«Տուժող անձանցից ոչ ոք տուժող չի ճանաչվել սահմանադրական կարգի տապալումից»․ Ռոբերտ Քոչարյանի պաշտպան

Երեւանի ընդհանուր իրավասության դատարանում՝ դատավոր Աննա Դանիբեկյանի նախագահությամբ, այս պահին քննվում է Մարտի 1-ի գործով ամբաստանյալ Ռոբերտ Քոչարյանի պաշտպանների միջնորդությունը տուժողների եւ նրանց ներկայացուցիչների կարգավիճակի վերաբերյալ։

Նշենք, որ այս միջնորդության քննությունը սկսվել էր նախորդ դատական նիստին․ պաշտպանները ներկայացրել էին իրենց հիմնավորումներն այն մասին, որ գործի՝ դատարան ուղարկված այս անջատված մասով որեւէ մեկը չէր կարող տուժողի կարգավիճակ ունենալ։ Միջնորդության դեմ առարկել էին մեղադրող դատախազները։

Այսօրվա նիստին Քոչարյանի պաշտպան Հայկ Ալումյանը հայտարարություն արեց դատախազների առարկության վերաբերյալ։ Նա նախ հիշեցրեց, որ առարկելիս դատախազները հայտարարել են, որ բոլոր նրանք, ովքեր Մարտի 1-ի՝ նախաքննության փուլում գտնվող գործով տուժող են ճանաչված եղել, ինքնաբերաբար այդ կարգավիճակը պահպանում են նաեւ այս անջատված գործով։ Դատախազների այս պնդումը, սակայն, ըստ պաշտպանի, սնանկ է եւ գործնականում չի էլ կիրառվում․ «Եթե իրոք այդպես են համարում, պիտի դատակոչեին նախաքննության փուլում գտնվող գործով տուժող ճանաչված բոլոր 228 հոգուն, բայց իրենք իրենց այդ փաստարկը գործնականում չեն կիրառել, չգիտեմ՝ ինչ չափանիշներով, եւ իրենցից բացի ոչ ոք երեւի չգիտի, միայն 102 տուժողի են դատակոչել այս գործով, հետեւաբար իրենց փաստարկը հիմք չեն ընդունում, չեն հավատում, այլ բերում են՝ տպավորություն ստեղծելու համար»։

Ալումյանը դատարանին ներկայացրեց երկու փաստաթուղթ, որոնցից առաջինում Մարտի 1-ի մայր գործով տուժող ճանաչված 228 հոգու անուններն էին, երկրորդում՝ դատարան ուղարկված գործով՝ դատակոչված 102 տուժողների անունները․ «Մասը անջատվում է կա՛մ մեկ, կա՛մ մի քանի անձանց նկատմամբ, եւ եթե մեղադրողների տրամաբանությամբ առաջնորդվենք, ապա այստեղի մեղադրյալները պետք է մեղադրյալ լինեին նաեւ ՀՔԾ-ում գտնվող քրեական գործով, եւ ոչ միայն իրենք, այլ նաեւ 7-ի գործով մեղադրյալները, օրինակ՝ պարոն Փաշինյանը, այսինքն՝ եթե դատավարության մասնակիցները իրենց կարգավիճակը պահպանում են ե՛ւ անջատված մասով, ե՛ւ չանջատված, դա է ստացվում, բայց այդ տրամաբանությամբ մտնում ենք ուղիղ փակուղի»։

Հայկ Ալումյանը նաեւ նշեց, որ հենց 7-ի գործով նույնանման իրավիճակ է եղել, եւ Վերաքննիչ դատարանի օրինական ուժի մեջ մտած որոշմամբ արձանագրվել է, որ մայր գործով տուժող ճանաչված անձինք անջատված գործով դատարան չեն կանչվել, քանի որ դատարան ուղարկված գործի մեղադրանքում նշված գործողություններով որեւէ մեկին անմիջականորեն վնաս չի պատճառվել։

Ալումյանը հետաքրքրվեց՝ արդյո՞ք դատարանը տեղյակ է, թե ինչու տուժող կողմն այսօր չի ներկայացել դատարան, եւ հիշեցրեց, որ դատավորը ցանկացել էր լսել նաեւ տուժողների կարծիքը իրենց միջնորդության վերաբերյալ։ Ի պատասխան պաշտպանի հարցին՝ դատավորը տեղեկացրեց, որ իրենք որեւէ տեղեկություն չունեն։

Ռոբերտ Քոչարյանի պաշտպան Հովհաննես Խուդոյանն էլ կարծիք հայտնեց, որ Հայկ Ալումյանի ներկայացրած փաստաթղթերի ուսումնասիրությունից կարելի է համոզվել, որ այդ անձացից ոչ ոք տուժող չի ճանաչվել սահմանադրական կարգի տապալումից․ «Առկա է եղել հարուցված քրեական գործ, որը վերաբերել է զանգվածային անկարգությունների, հետագայում դրանից գործ է առանձնացվել սպանությունների, այլ դրվագներով, եւ յուրաքանչյուր անձ տուժող է ճանաչվել ուղղակիորեն այն արարքից, որով իրեն անմիջականորեն պատճառվել է կամ կարող էր պատճառված լինել վնաս»,- ասաց նա՝ ընդգծելով, որ որոշում կայացնելիս դատարանը պետք է պատճառաբանի, թե ինչու այս գործով կարող են լինել տուժողի կարգավիճակ ունեցողներ կամ ինչու չեն կարող․ «Այն պարագայում, երբ ՀՔԾ-ն առ այսօր չի կարողացել կոնկրետացնել, թե կոնկրետ անձանց մահվան, վնասման, գույքի վնասման հանգամանքները ինչպես են առաջացել, չի կարող անմիջական կամ միջնորդավորված որեւէ կապ լինել որեւէ անձի հետ, այսինքն՝ նախապես պետք է լինի վարկած եւ ապացուցվի, որ այս անձը կոնկրետ տուժել է այս-այս գործողության արդյունքում»։

Այս պահին ելույթ է ունենում մեղադրող կողմը։