Մոսկվայի «Ֆուդ Սիթի» շուկայում արգելել են հայկական ծիրանի բեռնաթափումը

Մոսկվայի Օլխովայա մետրոյի կայարանին հարակից «Ֆուդ Սիթի» շուկայի տարածքում այս պահին 50-ից ավելի բեռնատարներ՝ հայկական ծիրանով բեռնված, չեն կարողանում վաճառքի հանձնել ապրանքը, քանի որ շուկայի ղեկավարությունը արգելել է ապրանքի բեռնաթափումը: Այս մասին ՀԺ -ի հետ զրույցում պատմեց շուկայում վաճառակետ ունեցող Արսեն Հովհաննիսյանը: Նա ասաց, որ մինչ այս պահը ոչ մի խնդիր չի առաջացել շուկայում գործունեություն ծավալելու պահով, սակայն, վերջին օրերին՝ հայ-ադրբեջանական սահմանին տեղի ունեցած սրացումներից հետո, շուկայի ղեկավարությունը՝ ծագմամբ ադրբեջանցի հրեաներ, խնդրել են, որպեսզի մեկ շաբաթով հայկական վաճառակետերը հանեն խանութների վրա փակցրված ցուցանակները, դադարեցնեն գովազդային վահանակների պտույտը՝ բացատրելով, որ դա զերծ կպահի վաճառողներին մտնող-դուրս եկող տարատեսակ անձանց ագրեսիվ դրսևորումներց և, բացի այդ, շուկայի ղեկավարությունը սառեցրել է հայկական ապրանքով բեռնված մեքենաների բեռնաթափումը շուկայի տարծքում:

«Մեր խանութները բաց են, աշխատում ենք, բայց կոնկրետ ծիրանի ֆուռերը հանել են դուրս: Էդ մարդիկ, տնից - տեղից կտրվել, եկել հասել են Մոսկվա, բայց չգիտեն ինչ անեն հիմա, փչացող ապրանք է՝ միլիոնների արժեք ունեցող: Սպասում ենք դեսպանատան ներկայացուցիչների պատասխանին, որ իրենք ասեն, ի՞նչ են պայմանավորվել ու ի՞նչ կարելի է անել: Կան առաջարկներ ուղարկել ապրանքը Մոսկվայի այլ շուկաներ, բայց խնդիրը նրանում է, որ հայկական ծիրանով բեռնված բեռնատարները վճարել են շուկայի սպասման սրահ մտնելու արժեքը՝ մոտ 40-50 հազար ռուբլի և, փաստորեն, խցանվել են այդ տարածքում: Եթե նույնիսկ նրանք հիմա լքեն այդ տարածքը, նրանց ոչ ոք չի պատրաստվում վերադարձնել այդ գումարը: Բացի դրանից, հանել ապրանքը բեռնափոխադրման փոքր սայլակներով ու տեղափոխել այլ վայր, նույնպես, խելամիտ չէ, քանի որ ճանապարհին այն ամբողջովին կփչանա»,-ասաց Արսենը:

«Ֆուդ Սիթին» խոշոր առևտրային կենտրոն է, որը որ միայն մանրածախ, այլ նաև մեծածախ առևտրով է զբաղվում: Այստեղ ժամանում են Ռուսաստանի տարբեր մարզերից ժամանած առևտրականներ, որոնք վերավաճառքով են զբաղվում: Շուկայի տարածքում առևտրին հիմանական տոն հաղորդում են ադրբեջանցիները, որոնք տիրապետում են հաճախորդների բազային՝ գնում են ապրանքը և վերավաճառում մեծածախ առևտրով զբաղվող գործարարներին: Հայերը այդ շղթայի մեջ ընդամենը մատակարարներ են: Այս պահին, ըստ մեր զրուցակցի, ադրբեջանցի վերավաճառողներին արգելել են գնել հայկական ապրանքը և վաճառել այն փոքրածախ առևտրով զբաղվողներին: Խոսքը կոնկրետ հայկական ծիրանին է վերաբերում:

ՌԴ-ում ՀՀ դեսպանությունից մեզ հայտնեցին, որ տեղյակ են իրավիճակին, այցելել են շուկա, կապի մեջ են մթերողների և Մոսկվայի քաղաքային առևտրի ոլորտը համակարգող պատասխանատուների հետ և փորձում են լուծում գտնել ստեղծված իրավիճակին:

Հարցը մեծ արձագանք է գտել նաև Մոսկվայի հայ  համայնքային կառույցների մոտ և, ինչպես մեզ տեղեկացրեց Ռուսաստանի Հայերի Միասնության (չխառնել Ռուսաստանի Հայերի Միության հետ) համանախագահ Մուշեղ Սյունին, իրենք ևս տեղյակ են խնդիրն և հայտնել են իրենց մտահոգությունը, քանի որ կատարվածը գլոբալ նշանակության խնդիր է, որը, անկասկած, ուղղորդվում է Բաքվի իշխանությունների կողմից: Սակայն, ըստ նրա, մի բան է երբ  նման պրովակացիոն դրսևորումները թափ են առնում Բաքվում, մեկ այլ բան է, երբ դրանք տեղի են ունենում այլ երկրներում՝ մասնավորապես Ռուսաստանում:  

«Կուզենայի հիշեցնել ադրբեջանցիներին, որ Ռուսաստանը բազմազգ և իրավական պետություն է, որտեղ իշխանությունները չեն հանդուրժի նման վերաբերմունք ցանկացած ազգության նկատմամբ: Բացի այդ, դժվար կլինի ռուսահայ համայնքին գրգռել և կոնֆլիկտի դրդել Ռուսաստանի նկատմամբ: Համոզված եմ, որ պատկան մարմինները արդեն ուշադրության տակ են պահում խնդիրը և կձեռնարկեն համապատասխան քայլեր այն հանգուցալուծելու համար»,-եզրափակեց Մուշեղ Սյունին:

Նաիրա Բաղդասարյան

Մոսկվա