Կորոնավիրուսի դեմ պատվաստանյութի վրա հույս դնել խորհուրդ չի տրվում. գերմանացի պրոֆեսորի դիտարկումները

Covid-19-ից մահացությունը աշխարհի ուշադրության կենտրոնում է, քանի որ դրանով են պայմանավորված տարբեր երկրներում թե հակահամաճարակային միջոցառումների ներդրումը, թե տնտեսական, կրթական ու մշակութային բազմաթիվ կազմակերպչական հարցեր:

Մահացության ցուցանիշի մասին գիտնականների հաշվարկները տարբեր են. ոմանք, Բրիտանիայում կորոնավիրուսի հարցերով խորհրդատու, պրոֆեսոր Նիլ Ֆերգյուսոնի գլխավորությամբ, համարում են, որ այս ցուցանիշը շատ քիչ է փոքր 1%-ից, ոմանք՝ Շվեդիայի կառավարությունում առողջապահական հարցերով խորհրդատու, վարակաբան Յոհան Գիեսեքի հաշվարկների հիման վրա՝ վստահ են, որ այդ թիվը մոտավորապես 0,1% է կամ հազարից մեկը:

«Թվում է, թե երկու դեպքում էլ տոկոսը մեկից փոքր է,- ասել է Բոննի համալսարանի պրոֆեսոր Հենդրիկ Սթրիքը «Լոքդաուն» հեռուստածրագրի շրջանակում,- սակայն այս ծայրակետերի միջեւ տարբերությունը շատ մեծ է: Դրա վերին կետում մենք պիտի անընդմեջ զգուշացնելու քաղաքականությունը որդեգրենք, քանի որ ավելի հանգիստ մոտեցումը կարող է նշանակել եւս հարյուր հազարավոր մահեր»:

Հենց այս պատճառով էլ կարեւորվում է գերմանացի պրոֆեսոր Հենդրիկ Սթրիքի կատարած ուսումնասիրությունը: Նա Գերմանիայի մի փոքրիկ քաղաքում դիտարկել է բնակչության՝ բավական մեծ մասի Covid-19-ով վարակվածությունը: Այստեղ վարակի բռնկումից մոտ 6 շաբաթ անց դիտարկման են ենթարկվել տնային տնտեսություններ՝ 2, 3, 4 անձից բաղկացած: Հակամարմինների թեստերի միջոցով որոշվել է վարակվածության աստիճանը: Պարզվել է՝ այն 15.5% է, որը պաշտոնական ցուցանիշը (3,1%) գերազանցել է ավելի քան 5 անգամ: Հիվանդությունը բոլորովին անախտանիշ է հաղթահարել հիվանդների 22.2%-ը:

Կարեւոր է նշել, որ նույն ընտանիքում ապրող ուսումնասիրության մասնակիցների կրկնակի վարակի ռիսկը, ըստ հետազոտության, աճել է մինչեւ 43.6%. որքան շատ են եղել ընտանիքի անդամները, այնքան մեծ է եղել այդ տոկոսը: Կամավորների շրջանակում կատարված հետազոտությունը թույլ է տվել եզրակացնել՝ որքան մեծ է եղել վարակի-վարակակիրների խտությունը հիվանդի շրջապատում, այնքան ծանր է եղել հիվանդության ընթացքը:

Պրոֆեսորը պատմել է դիմակահանդեսի մասնակիցների հետազոտության մասին՝ նշելով, որ այս ուսումնասիրությունը բավական հետաքրքիր արդյունքներ է տվել. «Կառնավալը սուպեր-վարակիչ միջոցառում է. երեկույթ, երբ բոլորը պարում են, երգում են, բարձր խոսում են՝ իրար շատ մոտ կանգնած, եւ համբուրում են միմյանց շուրթերը: Փակ տարածքում տեղի ունեցած այս դիմակահանդեսի մասնակիցներից վարակվեց 40 տոկոսը: Եթե դա լիներ բաց տարածքում, շատ ավելի փոքր թիվ կունենայինք»:

Անդրադառնալով լրագրողի՝ իմունիտետի եւ իմունային պատնեշի մասին հարցերին՝ պրոֆեսորն ասել է, որ շատ դժվար է դրանց պատասխանել, քանի որ հիմքեր կան ենթադրելու, որ այս վարակը կայուն իմունիտետ չի ձեւավորում: Նրա խոսքով՝ հետազոտությունները բավարար չեն դեռ, որ ասենք իմունիտետը պահպանվում է երկու ամիս, թե տարիներ: Ըստ նրա՝ հնարավոր չէ երաշխավորել, որ, առհասարակ, բոլոր վարակակիրների մոտ կայուն իմունիտետ ձեւավորվում է: Նա խորհուրդ է տվել ընդհանրապես հույս չդնել իմունիտետի ձեւավորման վրա, այլ՝ շարունակել պահպանել նոր ձեւավորված սովորույթները՝ խուսափել ձեռքսեղմումներից, մոտ տարածությունից շփվելուց, գրկախառնումներից, որպեսզի հնարավոր լինի խուսափել վարակվելուց:

Իսկ ինչ վերաբերում է պատվաստանյութին, պրոֆեսորը բավական թերահավատ է, որ երբեւէ արդյունավետ պատվաստանյութ կլինի: «Որեւէ կորոնավիրուսի դեմ էֆեկտիվ պատվաստանյութ չենք ունեցել: Նոր կորոնավիրուսի համար երբ կլինի, կամ կլինի թե չի լինի, չենք կարող ասել»: Սա նշանակում է, որ վիրուսն ամբողջությամբ ճնշելու փորձերի ու պատվաստանյութին սպասելու փոխարեն պետք է թույլ տալ հիվանդության աստիճանական տարածումը փոքր չափաբաժիններով՝ հիգիենայի բոլոր միջոցառումները շարունակաբար պահելով: «Վերջիվերջո, ինչպես գրիպը, այնպես էլ կորոնավիրուսները, մեզ համար ինչ-որ չափով կառավարելի շարունակական սպառնալիքներ են»,- ասել է նա:

Ամփոփելով՝ պրոֆեսորը նշել է, որ այս հետազոտության արդյունքներով կարելի է փաստել, որ վարակը նվազագույնը երեք անգամ պակաս մահացու է, քան հաղորդվում էր մինչ այս պաշտոնապես. «Համոզված եմ, որ SARS-COV-2-ը պատրաստվում է դառնալ էնդեմիկ վիրուս, ինչը նշանակում է, որ այն պատրաստվում է ապրել մեր աշխարհում, մեզ հետ, եւ մենք պետք է սկսենք ապրել դրա հետ եւ գտնել միջոցներ, որ ոչ միայն մարդիկ չմահանան սրանից, այլեւ՝ կյանքը վերադառնա իր բնականոն հունը»: