Հայաստանում մասնավոր լաբորատորիաները սկսել են կորոնավիրուսի հակամարմինների թեստեր անել՝ պարզելու՝ մարդը վարակված եղել է

Հայաստանում արդեն կարելի է հանձնել հակամարմինների թեստեր. նվազագույնը երկու լաբորատորիա՝ «Էկոսենս»-ը եւ «Պրոմ-թեստ»-ը, հնարավորություն են տալիս իմանալ՝ արդյոք ավելի վաղ վարակված եղել եք կորոնավիրուսային հիվանդությամբ, որի մասին այդ ժամանակ փաստորեն տեղյակ չեք եղել:

Երկու լաբորատորիաներից էլ մեզ ասացին, որ թեստերը բավական ճշգրիտ են (որոշակի տոկոսային հարաբերություն նշել հրաժարվեցին): 

«Իմունոգլոբուլին G-ն ցույց է տալիս նախկինում վարակված եղել եք, թե ոչ: Թեստավորման արժեքն է 15 հազար դրամ: Մեզ մոտ ճշգրիտ գերմանական թեստեր են»,- ասացին «Էկոսենս»-ից:

«Թեստավորման պետք է մոտենալ անձնագրով, առնվազն երեք ժամ առաջ ոչ մի բան չեք ուտում, չեք խմում, չեք ծխում, քթի կաթիլներ չեք օգտագործում: Պատասխանը ստացվում է երկու աշխատանքային օրում, այն բավական ճշգրիտ է»,- հաղորդեցին «Պրոմ-թեստ»-ից: Այստեղ թեստավորումն արժե 20 հազար դրամ:

Մանրամասներ իմանալու համար «Էկոսենս»-ի ընդունարանից տրամադրեցին հեռախոսահամար, որին երեք օր շարունակ ոչ ոք չպատասխանեց, իսկ «Պրոմ-թեստ»-ում առաջարկեցին գրավոր հարցում ուղարկել: Մեր հարցմանը պատասխանեց աշխատակազմի ղեկավար Սեւադա Գինոյանը: Նա հաղորդեց, որ կազմակերպության աշխատակիցները նմուշառում կատարում են ե՛ւ լաբորատորիայում, ե՛ւ տնային կանչերով (տնային կանչի արժեքն ավելին է՝ կախված մեկ այցով վերցվող նմուշների քանակից): Գինոյանը տեղեկացրեց, որ հակամարմինների թեստի համար որպես նմուշ վերցվում է ներերակային արյուն:

Անդրադառնալով հարցին, թե այն քաղաքացիները, որ կասկածում են՝ վարակված են եղել  կորոնավիրուսով, ե՞րբ է ճիշտ, որ հանձնեն հակամարմինների թեստեր, հավանական վարակումից քանի օր անց՝ Գինոյանն ասաց. «Մարդու վարակումից 10-11 օր անց հակամարմինները սկսում են ձեւավորվել, եւ արդեն հնարավոր է «գտնել» դրանք»: Կորոնավիրուսով վարակումից հետո օրգանիզմի ձեւավորած հակամարմիններն արդեն, նրա խոսքով, մշտապես առկա են լինում արյան մեջ. հակամարմիների թեստի հանձնելու համար ժամկետի որեւէ սահմանափակում չկա: «Իսկ վարակվելուց երկու շաբաթ անց արդեն թեստը հստակ ցույց է տալիս»,- նշեց Գինոյանը:

«Պրոմ-թեստ» լաբորատորիա կորոնավիրուսի հակամարմինների թեստ կատարելու համար դիմել է մոտ 60 հոգի, եւ մոտ 5 տոկոսի մոտ հայտնաբերվել են կորոնավիրուսի հակամարմիններ, այսինքն՝ բացահայտվել է, որ մարդը վարակակիր է եղել: Գինոյանի խոսքով՝ հետազոտությունների տվյալները լրացվել են այն համակարգում, որով պետությունն աշխատում է՝ ներառվելով հաստատված դեպքերի ցանկում:

Մեծապես կարեւորվում է թեստերի ճշգրտությունը, հնարավո՞ր է նշել ձեր կիրառած թեստերի ճշտության աստիճանը հարցին պատասխանելով՝ նա ընդգծեց, որ «ճշտություն» բառն այս պարագայում ճիշտ չէ. «Թեստերն ունեն առանձնահատկություններ, եւ դրանք տարբեր պոպուլյացիաների համար տարբեր են: Հիմա մենք կիրառում ենք գերմանական արտադրության «EuroImmun» կազմակերպության թեստերը, նախատեսում ենք շուտով նաեւ ամերիկյան թեստերով աշխատել»,- ասաց նա:

Առողջապահության նախարարության խոսնակ Ալինա Նիկողոսյանն ասաց, որ մասնավոր լաբորատորիաների թեստերի եւ դրանց ճշգրտության մասին տեղեկատվություն չունեն:

Մասնավոր լաբորատորիաների թեստավորումն անհատներին հնարավորություն է տալիս սեփական առողջության մասին ստանալ տեղեկատվություն, սակայն համակարգված տվյալներ երկրում կորոնավիրուսային վարակի տարածվածության եւ իմունային պատնեշի ստեղծման մասին տալ չի կարող: Ի պատասխան այն հարցին, թե մասնավոր լաբորատորիաների հակամարմինների թեստերի վիճակագրությունն ինչ-որ ձեւով համադրվո՞ւմ է պաշտոնական վիճակագրության հետ՝ Նիկողոսյանը նշեց. «Նախարարությունը հակամարմինների թեստեր չի անում, եւ, ըստ այդմ, նաեւ նման վիճակագրություն չունենք»:

Նշենք, որ Հայաստանում մոտ մեկ ամիս առաջ դեռ հակամարմինների թեստեր չէին կատարվում, քանի որ աշխարհում կասկածի տակ էր դրանց ճշտությունը: Լաբորատորիաների անընդմեջ աշխատանքի արդյունքում քիչ ժամանակ անց բազմաթիվ երկրներ սկսեցին վստահել հակամարմինների թեստերին: Վերջերս իր ասուլիսներից մեկում նախարար Արսեն Թորոսյանն էլ ասաց, որ նախատեսում են հակամարմինների թեստավորում անել, սակայն միայն հետազոտական նպատակով:

«Բանակցում ենք մի ընկերության հետ հակամարմինների թեստեր ձեռք բերելու շուրջ: Ամենայն հավանականությամբ մոտ ժամանակներում դրանք կլինեն Հայաստանում, բայց դրանք օգտագործվելու են հիմնականում, գուցե նաեւ միայն հետազոտություն իրականացնելու համար, որպեսզի այսօր պարզենք իմունիտետ ունեցող քաղաքացիների շրջանակը եւ տոկոսն ընդհանուր պոպուլյացիայի մեջ, բայց ես կարող եմ հիասթափեցնել շատերին, որովհետեւ նման հետազոտություններն այլ երկրներում ցույց են տվել, որ միայն շատ փոքր տոկոսն ունի իմունիտետ կամ վարակվել է վիրուսով, եւ դա որեւէ կերպ չի կարող հանդիսանալ պաշտպանիչ պատնեշ մյուսներին չվարակելու տեսանկյունից: Մենք երկար ժամանակ պիտի պաշտպանվենք վարակվելուց, եւ կոլեկտիվ իմունիտետի մոտալուտ ժամանում չի լինելու»,- նշել էր նախարարը: