Գազից պայթյուններ, թունավորումներ. անվտանգության ինչ կանոնների պետք է հետեւել՝ այդ ամենից խուսափելու համար

Երեկ Երեւանի Քանաքեռ-Զեյթուն վարչական շրջանի Ռայնիսի 1 հասցեի քառահարկ շենքում պայթյունի նախնական պատճառը գազի արտահոսքն է, թեպետ կատարվածի մանրամասները դեռեւս հայտնի չեն: Առայժմ պարզ չէ՝ բնակիչների անփութությա՞ն, թե՞ համապատասխան մարմինների անուշադրության պատճառով է եղել դեպքը: Ինչ էլ եղած լինի, կատարվածն ում մեղքով էլ լինի, սա եւս մեկ անգամ մեզ հուշում է, որ անհրաժեշտ է մաքսիմալ ուշադիր լինել կենցաղում բնական գազից օգտվելիս:

Ձեր եւ ձեր ընտանիքի անդամների կյանքի անվտանգության ապահովման նպատակով առաջարկում ենք եւս մեկ անգամ ուշադիր վերընթերցել «Գազպրոմ Արմենիա» ՓԲԸ-ի անվտանգության հրահանգավորման պահանջները:

Շինություններում գազի հոտ զգալու դեպքում բաժանորդը պարտավոր է՝

1. բացել պատուհանները եւ օդափոխության փեղկերը, օդափոխել շենքը,

2.փակել գազասարքերի եւ սնող գազախողովակների վրա տեղադրված խցանային փականները,

3.զանգահարել գազի վթարային ծառայություն 1-04 հեռախոսահամարով:

Արգելվում է՝

• օգտվել լուցկուց կամ բաց կրակից, ծխել,
• միացնել կամ անջատել էլեկտրասարքավորումները,
• երեխաներին եւ հրահանգավորում չանցած անձանց օգտվել գազասարքերից,
• ինքնուրույն վերացնել գազասարքերի անսարքությունները: Նման դեպքերում պետք է փակել գազի փականները եւ կանչի միջոցով տեղեկացնել ներտնային համակարգի տեխնիկական սպասարկումն իրականացնող ծառայությանը:

Ջրատաքացուցիչից եւ ջեռուցման սարքից օգտվելու դեպքում անհրաժեշտ է՝

համոզվել, որ գազի արտահոսք չկա և բոլոր փականները փակ վիճակում են, օդի ներհոսքի համար դռան ներքևի մասում նախատեսված բացվածքը և օդափոխության ուղին բաց են, վառվող լուցկու բոցը մոտեցնել գազասարքի վրա օդի ներհոսքի համար նախատեսված բացվածքին և ստուգել ծխատարում քարշը:

Նորմալ քարշի դեպքում բոցը շեղվում է դեպի գազասարք: Հետադարձ քարշի դեպքում բոցը թեքվում է դեպի շինություն, իսկ քարշի բացակայության դեպքում այն չի շեղվում: Հետադարձ քարշի կամ դրա բացակայության դեպքերում պետք է դիմել գազամատակարարին (տեխ. սպասարկում իրականացնող ծառայությանը), քարշի առկայության դեպքում միացնել գազասարքը` համաձայն գազասարքը արտադրող գործարանի տեղեկաթերթիկում նշված շահագործման հրահանգի,

գազասարքը գործարկելուց 3-5 րոպե հետո կրկին անգամ ստուգել ծխատարում քարշի առկայությունը,

գազասարքերի երկարատեւ օգտագործման ընթացքում հաճախակի օդափոխել շինությունը,

ձմռանը ծխատարի սառցակալումը և խցանումը բացառելու նպատակով հաճախակի ստուգել դրանց գլխամասերը:

Գազասարքերի ծխահեռացման թիթեղյա խողովակների հավաքակցման դեպքում՝

• գազասարքերի միացումները ծխատար ուղիներին անհրաժեշտ է կատարել ոչ պակաս 1մմ հաստություն ունեցող, գազասարքի ծխատար կարճախողովակի տրամագծից ոչ պակաս թիթեղյա խողովակներով,
• հորիզոնական տեղամասի ընդհանուր երկարությունը չպետք է գերազանցի 0 մետրը, ունենա խողովակի տրամագծից ոչ պակաս կորացման շառավղով 3-ից ոչ ավելի անկյունակներ և ունենա 1 գծամետրի վրա 1սմ-ից ոչ պակաս թեքություն դեպի տեղադրված սարքը,
• ուղղահայաց տեղամասի չափը՝ հաշված գազասարքի ծխահեռացման կարճախողովակից մինչև հորիզոնական մասը պետք է լինի 5 մետրից ոչ պակաս, իսկ 2.7 մետր բարձրություն ունեցող շինություններում՝ 0.15 մետրից ոչ պակաս,
• խողովակները պետք է մտցվեն մեկը մյուսի մեջ դրանց տրամագծի կեսից ոչ պակաս չափով, ծխագազերի շարժման ուղղությամբ:

չի թույլատրվում՝

• օգտվել ինքնաշեն կամ անսարք վիճակում գտնվող գազասարքերից,
• գազասարքերի միացումները ծխատար ուղիներին իրականացնել փայլաթիթեղյա ծալքավոր խողովակներով,
• կատարել թիթեղյա ծխատար խողովակների ինքնակամ ձեւափոխություններ, տրամագծերի նեղացումներ և դրանցում ստեղծել արհեստական դիմադրություններ,
• օգտվել գազասարքերից հետադարձ քարշի կամ քարշի բացակայության դեպքում, քանի որ այդ ժամանակ գազի թերայրման արդյունքում առաջանում է շմոլ (CO) գազ: Շինությունում շմոլ (CO) գազի 4-0.5% առկայության դեպքում 10-15 րոպեի ընթացքում մարդը մահացու թունավորվում է:

Անվտանգության ապահովման նպատակով «Գազպրոմ Արմենիա» ՓԲԸ-ն խստիվ արգելում է էլեկտրական սնուցումից անջատել բնակարաններում տեղադրված գազասպառման անվտանգության ազդանշանային սարքերը:

Անկախ այն պատճառներից, որոնք հանգեցրել են ազդանշանի առաջացմանը եւ գազամատակարարման վթարային դադարեցմանը, պետք է անմիջապես դիմել գազի վթարային ծառայություն (1-04 հեռախոսահամարով): Մինչեւ վթարային իրավիճակի առաջացման պատճառի վերացումը խստիվ արգելվում է ինքնակամ վերականգնել բնակարանի գազամատակարարումը: