ԱՄՆ-ը նոր ռեկորդներ է գրանցում, Հնդկաստանում վարակակիրների թիվն անցնում է միլիոնը. կորոնավիրուսային իրավիճակն աշխարհում

Կորոնավիրուսով վարակվածների թիվը Հնդկաստանում գերազանցում է 1 միլիոնը, Բրազիլիայում վարակակիրներն արդեն 2 միլիոն են կազմում, ԱՄՆ-ը թարմացրել է կորոնավիրուսի ռեկորդների թիվը, Բրիտանիայի վարչապետն էլ հույս ունի՝ մինչեւ Սուրբ ծնունդ մարդիկ կանցնեն նորմալ կյանքի:

Ջոն Հոփքինսի անվան հետազոտական համալսարանի տվյալներով, համաճարակի բռնկումից ի վեր  ամբողջ աշխարհում կորոնավիրուսով է վարակվել 13,8 միլիոն մարդ, մահացել է ավելի քան 590 հազարը:

Վարակի մասին վերջին տեղեկությունները՝ աշխարհի մի շարք կետերից՝ ամփոփ, BBC-ի անդրադարձում:

Հնդկաստանը արագ քայլերով հայտնվեց աշխարհի երկրների երրորդ հորիզոնականում՝ վարակակիրների թվով, զիջում է միայն ԱՄՆ-ին ու Բրազիլիային: 1,3 միլիարդ բնակչություն ունեցող երկրում 1 միլիոն վարակակիր ունենալը, թվում է, թե այդքան էլ մեծ ցուցանիշ չէ, սակայն վարակն այստեղ տարածվում է մեծ արագությամբ եւ առողջապահական համակարգը երկրում աշխատում է գերծանրաբեռնված: Հատկապես բարդ է իրավիճակն առավել աղքատ բնակավայրերում, որտեղ կաղում են նաեւ առողջապահական ռեսուրսները:

Բրազիլիայում վարակակիրների թիվը հասել է 2 միլիոնի, իսկ տարածման տեմպերը չեն դանդաղում:

Բրազիլիայում ապրում է մոտ 210 միլիոն մարդ: Երկրի նախագահ Ժաիր Բոլսոնարուն շարունակում է պնդել, որ վարակն այդքան էլ վտանգավոր չէ, չնայած այն հանգամանքին, որ իր կրկնակի թեստի պատասխանը դարձյալ դրական է ստացվել եւ շարունակում է բուժում ստանալ: Վերջին տվյալներով, կորոնավիրուսից Բրազիլիայում մահացել է 74 հազար մարդ, սակայն իրական թվերը կարող են ավելի մեծ լինել, քան պաշտոնապես հայտարարվում են:

ԱՄՆ-ում վերջին 1 օրում գրանցվել է համաճարակի բռնկունմից ի վեր վարակման ամենաբարձր ցուցանիշը՝ 74,5 հազար դեպք մեկ օրում: Վարակակիրների ընդհանուր թիվը, Հոփքինսի համալսարանի տվյալներով, այժմ գերազանցում է 3,57 միլիոնը:

Վարակման առավել մեծ ինտենսիվություն է նկատվում 30 նահանգներում: Covid-19-ից, 1 օրում ԱՄՆ-ում ավելի քան հազար մարդ է մահացել, ընդհանուր մահերի թիվը կազմում է շուրջ 138 հազար:

Washington Post-ի եւ  ABC News-ի համատեղ հարցումներից պարզ է դառնում, որ ամերիկացիների մեծ մասը դժգոհ է նախագահ Թրամփի կողմից երկրում  իրականացվող հակահամաճարակային միջոցառումներից: Հարցվածների 60 տոկոսը դժգոհել է ձեռնարկված քայլերից: Պարզվել է՝ ամեն 10 ամերիկացիներից 6-ը չի հավատում Covid-19-ի մասին Թրամփի հայտարարություններին:

Իսրայելում նորից անցնում են խիստ կարանտինային սահմանափակումների՝ վարակման  նոր դեպքերի աճով պայմանավորված: Ուրբաթ օրը, երեկոյան 17:00-ից մինչեւ կիրակի առավոտյան 05:00-ն Իսրայելում փակ են լինելու խանութները, սպորտդահլիճները, վարսավիրանոցները, կենդանաբանական այգիները, շուկաները, զբոսաշրջային տեսարժան վայրերը, իսկ ռեստորանները կարող են աշխատել միայն առաքման ծառայությամբ: Փաստացի, երկրում ստեղծվում է իրավիճակ, երբ մարդիկ չեն կարողանա տնից դուրս գալ ոչ աշխատանքային օրերին:

Փակ կլինեն նաեւ լողափերը, կարգելվի փակ կառույցներում 10 անձից ավել հավաքվելը: Երկրի վարչապետ Բենյամին Նեթանյահուն հայտարարել է, որ սահմանափակումները գործելու են բոլոր հանգստյան օրերին՝ մինչեւ հատուկ թույլտվությամբ դրանց վերացումը:

Կորոնավիրուսի նոր դեպքերի պատճառով Չինաստանի Ուրումչի քաղաքում ավելի քան 600 չվերթ է չեղարկվել: Պաշտոնական տվյալներով, այնտեղ 11 ասիմպտոմ եւ 6 սիմպտոմներով դեպքեր են արձանագրվել: Սահամանափակումները գործելու են նաեւ մետրոյի միակ կայարանի եւ մի շարք ավտոբուսային երթուղիների համար:

Սինցզյան քաղաքում գտնվող Քաշգար քաղաքի ելքն ու մուտքն էլ, իշխանությունների որոշմամբ, արգելափակվել է՝ այնտեղ եւս գրանցված նոր դեպքերի պատճառով:

Բելգիան, ամենայն հավանականությամբ, գտնվում է համաճարակի երկրորդ ալիքի հարվածի տակ: Այս մասին հայտարարել է բելգիացի վարակաբան Մարկ Վան Ռանստը: Ավելի վաղ հայտնի էր դարձել, որ 1 շաբաթում Բելգիայում վարակակիրների թիվն ավելացել է 32 տոկոսով: Վան Ռանստն իր թվիթերում նշել է, որ եթե նախկինում կորոնավիրուս էր հաստատվում ամեն 10-րդ բելգիացու մոտ, ապա այժմ ամեն երրորդ բնակիչն է վարակված: Առողջապահության նախարարությունը, սակայն, չի համաձայնել վարակաբանի տեսակետի հետ՝ հայտնելով, որ նոր դեպքերը գրանցվում են երկրի ֆլամանդական նահանգներում, որտեղ նախկինում վարակման դեպքերը քիչ են եղել:

Առողջապահության համաշխարհային կազմակերպությունն էլ հայտնում է, որ աշխարհը շարոււնակում է պայքարը կորոնավիրուսի նոր բռնկումների դեմ, առայժմ իրավիճակի լավացում չի նկատվում: