Հրայր Ալիխանյան
2. Վարուժան Կաջոյան
3. Խաչատուր Պապիկյան
3. Դավիթ Գևորգյան

79կգ
1. Արման Ավագյան
2. Ռազմիկ Սիմոնյան
3. Ազատ Կարապետյան

86կգ
1. Հովհաննես Մխիթարյան
2. Համլետ Հախվերդյան
3. Տիգրան Մկրտչյան

92կգ
1. Սերգեյ Սարգսյան
2. Լաբեր Գրիգորյան

97կգ
1. Մարզպետ Գալստյան
2. Կարո Խաչատրյան
3. Տարոն Բարսեղյան

125կգ
1. Հովհաննես Մաղաքյան
2. Մարտին Սիմոնյան
3. Աշոտ Ռուշանյան