Գյումրիում շատերը թույլ չեն տալիս թափառող շներին տարածքից հեռացնել, թաղամասերի 80 տոկոսում այդ խնդիրը կա

Գյումրիում բնակիչների մեծ մասը  խոչընդոտում է թափառող շների վնասազերծման և ստերջացման գործընթացին: Այս մասին ասուլիսում ասաց Գյումրու քաղաքապետի տեղակալ Հայկ Սուլթանյանը: Պատասխանատուների ձեռքում անգամ դա փաստող տեսանյութ կա: Չեն թողնում տարածքից շներին հեռացնեն՝ տարբեր պատճառաբանություններով:

«Շատ դեպքեր ունենք, որ շքամուտքում են թափառող շանը պահում, հարևանները բողոքել են, գնացել են պատասխանատուները, վեճ-վիճաբանություն է եղել հարևանների հետ: Դեպք է եղել, որ կենդանուն բռնել, բերել են, որ ստերջացնեն, տերն եկել, վիճաբանել, տարել է, չի թողել՝ թե թող մե հատըմ սերունդ ունենա, նոր ստերջացրեք: Հետաքրքիր ժողովուրդ են»,- ասաց Հայկ Սուլթանյանը:

Շների ստերջացումը Գյումրիում իրականացնող My vet անասնաբուժական կլինիկայի անասնաբույժ Էդգար Գևորգայնն էլ հայտարարեց՝ շենքեր կան, որոնց բնակիչները կտրականապես թույլ չեն տալիս, որ իրենց որսորդները կենդանիներին հեռացնեն տարածքից: «Շներն իրենց ավտոտնակներն ու մեքենաներն են պաշտպանում: Պետք է էդ բնակիչներին հասկացնել, որ ստերջացումը 3 օր է տևում, մենք կենդանուն վերադարձնում ենք այնտեղ, որտեղից վերցնում ենք: Անհնար է: Թաղամասերի 80 տոկոսում այս խնդիրն ունենք մենք»,-ասաց Գևորգյանը:

Կենդանիներին բռնելն էլ լուրջ ռիսկեր ունի՝ մարդկանց հետ վեճ-վիճաբանությունից սկսած մինչև առողջական հարցեր: Կլինիկան արդեն մի քանի որսորդ է փոխել:

Մայիսի 30-ին Մուշ թաղամասի այն տարածքում, որտեղ շները հոշոտել էին 2.5 տարեկան երեխային, պարբերաբար են այցելում անասնաբուժական կլինիկայի որսորդները: Դեպքին նախորդած օրերին հենց այդ վայրից 12 շուն է քնեցվել ու տարվել ստերջացման: «Տարածքում մեծ աղբանոց կա, կենցաղային աղբ է լցված: Շենքի հարակից տարածքում աղբամաններ չկան, բայց մարդիկ աղբ են կուտակել: Որպեսզի կեր հայթայթեն կենդանիները, հավաքվել են այնտեղ»,- պատմեց անասնաբույժը:

Հիշեցնենք, որ մայիսի 30-ին Գյումրիում թափառող շների հարձակմանն էր ենթարկվել 2.5 տարեկան երեխա: Նա բազմաթիվ վնասվածքներով Գյումրու Ավստրիական մանկական հիվանդանոցից Երեւանի «Սուրբ Աստվածամայր» ԲԿ էր տեղափոխվել: Գյումրիում վիրահատվելուց հետո երեխան Երևանում երկրորդ անգամ է վիրահատվել: Կատարվել է դիմածնոտային վիրաբուժական միջամտություն, ունի բազմաթիվ վնասվածքներ դեմքի, վերջույթների և մարմնի այլ հատվածներում: Շատ լուրջ վնասված է երեխայի պարանոցը: Այսօր փոքրիկը գիտակցության է եկել, սկսել է շնչել ինքնուրույն:

Գյումրիում արդեն 350 շուն է ստերջացվել, սակայն սա հարցի լուծում չէ: Այդ կենդանիները կրկին վերադարձվում են ազատության մեջ: Մասնագետները մեկ թաղամասի վրա չեն կենտրոնանում: Փորձում են քնեցման եղանակով քաղաքի տարբեր թաղամասերից 10-12 շուն վերցնել, որպեսզի ինչ-որ կերպ համաչափություն ապահովվի: Գյումրիում նրանց համար կացարանի կառուցումն անընդհատ ձգձգվում է: Քաղաքապետի տեղակալն ասաց՝ իրենք պատրաստ են և տարածք հատկացնել, և որոշակի աջակցություն, սակայն խնդիրը թողնել միայն համայնքի ուսերին և լուծում ակնկալել, իրատեսական չէ: Ֆինանսական հսկայական ծախսի հետ է դա կապված: Այս հարցում Գյումրու քաղաքապետարանն ակնկալում է պետական աջակցություն և մասնավոր ներդրում:

«Հիմա մենք 2 հատ ժամանակակից զենք ենք ձեռք բերել, որ կարողանանք կրակելու միջոցով քնեցենել դժվար բռնվող կենդանուն, մյուսը ցանց է: Երկուսն էլ ունեն բարձր աղմուկ, ու մարդկանց  99 տոկոսը մտածում է, որ առաջվա մեթոդով ուղղակի հրացանով ոչնչացնում ենք կենդանիներին: Դրանից էլ սկսվում է կռիվը: Բայց վստահեցնում եմ, Գյումրիում շներ չեն սպանվում, մեր նպատակը կենդանուն անվնաս կլինիկա հասցնելն է»,- հայտարարեց անասնաբույժը:

Ասել, որ ստերջացումից հետո շները կդառնան 100 տոկոսվ անվնաս, սխալ է, բայց որ ագրեսիան պակասում է, ըստ մասնագետների՝  փաստ է: Եթե կացարան լիներ, առավել ագրեսիվներին կպահեին, մյուս շներին կվերադարձնեին փողոց: Քանի դեռ այն չկա, բոլոր տեսակի հակումներով շներին ստերջացումից հետո ստիպված են վերադարձնել այն տարածք, որտեղից բռնել են:

Ըստ Հայկ Սուլթանյանի, Գյումրիում այլ խնդիր էլ կա: Քաղաքում շներին ստերջացնում են, բայց հարևան համայնքներում դա չի կատարվում, եւ օրինակ Մուշ թաղամասում, որտեղ երեխայի հոշոտման դեպքը գրանցվել էր, հավանականությունը մեծ է, որ շներ են հավաքվում նաև մոտ գտնվող Մարմաշեն ու հարևան այլ գյուղական համայնքներից: