Անտեղի տեղը մարդուն հերոսացնում եք. Գագիկ Ծառուկյանը պատգամավորներին կոչ արեց իր մասով որոշումը կայացնել խղճի համաձայն

«Բարգավաճ Հայաստան» կուսակցության առաջնորդ Գագիկ Ծառուկյանը քիչ առաջ Ազգային ժողովում խոսեց իրեն վերագրվող մեղադրանքների, հարուցված քրգործերի եւ իրեն անձեռնմխելիությունից զրկելու հիմքերի մասին:

«Հարգելի խորհրդարան, սիրելի ժողովուրդ: Ես դիմում եմ ժողովրդին: Այս ամենը սկսվել է հունիսի 5-ին, երբ մենք կազմակերպեցինք ԲՀԿ քաղխորհրդի նիստ եւ լիարժեք իրավիճակը նայելով՝ տնտեսական, քաղաքական, սոցիալական, արտադրական, գյուղատնտեսական, առողջապահական, եւ լիարժեք նրկայացրինք այն, ինչ որ կա: Ոչ թե մեր ժողովրդին մենք ներկայացնում ենք ֆեյսբուքներով, ֆեյքերով, ՊՈԱԿ-ի 500 աշխատողով, որ պետական գումար է ստանում»,- նկատեց պատգամավորը:

Ծառուկյանը նշեց, որ հեղափոխական իշխանության կողմից տրված խոստումները բոլորը սուտ էին, չեն կատարվել: Նկատեց, որ Նիկոլ Փաշինյանի հետ համագործակցության հուշագիր ստորագրելով՝ ցանկացել է օգնել, աջակցել, որ ժողովրդի մեջ բան փոխվի, ժողովրդի սպասելիքները իրականան:

«Ֆեյքերով, Ֆեյսբուքով երկիր չես կարա կառավարես. ձախողված են բոլոր ոլորտները, այո՛, համաճարակը ձախողված է»,- շարունակեց նա՝ նկատելով, որ ամբողջ աշխարհում դեկտեմբերից համաճարակ է, իսկ Կառավարությունը գոնե հունվարից քայլեր չի ձեռնարկել, փոխարենը մարտին հանրաքվեի քարոզարշավ է արել:

Ընդգծեց՝ ով մտածում է, որ Ծառուկյանը ուզում է դիվիդենտներ հավաքել, անձնական շահ ունենալ, նա թող լինի ամենավերջին մարդը, թող լինի դավաճան կամ թուրք:

«Առանց փող դնելու տնտեսական հեղափոխություն չի լինում: Ասում ա՝ ժողովուրդ ջան, դուք անփող եք, հարկավոր ա գլխով հարուստ լինել: Դա երկրի ղեկավարի ասա՞ծ ա, մարդը ո՞նց հարուստ լինի, պայմաններ ստեղծեք, խոսք եք տվել… Մեկ տարի սպասում է ժողովուրդը, 2 տարի, նույն իրեն հեղափոխություն բերողները… ժողովուրդը խժռում է իր զավակներին, որովհետեւ ժողովուրդը ուզում է՝ ինչ-որ բան կատարվի»:

Այնուհետեւ ասաց, որ կարող է այս ամենի մասին ձայն չհանել, բայց սիրտը տրաքում է:

«Սիրտս տրաքվում ա, ես կարամ ձեն չհանեմ, իմ համար հանգիստ ապրեմ: Ասում ա՝ էսօր հիմնական վարակի պատճառը ժողովուրդն ա, մասկա չի դնում»:

Նա կարծիք հայտնեց, որ հեղափոխության վերջը եկել է: «Հեղափոխությունը դա գործով պետք է ապացուցել, ֆեյքերով, դատարկ-դատարկ խոսելով չի լինում, գնացեք գյուղեր կամ քաղաքով ման եկեք… 3 ամիս հետո սով է լինելու: Դրան տակից չեք կարա դուրս գաք, ժողովուրդ ջան, խելքի եկեք»,- կոչ արեց ԲՀԿ առաջնորդը:

Նա անդրադարձավ նաեւ արտաքին քաղաքականությանը եւ Արցախի խնդրին: Նկատեց, որ իշխանությունները փչացրել են բոլոր երկրների հետ հարաբերությունները, իսկ Արցախի հարցով չեն ձեւակերպել խնդիր, որ պետք է հասնել Արցախի միջազգային ճանաչմանը:

Անդրադառնալով իրեն վերագրվող մեղադրանքներին՝ ԲՀԿ առաջնորդը նկատեց, որ պատվեր կատարելով են իր վրա ընտրակաշառք, թուղթ գտել. «Ծառուկյանը գումար տվե՞լ ա, կա՞ այդպիսի ապացույց»,- հռետորական հարց բարձրացրեց պատգամավորը եւ շարունակեց.  

«Էնքան անբարոյականություն, ինձ կանչում են, հետեւիցս տղուս են կանչում: Չեն ասում՝ մի տղամարդ թող մնա տանը: Մարդ եղեք: Էդ անբարոյականությունը. դիմադիր-ընդդիմադիր, իշխանություն, ամեն մարդ պետք է մարդկություն ունենա»:

Ծառուկյանն իր խոսքի ընթացքում նույնիսկ անզգուշաբար ընդունեց, որ գործարար է, հետո ուղղեց իրեն՝ ասելով, որ սեփականատեր է:

Նկատեց՝ այս ամենով իրեն հերոսացնում են: «Ժողովուրդը 90 տոկոս հավատում էր հեղափոխությանը, այսօր 5 տոկոսն էլ չի հավատում, գնացեք տեսեք»: Միեւնույն ժամանակ ասաց, որ շարունակելու է խանգարել:

Խոսելով իր աջակիցներին բերման ենթարկելու մասին՝ Գագիկ Ծառուկյանը կարծիք հայտնեց, որ հեղափոխության ժամանակ իշխանություններին ոչ ոք չէր խանգարում, նույնիսկ երբ որ ռադիոտան դուռը ջարդեցին ներս մտան:

Այնուհետեւ Ծառուկյանը դիմեց պատգամավորներին: Խորհուրդ տվեց իրեն անձեռնմխելիությունից զրկելու հարցով քվեարկել իրենց խղճի համաձայն: Վստահեցրեց, որ ինչ որոշում էլ կայացվի, կհասկանա:

«Անտեղի տեղը մարդուն հերոսացնում եք, դնում եք վերեւ… Ես ամեն ինչի էլ պատրաստ եմ, ժամանակավոր բան է: Մեկ-երկու ամիս է, երկար չի տեւի»,- իր խոսքը եզրափակեց ԲՀԿ առաջնորդը եւ տեղեկացնելով, որ գնում է ԱԱԾ՝ նոր հարցաքննության՝ հեռացավ առանց պատասխանելու պատգամավորների հարցերին:

Մանրամասները՝ տեսանյութում