22 տարի եղել է լռելյայն կոնսենսուս, որ Արցախը պետք է բանակցային սեղանի շուրջ չլինի․ Նիկոլ Փաշինյան

Եթե անհրաժեշտություն ծագի Լեռնային Ղարաբաղի խնդիրը քննարկել Հայաստանի նախկին ղեկավարների հետ՝ ոչ մի խնդիր չեմ տեսնում: Առցանց ասուլիսի ժամանակ հայտարարեց ՀՀ վարչապետ Նիկոլ Փաշինյանը՝ նկատելով սակայն, որ նախկինում վարած բանակցությունների մասին ամբողջ ինֆորմացիան, այն ինֆորմացիան, որ իրեն պետք է՝ այսօր իր ձեռքի տակ է։

Անդրադառնալով հարցին, թե արդյոք արդյունավե՞տ է համարում հակամարտության կարգավորման ներկա ձեւաչափը՝ Փաշինյանն ասաց․ «Ինչ վերաբերում է ձեւաչափին՝ բազմիցս արտահայտել ենք մեր կարծիքը, որ Լեռնային Ղարաբաղի ընտրված ներկայացուցիչների մասնակցությունը բանակցություններին շատ էական է եւ կարեւոր ենք համարում, որովհետեւ չենք պատկերցնում լուծում՝ առանց Արցախի ընտրված ներկայացուցիչների մասնակցության։ Եվ գիտեք, խոսք է գնում այն մասին, որ մեզ չի հաջողվել Արցախին վերադարձնել բանակցային սեղան: Վերջին 22 տարում, երբ 1998 թվականին Արցախը բանակցային սեղանից դուրս թողնվեց եւ 22 տարի ամբողջ միջազգային հանրությունը, ամբողջ Մինսկի խումբը աշխատել է այդ պայմաններում եւ այդպես եղել է լռելյայն կոնսենսուս, որ Արցախը պետք է բանակցային սեղանի շուրջ չլինի եւ սա իր հետ բերում է որոշակի բարդություներ։ Մեր պատկերացումն այն է, որ չի կարող Արցախի հարցը լուծվել առանց Արցախի ընտրված ներկայացուցիչների եւ մենք չենք կարող որոշումներ կայացնել նրանց փոխարեն»։

Հարցերից մեկն էլ վերաբերում էր խաղաղապահների տեղակայմանը։ ՀՀ վարչապետն ասաց, որ նախկինում եղած փաստաթղթերում եւ հրապարակային հայտարարություններում խաղաղապահ ուժերի գաղափարը միշտ էլ ներկա է եղել, բայց ամենատարբեր գաղափարներ կարող են ներկա լինել։ «Ես ասել եմ, որ եթե բանակցությունների արդյունքում կլինի այնպիսի լուծում, որին ոչ թե ես հակված կլինեմ ասել՝ այո, այլ որին ես կմտածեմ, որ գուցե չարժի ասել ՝ ոչ, եթե կձեւավորվի այդպիսի տարբերակ՝ ես ԱԺ-ում էլ եմ ասել, ինչ պետք է հետեւի դրան՝ վերցնել այդ տարբերակը, գալ եւ առաջինը՝ Հայաստանի ու Արցախի անվտանգության խորհուրդների հետ, երկրորդը՝ խորհրարանների հետ եւ ժողովրդի հետ քննարկել։

Ես դեռ 2018-ին այնպիսի հրապարակային պայմանվորվածություն եմ կապել մեր ժողովրդի հետ, որ ընդհանրապես որեւէ շահարկման տեղ չի կարող լինել։ Հարց են տալիս՝ իսկ կարող ա՞ Հայաստանի կառավարությունը կամ վարչապետը Արցախի հարցի ոչ հայանպաստ լուծման գնա։ էդ հարցը դուք ինձ չեք տալիս, այդ հարցը դուք ձեզ եք տալիս՝ իսկ դուք կարո՞ղ եք գնալ Արցախի հարցի ոչ հայանպաստ լուծման, որովհետեւ բանակցային սեղանի շուրջ, ի տարբերություն նախկին մի շարք դեպքերի, այսօր բանակցային սեղանի մոտ նստած անձը ներկայացնում է Հայաստանի ժողովրդին եւ ժողովրդին ներկայացնելով ասում է՝ եթե կլինի այնպիսի լուծում, որին ոչ ասելը ռացիոնալ չի լինի, էդ ժամանակ էլի կգանք անվտանգության խորհուրդ եւ այլն»,- մանրամասնեց Փաշինյանը։

Այնուհետեւ նա հարց բարձրացրեց՝ «Ինչու Ղարաբաղի հարցը կարող է լուծվել մի մարդու քմահաճույքո՞վ, էդ ով ա էդ մարդը՝ ես ուզում եմ իմանամ։ Եվ սա է ամենակարեւոր արձանագրումը»։ ՀՀ վարչապետն ասաց, որ միտում է նկատում, որ ոմանք փորձում են Հայաստանի օրինական ներկայացուցիչերին բանակցային սեղանի շուրջ կաշկանդել, անընդհատ ասելով, որ վա՜յ, էս ինչ ա տեղի ունենում։ Նիկոլ Փաշինյանը բացատրեց, որ բանակցային սեղանի շուրջ ամենատարբեր մարդիկ են, կարող են ամենատարբեր, ամենաընդունելիից ամենաանընդունելի գաղափարներ հնչել, եւ հարց բարձրացրեց՝ նման կաշկանդումով ուզում են այնպիսի իրավիճակ ստեղծել, որ ՀՀ ներկայացուցչները ականջները փակեն, ասեն մենք չե՞նք լսում կամ թողեն փախնե՞ն բանակցային սեղանի մոտից։ «Սա ի՞նչ մոտեցում է ընդհանրապես։ Ասում եմ՝ Ղարաբաղի հարց լուծողը հայ ժողովուրդն է եւ ես մեր սկզբունքները բազմիցս հրապարակել եմ»,- ընդգեց վարչապետը՝ հավելելով, որ ինքը կաշկանդված չէ բանակցային սեղանի մոտ եւ բոլորը, այդ թվում հայաստանյան որոշ ուժեր, չեն կարողանալու կաշկանդել իրենց։