Այլևս երբեք-ի ի՞նչն է անհասկանալի. Սփյուռքը պահանջում է զսպել թուրք-ադրբեջանական ագրեսիան, պատերազմը լուսաբանել օբյեկտիվ

Արցախի Հանրապետության ճանաչման, թուրք-ադրբեջանական ագրեսիան դադարեցնելու, քաղաքացիական հասարակությանը հրետակոծելն ու ռմբակոծելը դատապարտելու, Թուրքիային ՆԱՏՕ-ի անդամակցությունից զրկելու պահանջներով աշխարհի տարբեր երկրներում շարունակվում են հայկական սփյուռքի բողոքի ակցիաները տեղի իշխանությունների, Թուրքիայի եւ Ադրբեջանի ներկայացուցչությունների շենքերի մոտ:  

Լոս Անջելեսում հայ համայնքի բազմամարդ ցույցերը շարունակվում են ավելի քան մեկ շաբաթ։ Հայերի շարքերում արդեն արդարություն ու խաղաղություն են պահանջում նաեւ բազմաթիվ ամերիկացիներ։ Հայոց պահանջներին են միացել տեղական կառավարման մարմինների պաշտոնյաներ, կոնգրեսականներ, հոգեւորականներ, հայերին աջակցություն է հայտնել նաեւ Լոս Անջելեսի քաղաքապետ Էրիկ Գարսետտին:

Լոս Անջելեսում հայերը բողոքի երթով հասել են նաեւ Թուրքիայի հյուպատոսարանի առջեւ, լուսարձակով Արցախի դրոշն են պատկերել Թուրքիայի հյուպատոսության շենքի վրա՝ իրենց բողոքն արտահայտելով պատերազմում ադրբեջանական կողմին թուրքական աջակցության կապակցությամբ: Շուրջ 170 հազար մարդու մասնակցությամբ անցկացված երթն ամերիկյան առաջատար լրատվամիջոցները բնութագրել են որպես բացառիկ խաղաղ՝ հանուն խաղաղության:

Հիշեցնենք, որ ԱՄՆ-ի այլ նահանգներում եւ քաղաքներում՝ Կորոլադոյում, Յուտայում, Սակրամենտոյում, Նյու Յորքում, Սիեթլում, Ֆրեզնոյում, Ֆիլադելֆիայում, Սանտա Կլարիտայում, Բոստոնում, Լաս Վեգասում, Սան Ֆրանցիսկոյում, Դալլասում եւս բողոքի ակցիաներ են եղել: Հայկական համայնքն այստեղ տեղական եւ կենտրոնական կառավարությունից պահանջել է հակամարտության կողմերին անդեմ կոչեր անելուց բացի ձեռնարկել գործուն քայլեր:

ԱՄՆ-ի կողմից Ադրբեջանի եւ Թուրքիայի ֆինանսավորման դադարեցման ու ԱՄՆ-ի միջամտությամբ Թուրքիային ՆԱՏՕ-ի անդամակցությունից զրկելու պահանջներով Ամերկայի տարբեր անկյուններից Վաշինգտոն հասած հայերը բողոքի ակցիա են անցկացրել Սպիտակ տան մոտ։ Այստեղ ամերիկյան կառավարությանն ուղղված պահանջներից բացի՝ նրանք դիմել են նաեւ միջազգային մամուլին՝ բողոքելով Ադրբեջանի կողմից Արցախի վրա հարձակումով սկսված պատերազմը, ինչպես նաեւ հակամարտության պատմությունը ոչ օբյեկտիվ լուսաբանելու դեմ։

Մասնավորապես, հայաշատ Լոս Անջելեսում հայերը մի քանի ժամով փակել են Հոլիվուդի զարկերակ համարվող մայրուղիներից մեկը, բողոքի ցույց կազմակերպել Los Angeles Times-ի խմբագրության եւ CNN հեռուստաընկերության առջեւ՝ պահանջելով պատերազմի օբյեկտիվ լուսաբանում։ Առաջատար հեռուստատեսությունը, որ մինչ այդ միակողմանի մոտեցմամբ էր լուսաբանում ընթացող պատերազմը, տեղի էր տվել եւ խոսքի հարթակ էր տրամարդել հայերին։

Ֆրանսիայի Լիոն քաղաքում գտնվող «Եվրոնյուզ» հեռուստաընկերության առջեւ հավաքված հայերը եւս լրատվամիջոցից պահանջել են անաչառ լուսաբանում եւ հայկական կողմի մասին խոսելիս չօգտագործել անջատողական տերմինը: Բողոքի ակցիա էր կազմակերվել նաեւ Ստրասբուրգ քաղաքում:

Ի զորակցություն Արցախին ու Հայաստանին, տեղական իշխանություններից պահանջելով դատապարտել Ադրբեջանի ու Թուրքիայի ագրեսիան, տեղական լրատվամիջոցներից պահանջելով օբյեկտիվ լուսաբանել իրադարձությունների հայ-ադրբեջանական հակամարտության գոտում՝ բողոքի ակցիաներ են կազմակերպվել նաեւ Գերմանիայի Բեռլին, Ֆրեյբուրգ, Քյոլն քաղաքներում, Նիդերլանդների Ամստերդամ, Հաագա, Հունաստանի Թեսաղոնիկե, Իտալիայի Միլան, Ավստրիայի Վիեննա, Շվեյցարիայի Բեռն, Ցյուրիխ, Բելգիայի Բրյուսել, Ֆինլանդիայի Հելսինկի, Բեծ Բրիտանիայի Լոնդոն, Շվեդիայի Ստոկհոլմ, Բրազիլիայի Սաո Պաոլո, Լեհաստանի Վարշավա, Իսպանիայի Մալագա, Սլովակիայի Բրատիսլավա, Չիլիի Սանտյագո, Մոնտեվիդեոյի Մոնտեվիդեո, Արգենտինայի Բուենոս Այրես, Իսրայելի Երուսաղեմ, Կանադայի Մոնրեալ եւ Տորոնտո քաղաքներում:

Ամենուր հայկական Սփյուռքը հնչեցրել է Արցախի ճանաչման եւ թուրք-ադրբեջանական ագրեսիան զսպելու պահանջներ: Հայաստանի եւ Արցախի եռագույն դրոշներով երթի ու ցույցի ելած հայերը պարզել են պաստառներ «Արցախը Հայաստան է», «Կրկին 1915-ն է», «Կանգնեցրեք Ալիեւին», «Կանգնեցրեք Էրդողանին», «Խաղաղություն Հայաստանին», «Արցախը հզոր է», «Հայաստանը խաղաղություն է ուզում, Ադրբեջանը՝ Հայաստանը», «Օգնեք եւ պաշտպանեք հայերին», «Սանկցիաներ՝ Թուրքիային», «Հայաստանը՝ համաշխարհային ահաբեկչության դեմ է կռվում», «Հայաստանն իր ընկերների կարիքն ունի հենց հիմա» գրություններով: Առանձնանում է մեկ պաստառ, որ իր ֆեյսբուքյան էջում հրապարակել է Աժ նախագահ Արարատ Միրզոյանը. «Այլևս երբեքի ի՞նչն է անհասկանալի»: