Սուտը չպետք է գերազանցի իրականության 30 տոկոսը. մեր սուտը գերազանցել է 100 տոկոսը. Մովսես Հակոբյան

Բանակի զորացրվելու վերաբերյալ որոշումս դեռ վաղուց էի կայացրել՝ հոկտեմբերի 5-ից։ Այս մասին ասուլիսի ժամանակ հայտարարեց ՀՀ ՊՆ ռազմական վերահսկողության՝ վարչության արդեն նախկին պետ, գեներալ-գնդապետ Մովսես Հակոբյանը։

Հիշենցնեք, որ նա երեկ պաշտոնից ազատման դիմում է գրել:

«Ինչո՞ւ այն ժամանակ զեկուցագիր չեմ գրել, որովհետեւ հաշվի եմ առել, որ պատերազմի ընթացքում իմ որոշումը վնաս է հասցնելու զինված ուժերին եւ որոշել եմ սպասել մինչեւ պատերազմի ավարտը։ Այդ ընթացքում ես շարունակել եմ իմ հնարավորության սահմաններում աջակցել բանակին՝ իմ խորհուրդներով, ոչ անմիջական՝ միջնորդների միջոցով նաեւ ռազմաքաղաքական ղեկավարությանը»,- ասաց Հակոբյանը։

Նրա խոսքով՝ որոշումը վերջնական կայացրել է վարչապետի ուղիղ եթերից հետո, երբ, ըստ նրա, կոչ է արել կռվող տղաներին «վերադառնալ հրապարակ եւ վնգստացողներին դուրս վռնդել հրապարակից»։ 

Նշենք, որ վարչապետը ֆեյսբուքյան գրառում էր արել եւ հետագայում պարզաբանել, որ պատերի տակ վնգստացողների հարցերը լուծել ասելով՝ նկատի է ունեցել, որ առաջնագծի զինվորների վերադարձից հետո նրանց հետ խոսակցության արդյունքում վերջնականորեն կմարեն բոլոր այն խոսակցությունները, որոնք ակտիվ շրջանառության մեջ են դրվում, թե իբր ՀՀ ռազմաքաղաքական ղեկավարությունն ինչ-որ դավադրությունների մեջ է ներքաշված եղել։

«Ինչո՞ւ այդ ընթացքում չեմ խոսել, որովհետեւ զինվորականները առանց համապատասխան թույլտվության որեւէ լրատվամիջոցի հարցազրույց տալու կամ մեկնաբանելու թույլատվություն չունեն։ Ես այդ որոշման հեղինակներից մեկն եմ եւ կարծում եմ, որ ճիշտ է։ Ինչու եմ ուզում հարցազրույց տալ, որովհետեւ այս բոլոր՝ 44 օրվա ընթացքում սուտը, ստի տարածումը ոչ թե օգուտ են բերել մեր երկրին, այլ մեր երկիրը տարել են ավելի խոր ճգնաժամի առաջ։ Իմ խոսակցությունը հիմնականում լինելու է զինվորական, ոչ զինվորական հարցերի չեմ պատասխանելու»,- նշեց Հակոբյանը։

Հակոբյանն ասաց, որ չի ուզում մեղավորներ փնտրել, սակայն երկիրը կանգնած է ճգնաժամի առաջ, քանի որ ինչպես երկրի վարչապետը, այնպես էլ մի շարք պաշտոնավորներ երկիրը ղեկավարում են «Ֆեյսբուք»-ի միջոցով։

«Զինված ուժերում կա ինֆորմացիոն կենտրոն, որի խնդիրներից մեկն է հակառակորդին մոլորության մեջ գցելը, այսինքն՝ սուտ ինֆորմացիա տարածելը։ Բայց այնտեղ կա մի չափանիշ, որ սուտը չպիտի գերազանցի իրականության 30 տոկոսը։ Մեր սուտը գերազանցել է իրականության 100 տոկոսը, որը որեւէ մեկի մոտ ընկալելի չէ։ Դրանից է բխում, որ մեր հասարակությունը, կռված տղաները՝ թե՛ զինվորները, թե՛ զորահավաքի մասնակիցները, թե՛ պայմանագրայինները, չէին հասկանում, թե ինչու այսպես եղավ։ Մի մասը կարծում է, որ մենք հաղթում էինք, պատերազմը կանգնեցրին, մի մասը, որ մենք պետք է կանգնեցնեինք պատերազմը»,- ասաց Հակոբյանը։

Նախկին պաշտոնյայի խոսքով՝ այսօր վերադարձած իրենց մարտական ընկերները հարցազրույցներ են տալիս, որն իրենց չի վերաբերում, եւ զինվորը սկսում է քննարկել գլխավոր շտաբի պետի որոշումները։

«Դրան մեծ աջակցություն եք ցուցաբերում դուք՝ լրատվամիջոցներդ, ձեր հարցերով։ Իմ խնդրանքն է, որ լրատվամիջոցները մարդկանց այնպիսի հարցեր ուղղեն, որոնք ունակ են իրենք պատասխանել։ Զինվորին կարելի է հարց տալ իր խրամատի եւ իր խրամատի առաջ տեղի ունեցող իրադարձություններից։ Այն մարդիկ, որոնք կռվել են, չեն խոսում, որովհետեւ խոսելու ժամանակ չեն ունեցել։ Այն նկարները, որը ցուցադրում են՝ պառկած եւ ամեն ուտելիք կա, դա պատերազմի դաշտ չէ, դա խորք է, անտառներ են, որովհետեւ պատերազմը շատ հեռու է։ Հավաքված սննդի կազմակերպումը այս պարագայում հանցագործություն է, որովհետեւ բոլորին հրահանգ է տրված, որ 2-3 հոգուց ավելի մարդ մի տեղ չպիտի կուտակվի, որովհետեւ օդում մեր հնարավորությունը խնդրահարույց է եղել»,- ասաց նա։